စီမံကိန်းအကောင်အထည်ဖော်မှုအခြေအနေ စောင့်ကြည့်ကြီးကြပ်ခြင်းနှင့် အစီရင်ခံခြင်းစနစ် (Project Progress Monitoring and Reporting System - PPMRS) အသုံးပြုနည်းသင်တန်းကျင်းပ

နေပြည်တော်

        စီမံကိန်းအကောင်အထည်ဖော်မှု အခြေအနေ စောင့်ကြည့်ကြီးကြပ်ခြင်းနှင့် အစီရင်ခံခြင်းစနစ် (Project Progress Monitoring and Reporting System - PPMRS)ကို အသုံးပြု၍ အချက်အလက်များ ပေးပို့နိုင်ရန်အတွက် (PPMRS) စနစ် အသုံးပြုနည်း သင်တန်းအား ၂၀-၆-၂၀၂၄ ရက်နေ့မှ ၂၇-၆-၂၀၂၄ ရက်နေ့အထိ စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ်(၃၂) ၌ ကျင်းပခဲ့ပါသည်။ အဆိုပါသင်တန်းသို့ ပြည်ထောင်စုအဆင့်အဖွဲ့အစည်းများ၊ ပြည်ထောင်စုဝန်ကြီးဌာနများ၊ နေပြည်တော်ကောင်စီ၊ မြန်မာ နိုင်ငံတော်ဗဟိုဘဏ်နှင့် နေပြည်တော်စည်ပင်သာယာရေးကော်မတီနှင့် တိုင်းဒေသကြီး/ ပြည်နယ်အစိုးရ အဖွဲ့များမှ စနစ်အသုံးပြုမည့် တာဝန်ရှိသူများ တက်ရောက်ခဲ့ပါသည်။

       ပြည်သူ့ဘဏ္ဍာရန်ပုံငွေဖြင့် အကောင်အထည်ဖော်ဆောင်ရွက်သည့် လုပ်ငန်းစီမံကိန်းနှင့် လုပ်ငန်းများ၏ အကောင်အထည်ဖော်မှုအခြေအနေများကို သုံးလပတ်အလိုက် အထက်အဖွဲ့အစည်းများသို့ အစီရင်ခံတင်ပြလျက်ရှိပြီး သက်ဆိုင်ရာဌာန/အဖွဲ့အစည်းများမှ ဆောင်ရွက်ပြီးစီးမှုအခြေအနေများအား စာရွက်စာတမ်းများ အသုံးပြု၍ ပေးပို့လျက်ရှိရာမှ PPMRS စနစ်ကို အသုံးပြုခြင်းဖြင့် လုပ်ငန်းစီမံကိန်း နှင့်လုပ်ငန်းများ၏ အကောင်အထည်ဖော်ဆောင်ရွက်ပြီးစီးမှုအခြေအနေများကို အကဲဖြတ်သုံးသပ်ခြင်း၊ စောင့်ကြည့်ကြီးကြပ်နိုင်ခြင်းနှင့် အစီရင်ခံစာများ ပြုစုရာတွင် ပိုမိုမြန်ဆန်လွယ်ကူလာစေရန်၊ လုပ်ငန်းစီမံကိန်းနှင့် လုပ်ငန်းများ၏ အကောင်အထည်ဖော်မှုအခြေအနေအား တစ်စုတစ်စည်းတည်း ကြည့်ရှု သိရှိနိုင်ရန်နှင့် အကောင်အထည်ဖော်မှုကြီးကြပ်ခြင်းကို အထောက်အကူ ဖြစ်စေရန်တို့အတွက် အဆိုပါ PPMRS စနစ်ကို ၂၀၂၃-၂၀၂၄ ဘဏ္ဍာနှစ်တွင် စတင်ရေးဆွဲခဲ့ခြင်းဖြစ်ပြီး ၂၀၂၄-၂၀၂၅ ဘဏ္ဍာနှစ် ဒုတိယ သုံးလပတ်မှ စတင်၍ အသုံးပြုမည်ဖြစ်ပါသည်။

        PPMRS စနစ် အသုံးပြု၍ လုပ်ငန်းစီမံကိန်းနှင့် လုပ်ငန်းများ၏ အကောင်အထည်ဖော်မှု အခြေအနေ အချက်အလက်များပေးပို့ခြင်း၊ စောင့်ကြည့်ကြီးကြပ်ခြင်းနှင့် အစီရင်ခံခြင်းတို့တွင် အကောင်အထည်ဖော်ပြီးစီးမှုအခြေအနေများကို အချိန်နှင့်တစ်ပြေးညီသိရှိနိုင်ခြင်း၊ သက်ဆိုင်ရာ ဌာန/အဖွဲ့အစည်း၊ တိုင်းဒေသကြီး/ ပြည်နယ် အစိုးရအဖွဲ့၊ ဦးစီးဌာန/ အဖွဲ့အစည်းများအနေဖြင့် မိမိတို့၏ လုပ်ငန်း အကောင်အထည်ဖော်မှုအခြေအနေများကို စောင့်ကြည့်ကြီးကြပ်နိုင်ခြင်း၊ ဌာနရှိဝန်ထမ်းများအနေဖြင့် လုပ်ငန်းခွင်အတွင်း သတင်းအချက်အလက်နည်းပညာအသုံးပြုမှု တိုးတက်လာခြင်း၊ e-Government စနစ်ကို အကောင်အထည်ဖော်နိုင်ခြင်း၊ သတင်းအချက်အလက်နည်းပညာကို အခြေခံ၍ အသုံးပြုသဖြင့် အချက်အလက်များသိမ်းဆည်းခြင်း၊ ထုတ်ယူသုံးစွဲခြင်း၊ စိစစ်သုံးသပ်မှုပြုလုပ်ခြင်းတို့တွင် ပိုမိုမြန်ဆန် လွယ်ကူလာခြင်း၊ စာရွက်များအသုံးပြုမှုလျှော့ချနိုင်ခြင်း၊ သဘာဝဘေးဒဏ်နှင့် အသုံးပြုသူများ၏ အားနည်းချက်ကြောင့် ဖြစ်ပွားသော အချက်အလက်များ ပျောက်ဆုံး၊ ပျက်စီးမှုများ လျော့နည်းနိုင်ခြင်း၊ အင်တာနက်၊ ကွန်ပျူတာနှင့် Smart Phone အသုံးပြု၍ အချက်အလက်များ အလွယ်တကူပေးပို့နိုင်သဖြင့် အချိန်ကုန်သက်သာခြင်း၊ မြေပြင်ကွင်းဆင်းစစ်ဆေးခြင်း မသွားရောက်နိုင်သည့် လုပ်ငန်းစီမံကိန်းနှင့် လုပ်ငန်းများ၏ မြေပြင်အကောင်အထည်ဖော်မှုအခြေအနေများကို ဓာတ်ပုံ၊ ဗီဒီယိုမှတ်တမ်းများဖြင့် အစီရင်ခံပေးပို့နိုင်ခြင်း၊ Digital Format ဖြင့် အချက်အလက်များ လုံခြုံစွာ သိမ်းဆည်းခြင်းဖြင့် စာရွက်စာတမ်းများ ထိန်းသိမ်းရခြင်းထက် နေရာကုန်ကျမှုနှင့် ပျက်စီးဆုံးရှုံးနိုင်ခြေ လျှော့ချနိုင်ခြင်းများ စသည့် အကျိုးကျေးဇူးများ ရရှိနိုင်မည်ဖြစ်ပါသည်။

        သင်တန်းကို စီမံကိန်းနှင့် ဘဏ္ဍာရေးဝန်ကြီးဌာန၊ ရုံးအမှတ်(၃၂)တွင် ကျင်းပခဲ့ပြီး ပြည်ထောင်စု အဆင့်အဖွဲ့အစည်းများ၊ ပြည်ထောင်စုဝန်ကြီးဌာနများ၊ နေပြည်တော်ကောင်စီ၊ မြန်မာနိုင်ငံတော် ဗဟိုဘဏ်နှင့် နေပြည်တော်စည်ပင် သာယာရေးကော်မတီတို့မှ တာဝန်ရှိသူများ တက်ရောက်၍ တိုင်းဒေသကြီး/ပြည်နယ်များမှ တာဝန်ရှိသူများက Online စနစ်ဖြင့် တက်ရောက်ခဲ့ကြပါသည်။