မြန်မာနိုင်ငံသို့ ပြင်သစ်နိုင်ငံဖွံ့ဖြိုးတိုးတက်ရေးအဖွဲ့ (French Development Agency-AFD) က ကူညီပံ့ပိုးလျက်ရှိသည့် စီမံကိန်းများ၏ အကောင်အထည်ဖော် ဆောင်ရွက်မှုများနှင့်စပ်လျဉ်း၍ ဒုတိယအကြိမ် Annual Consultation Meeting ကို စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း ဦးဆောင်၍ ၂၀၁၉ ခုနှစ်၊ ဇန်နဝါရီလ (၂၉) ရက်နေ့တွင် M-Gallery Hotel ၊ နေပြည်တော်၌ ကျင်းပခဲ့ပါသည်။

အစည်းအဝေးတွင် စီမံကိန်းနှင့်ဘဏ္ဍာရေးဝန်ကြီးဌာန၊ဒုတိယဝန်ကြီး ဦးမောင်မောင်ဝင်း၊ ပြင်သစ်နိုင်ငံဆိုင်ရာ သံအမတ်ကြီး Mr. Christian Lechervy နှင့် AFD မှ South East Asia AFD Director ဖြစ်သူ Mr. Yazid Bensaid တို့က အဖွင့်အမှာစကား ပြောကြား ခဲ့ပါသည်။ ဖွံ့ဖြိုးမှုမိတ်ဖက်များနှင့်စပ်လျဉ်း၍ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ် ရေးဝန်ကြီးဌာန၏ အခန်းကဏ္ဍနှင့် လုပ်ငန်းတာဝန်များကို နိုင်ငံခြားစီးပွားဆက်သွယ်ရေး ဦးစီးဌာနမှ ညွှန်ကြားရေးမှူး ဒေါ်သူဇာခင်ကလည်းကောင်း၊ ပြည်သူ့ကြွေးမြီစီမံခန့်ခွဲမှုနှင့် စပ်လျဉ်း၍ ဆောင်ရွက်မှုအခြေအနေများကို ငွေတိုက်ဦးစီးဌာနမှ ညွှန်ကြားရေးမှူး ဒေါ်သင်းသင်းစုကလည်းကောင်း ရှင်းလင်းတင်ပြခဲ့ပါသည်။ ဆက်လက်၍ AFD ထံမှ ချေးငွေ၊ ထောက်ပံ့ငွေတို့ဖြင့် အကောင်အထည်ဖော် ဆောင်ရွက်လျက်ရှိသည့် လုပ်ငန်း စီမံကိန်းများ၏ ဆောင်ရွက်နေမှုအခြေအနေနှင့် ဆက်လက်ဆောင်ရွက်မည့် လုပ်ငန်းစဉ်များ နှင့်စပ်လျဉ်း၍ AFD မှ တာဝန်ရှိသူများက ရှင်းလင်းဆွေးနွေးခဲ့ပါသည်။

ထို့နောက် အစည်းအဝေးတက်ရောက်လာသူများက လုပ်ငန်းဆောင်ရွက်မှုအခြေအနေများ၊ ကြုံတွေ့ရသည့်အခက်အခဲများ၊ ဆက်လက်ဆောင်ရွက်မည့် လုပ်ငန်းစီမံကိန်းများနှင့် စပ်လျဉ်း၍ မေးမြန်းဆွေးနွေးခဲ့ကြပြီး တက်ရောက်လာသူများ၏ မေးမြန်းချက်များအပေါ် သက်ဆိုင်ရာတာဝန်ရှိသူများက ပြန်လည်ရှင်းလင်းခြင်း၊ အကြံပြုဆွေးနွေးခြင်းတို့ ပြုလုပ် ခဲ့ကြပါသည်။