နေပြည်တော်၊ မတ် ၂၅

စီမံကိန်းနှင့်ဘဏ္ဍာရေးဝန်ကြီးဌာန၊ ငွေတိုက်ဦးစီးဌာန၊ ဌာနတွင်းအရာထမ်းများမွမ်းမံသင်တန်း အမှတ်စဉ်(၂) သင်တန်းဖွင့်ပွဲအခမ်းအနားကို ၂၀၂၅ ခုနှစ်၊ မတ်လ (၂၅)ရက်နေ့၊ နံနက်(၈:၃၀) နာရီတွင် နေပြည်တော်ရှိ စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ်(၃၄)၌ ကျင်းပသည်။ သင်တန်းဖွင့်ပွဲအခမ်းအနားသို့ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမင်းထွဋ်၊ ဝန်ကြီးဌာနအောက်ရှိ ဦးစီးဌာနများမှ ညွှန်ကြားရေးမှူးချုပ်များ၊ အရာထမ်းများနှင့် သင်တန်းနည်းပြများ တက်ရောက်ပါသည်။

အခမ်းအနားတွင် ဒုတိယဝန်ကြီး ဦးမင်းထွဋ်က အဖွင့်အမှာစကားပြောကြားရာ၌ ယခုဖွင့်လှစ် သည့် သင်တန်းမှာ တစ်ရက်လျှင် (၃)နာရီဖြင့် ရက်ပေါင်း(၂၀)ကြာဖွင့်လှစ်မည့် သင်တန်းဖြစ်ကြောင်း၊ အဆိုပါသင်တန်းသို့ တက်ရောက်ကြသည့် သင်တန်းသား/သင်တန်းသူများအနေဖြင့် အခြေခံသဘောတရားများကိုသာ နားလည်သဘောပေါက်မည်ဖြစ်ကြောင်း၊ ငွေတိုက်ဦးစီးဌာနသည် ယခင်က ရသုံးမှန်းခြေငွေစာရင်းဦးစီးဌာနအောက်ရှိ ဌာနခွဲတစ်ခုဖြစ်ပါကြောင်း၊ ၂၀၁၃ ခုနှစ်တွင် ပြဋ္ဌာန်းသည့် မြန်မာနိုင်ငံတော်ဗဟိုဘဏ်ဉပဒေအရ မြန်မာနိုင်ငံတော်ဗဟိုဘဏ်က ၂၀၁၃ ခုနှစ်မှစ၍ သီးခြားရပ်တည်ပြီးနောက် ပြည်တွင်း၊ ပြည်ပ ကြွေးမြီကိစ္စရပ်များအတွက် ငွေတိုက်ဦးစီးဌာနကို ဦးစီးဌာနအသစ်တစ်ခုအဖြစ် ၂၀၁၄ ခုနှစ်မှစ၍ ဖွင့်လှစ်ခဲ့ပါကြောင်း၊ ယခင်ကနိုင်ငံတကာရဲ့ အကူအညီများစွာရရှိခဲ့ပြီး ယခုအခါ အကူအညီများမရှိနိုင်းတော့ပေမယ့် AI နည်းပညာများအား အသုံးပြု၍ လုပ်ငန်းဆောင်တာများကို ဆောင်ရွက်နိုင်ပါကြောင်း၊ နိုင်ငံတကာတွင်လည်း AI နည်းပညာအား အသုံးပြု၍ လုပ်ငန်းဆောင်တာများ ဆောင်ရွက်လျက်ရှိပါကြောင်း၊ ၎င်းနောက် နိုင်ငံတကာတွင် Treasury Management Software အား အသုံးပြုလျက်ရှိပြီး မြန်မာနိုင်ငံတွင် ငွေတိုက်ဦးစီးဌာန၌ Financial Information Reporting System for Treasury-FIRST အား အသုံးပြုလျက်ရှိသဖြင့် ချိတ်ဆက်နိုင်ရန် ဆောင်ရွက်ရမည်ဖြစ်ကြောင်း ပြေားကြားခဲ့ပါသည်။

ဆက်လက်၍ “ဝန်ထမ်းကောင်းမှ နိုင်ငံကောင်းမည်” ဆောင်ပုဒ်နှင့်အညီ နိုင်ငံတစ်နိုင်ငံ၏ ဖွံ့ဖြိုးတိုးတက်မှုတွင် ဝန်ထမ်းများ၏ အခန်းကဏ္ဍသည် အဓိကကျသည့်အတွက် ဝန်ထမ်းများ၏ စွမ်းဆောင်ရည်ဖွံ့ဖြိုးတိုးတက်ရန်နှင့် ရေရှည်ရပ်တည်နိုင်ရန် ကြိုးစားဆောင်ရွက်ကြရန် လိုအပ်ပါကြောင်း လမ်းညွှန်မှာကြားခဲ့ပါသည်။

ယခုဖွင့်လှစ်သည့်သင်တန်းသို့ ငွေတိုက်ဦးစီးဌာနမှ အရာထမ်းသင်တန်းသား/သင်တန်းသူ စုစုပေါင်း(၂၅)ဦး ပါဝင်တက်ရောက်ကြပြီး သင်တန်းကာလမှာ ရက်သတ္တပတ်(၄)ပတ် ကြာမြင့်မည်ဖြစ်ပြီး ငွေတိုက်ဆိုင်ရာလုပ်ငန်းများ၊ အစိုးရ၏ဝယ်ယူခြင်း၊ ပြည်သူ့ဘဏ္ဍာရေးစီမံခန့်ခွဲမှု ခေတ်မီဖွံ့ဖြိုးတိုးတက်ရေးစီမံကိန်း (PFM) အကြောင်းသိကောင်းစရာများ၊ အစိုးရပုဂ္ဂလိက ပူးပေါင်းဆောင်ရွက်မှု (Public Private Partnership-PPP)၊ နိုင်ငံ့ဝန်ထမ်းဉပဒေ၊ နည်းဉပဒေများ၊ ဘတ်ဂျက်ရေးဆွဲခြင်းနှင့် ဘဏ္ဍာရေးစည်းမျဉ်းများ၊ စာရင်းစစ်ဆေးခြင်းလုပ်ငန်းများ၊ အခွန်ဆိုင်ရာများ၊ ဘဏ်လုပ်ငန်းဆိုင်ရာများ၊ ငွေကြေးမူဝါဒ( Monetary Policy)၊ ဉပဒေရေးရာ သိကောင်းစရာများ၊ ငွေကြေးစီမံခန့်ခွဲခြင်း၊ ငွေတိုက်ရေးရာမူဝါဒနှင့် အရည်အသွေးမြှင့်တင်မှုဆိုင်ရာလုပ်ငန်းစဉ်၊ ဘဏ္ဍာရေးအစီရင်ခံစာများပြုစုခြင်း၊ ကြွေးမြီစီမံခန့်ခွဲမှု၊ သတင်းအချက်အလက်နှင့်နည်းပညာအကြောင်းအရာများ၊ ရုံးစာရေးသားခြင်း၊ ဝန်ထမ်းစည်းမျဉ်းစသည့် ဘာသာရပ်များ သင်ကြားပို့ချသွားမည်ဖြစ်ကြောင်း သိရှိရပါသည်။