နေပြည်တော်၊ မတ် ၁၉

အစိုးရ၏ဝယ်ယူခြင်းဆိုင်ရာ သတင်းအချက်အလက် စစ်တမ်းကောက်ယူရန်အတွက် ပြည်ထောင်စုဝန်ကြီးဌာန၊ အဖွဲ့အစည်းများအား ရှင်းလင်းဆွေးနွေးပွဲကို ငွေတိုက်ဦးစီးဌာနမှ ညွှန်ကြားရေးမှူးချုပ် ဒေါ်စီစီပြုံးမှ ဦးဆောင်၍  ယနေ့ နံနက် (၁၀:၀၀) နာရီတွင် စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ် (၃၄) ၊ စုပေါင်းအစည်းအဝေးခန်းမ၌  ကျင်းပပြုလုပ်ခဲ့ရာ ပြည်ထောင်စုဝန်ကြီးဌာန၊ အဖွဲ့အစည်းများမှ တာဝန်ရှိသူများ တက်ရောက်ခဲ့ပါသည်။

ဦးစွာ ငွေတိုက်ဦးစီးဌာန၊ ညွှန်ကြားရေးမှူးချုပ် ဒေါ်စီစီပြုံးမှ  ၂၀၁၄ ခုနှစ်မှစတင်၍ အစိုးရ၏ ဝယ်ယူရေးဆိုင်ရာ ပြုပြင်ပြောင်းလဲမှုများဆောင်ရွက်ခဲ့ရာ  ၂၀၁၇ နှစ်တွင်  “အစိုးရဌာန၊ အဖွဲ့အစည်းများ၏ တည်ဆောက်ခြင်း၊ ပစ္စည်းဝယ်ယူခြင်း၊ ဝန်ဆောင်မှုရယူခြင်း၊ ငှားရမ်းခြင်းနှင့်ရောင်းချခြင်းများဆောင်ရွက်ရာတွင် လိုက်နာရမည့် တင်ဒါလုပ်ထုံးလုပ်နည်း” ယခင် နိုင်ငံတော်သမ္မတရုံး၏ ညွှန်ကြားချက်အမှတ် (၁/၂၀၁၇) အား ထုတ်ပြန်ခဲ့ပြီး ယင်းညွှန်ကြားချက်အား လိုက်နာမှုအခြေအနေအား  လေ့လာဆန်းစစ်ရန်အတွက် အစိုးရ၏ ဝယ်ယူခြင်းဆိုင်ရာ သတင်းအချက်အလက်စစ်တမ်းအား ၂၀၁၇−၂၀၁၈ ခု၊ ဘဏ္ဍာရေးနှစ်မှ စတင်ကောက်ယူခဲ့ပါကြောင်း၊ ပြည်ထောင်စုဝန်ကြီးဌာန (၈) ခု၏ ကျပ် ၁၀၀ သန်းနှင့်အထက် တန်ဖိုးရှိဝယ်ယူခြင်း၊ ငှားရမ်းခြင်းနှင့်ရောင်းချခြင်းနှင့်စပ်လျဉ်း၍ ကောက်ခံခဲ့ပြီး ယခု ပြည်ထောင်စုဝန်ကြီးဌာန၊ အဖွဲ့အစည်းများအားလုံးသို့ စစ်တမ်းကောက်ယူမည်ဖြစ်သဖြင့်  မေးခွန်းလွှာပုံစံ (နမူနာပုံစံ) အား ရှင်းလင်းရန်နှင့် ဌာန၊ အဖွဲ့အစည်းများထံမှ အကြံဉာဏ်များ ရယူလိုခြင်းဖြစ်ကြောင်း၊ ယခု ဆွေးနွေးပွဲမှ ရရှိသည့်အချက်များဖြင့် စစ်တမ်းမေးခွန်းလွှာပြင်ဆင်ပြီး  ၂၀၂၁ ခုနှစ် အောက်တိုဘာလမှ ၂၀၂၂ ခုနှစ်  မတ်လ အထိ (၆) လ ဘတ်ဂျက်နှင့် ၂၀၂၂ ခုနှစ် ဧပြီလမှ ၂၀၂၃ မတ်လအထိ ဘဏ္ဍာရေးနှစ် (၂) နှစ် တို့အတွက် တောင်းခံမည်ဖြစ်ပါကြောင်း ပြောကြားခဲ့ပါသည်။

ဆက်လက်၍ ငွေတိုက်ဦးစီးဌာနမှ  ညွှန်ကြားရေးမှူး၊ ဒေါ်ဖြူဖြူစိုးက အစိုးရ၏ ဝယ်ယူခြင်းဆိုင်ရာသတင်းအချက်အလက် စစ်တမ်းမေးခွန်းအား ရှင်းလင်းတင်ပြခဲ့ပြီး တက်ရောက်လာသော ဌာန၊ အဖွဲ့အစည်းများမှ မရှင်းလင်းသည့်အချက်များအား မေးမြန်းခြင်း၊ အကြံပြုဆွေးနွေးခြင်းနှင့် မေးမြန်းလာသည့်အပေါ် ငွေတိုက်ဦးစီးဌာနမှ တာဝန်ရှိသူများက ပြန်လည်ဖြေကြားခြင်းတို့ကို ဆောင်ရွက်ခဲ့ပါသည်။

ထို့နောက် ငွေတိုက်ဦးစီးဌာန ညွှန်ကြားရေးမှူးချုပ်၊ ဒေါ်စီစီပြုံးက နိဂုံးချုပ်အမှာစကား ပြောကြားပြီး ဆွေးနွေးပွဲအား နံနက် (၁၁:၄၅) နာရီတွင် ရုပ်သိမ်းခဲ့ပါသည်။