နေပြည်တော် အောက်တိုဘာ ၁၈ 
(၃၉) ကြိမ်မြောက် အာဆီယံအရင်းအနှီးဈေးကွက် ဖိုရမ်ဥက္ကဋ္ဌများ အစည်းအဝေး၊ ယင်း အစည်းအဝေးနှင့် ဆက်စပ်ကျင်းပသော အပြည်ပြည်ဆိုင်ရာ နှီးနှောဖလှယ်ပွဲ (39th ASEAN Capital Markets Forum – ACMF Chairs’ Meeting and International Conference)  နှင့် အလုပ်ရုံဆွေးနွေးပွဲ (Technical Workshop) တို့ကို အင်ဒိုနီးရှားနိုင်ငံ၊ ဘာလီမြို့တွင် အောက်တို ဘာလ ၁၆ ရက်မှ ၁၈ ရက်အထိ ကျင်းပပြုလုပ်ခဲ့ရာ အိမ်ရှင် အင်ဒိုနီးရှားနိုင်ငံ၏ ဖိတ်ကြားချက် အရ မြန်မာနိုင်ငံငွေချေးသက်သေခံလက်မှတ်လုပ်ငန်း ကြီးကြပ်ရေးကော်မရှင်ဥက္ကဋ္ဌ စီမံကိန်း နှင့် ဘဏ္ဍာရေးဝန်ကြီးဌာန ဒုတိယဝန်ကြီး ဦးမောင်မောင်ဝင်း ဦးဆောင်သော မြန်မာကိုယ်စား လှယ်အဖွဲ့ ပါဝင်တက်ရောက်ခဲ့သည်။
အောက်တိုဘာ ၁၆ ရက်တွင် ကျင်းပသော (၃၉) ကြိမ်မြောက် အာဆီယံအရင်းအနှီး ဈေးကွက်ဖိုရမ်ဥက္ကဋ္ဌများအစည်းအဝေးတွင် သဘာပတိအဖြစ် အင်ဒိုနီးရှားနိုင်ငံ ဘဏ္ဍာရေး ကြီးကြပ်မှုအေဂျင်စီမှ Chief Executive of Capital Market Supervisor Mr. Inarno Djajadi ကလည်းကောင်း၊ ပူးတွဲသဘာပတိအဖြစ် လာအိုနိုင်ငံ ငွေချေးသက်သေခံလက်မှတ်လုပ်ငန်း ကြီးကြပ်ရေးကော်မရှင် အထွေထွေအတွင်းရေးမှူး Mrs. Sengsourivong Fongchinda က လည်းကောင်းဆောင်ရွက်ပြီး အာဆီယံနိုင်ငံများမှ အရင်းအနှီးဈေးကွက်ကြီးကြပ်ရေးကော်မရှင် အကြီးအကဲများ၊ အာဆီယံအတွင်းရေးမှူးချုပ်ရုံး၊ အာရှဖွံ့ဖြိုးရေးဘဏ်နှင့် International Sustainability Standards Board (ISSB)  မှ ကိုယ်စားလှယ်များ တက်ရောက်ကြသည်။ 
ယင်းအစည်းအဝေးတွင် အာဆီယံနိုင်ငံများအတွက် အာဆီယံစုပေါင်းရင်းနှီးမြှုပ်နှံမှုအစီ အစဉ် (ASEAN Collective Investment Schemes - CIS) နှင့် လုပ်ငန်းဆောင်ရွက်သူများနှင့် နိုင်ငံတကာရန်ပုံငွေ (Operators and Foreign sustainable and responsible funds - SRF) ဆိုင်ရာလက်စွဲစာအုပ်နှင့် စပ်လျဉ်းသည့် နောက်ဆုံးအဆင့်ပြင်ဆင်မှုများ၊ အာဆီယံအရင်းအနှီး ဈေးကွက်ဖွံ့ဖြိုးတိုးတက်ရေးအတွက် အာရှဖွံ့ဖြိုးရေးဘဏ်၏ ပံ့ပိုးကူညီမှုဖြင့် စွမ်းဆောင်ရည် မြှင့်တင်ရေးအစီအစဉ်များ၊ Transition Finance Guidelines ထုတ်ပြန်မည့်ကိစ္စနှင့် Climate works Center (CWC) မှ ASEAN Voluntary Carbon Market Study နှင့်စပ်လျဉ်းသည့် အကြံ ပြုချက်များ၊ အာဆီယံအရင်းအနှီးဈေးကွက်ဖိုရမ် လမ်းပြမြေပုံအပေါ် အကောင်အထည်ဖော် ဆောင်ရွက်နိုင်သည့်အခြေအ‌နေများ၊ ASEAN Corporate Governance Scorecard ပြင်ဆင်မှု ကိစ္စများ၊ ဒစ်ဂျစ်တယ်ပိုင်ဆိုင်မှုများနှင်စပ်လျဉ်း၍ စည်းမျဉ်းထိန်းကျောင်းရေး ဆောင်ရွက်ချက် များ၊ နိုင်ငံတကာဘဏ္ဍာရေးဆိုင်ရာ အစီရင်ခံစံသတ်မှတ်သည့်အဖွဲ့မှထုတ်ပြန်သည့်  ရေရှည် တည်တံ့ခိုင်မာသောလုပ်ငန်းများ၏ ဖွင့်ဟထုတ်ဖော်မှုစံနှုန်းများအပေါ် လက်ခံကျင်းသုံးနိုင်ရေး
ဆောင်ရွက်သင့်သည့်အချက်များ၊ ၊ ACMF နှင့် IFRS Foundation အဖွဲ့တို့ပူးပေါင်းဆောင်ရွက် ရေးသဘောတူစာချုပ် လက်မှတ်ရေးထိုးရေးကိစ္စရပ်များ၊ အခြေခံအဆောက်အအုံဆိုင်ရာဘဏ္ဍာ ငွေရရှိရေးအတွက်ထုတ်ဝေသည့်  ငွေချေးစာချုပ်ကို ရင်းနှီးမြှုပ်နှံသူသတ်မှတ်ချက် Private Placement ဖြင့်ထုတ်ဝေခြင်းဆိုင်ရာ ရှေ့ဆက်လက်ဆောင်ရွက်ရမည့် လုပ်ငန်းစဉ်များ စသည် တို့ကို ဆွေးနွေးခဲ့ကြသည်။ ဆက်လက်၍  ACMF နှင့် IFRS အကြား ပံ့ပိုးကူညီမှုဖြင့် စွမ်းဆောင် ရည်မြှင့်တင်ရေးအစီအစဉ်များဆောင်ရွက်ရန်၊ ACMF နှင့် IFRS အကြား သဘောတူ လက်မှတ် ရေးထိုးမှုပြုလုပ်ခဲ့ပြီး၊ ၂၀၂၄ ခုနှစ်အတွက်  အာဆီယံအရင်းအနှီးဈေးကွက်ဖိုရမ် အလှည့်ကျ ဥက္ကဋ္ဌ တာဝန်ကို  လာအိုနိုင်ငံသို့ လွှဲပြောင်း ပေးအပ်ခဲ့သည်။     
အောက်တိုဘာ ၁၇ ရက်တွင် အာဆီယံဒေသတွင်း အရင်းအနှီးဈေးကွက်ဖွံ့ဖြိုးမှုတိုးမြှင့် ရေးဆိုင်ရာ အပြည်ပြည်ဆိုင်ရာနှီးနှောဖလှယ်ပွဲကျင်းပရာ အင်ဒိုနီးရှားနိုင်ငံ ဘဏ္ဍာရေးအေဂျင်စီ မှ ကော်မရှင်ဥက္ကဋ္ဌ Mr. Mahendra Siregar ၊ အင်ဒိုနီးရှားနိုင်ငံ ဘဏ္ဍာရေးအေဂျင်စီမှ Chief Executive of Capital Market Supervisor Mr. Inarno Djajadi နှင့် အာရှဖွံ့ဖြိုးရေးဘဏ် အရှေ့ တောင်အာရှဌာန၏ ဘဏ္ဍာရေး အကြီးတန်းညွှန်ကြားရေးမှူး(Senior Director Finance) Ms. Christine Engstrom တို့က အဖွင့်အမှာစကားများ ပြောကြားခဲ့ကြသည်။ အဆိုပါနှီးနှောဖလှယ်ပွဲ တွင် ASEAN Taxonomy Version 2 ဆိုင်ရာကိစ္စရပ်များ၊ ကာဗွန်စျေးကွက် ဖွံ့ဖြိုးတိုးတက်မှု အခြေအနေများ၊ ကာဗွန်နည်းသောစီးပွားရေးစနစ်သို့အသွင်ကူးပြောင်းရာတွင် ကာဗွန်လျှော့ချ မှုနှင့်စပ်လျဉ်းသည့် ထုတ်ဖော်မှုဆိုင်ရာအခြေခံမူများ၏ အရေးပါမှုများ၊ ASEAN Transition Finance Guidelines ဖွံ့ဖြိုးတိုးတက်ရေးကိုအခြေခံသည့် လေ့လာမှု၏ရလဒ်များ၊ IFRS Sustainability Disclosure Standards ဆိုင်ရာအသိပညာများ မြှင့်တင်ရန်နှင့် ISSB  စံချိန်စံညွှန်း များ၊  ISSB စံနှုန်းများကို အကောင်အထည်ဖော်ရေးအတွက် ဆက်လက်ဆောင်ရွက်မည့် အလား အလာများ၊ ASEAN Corporate Governance Scorecard (ACGS) ဆိုင်ရာကိစ္စရပ်များကို စကားဝိုင်းဆွေးနွေးပွဲအစီအစဉ်များဖြင့် ဆွေးနွေးခဲ့ကြပြီး အာဆီယံအဖွဲ့ဝင်နိုင်ငံများ၏ ငွေချေး သက်သေခံလက်မှတ်လုပ်ငန်းကော်မရှင်ဥက္ကဋ္ဌများပါဝင်သော စကားဝိုင်းဆွေးနွေးပွဲကို နောက် ဆုံးအစီအစဉ်တွင် ကျင်းပပြုလုပ်ခဲ့ရာ ဒုတိယဝန်ကြီးက မြန်မာနိုင်ငံ၏ အရင်းအနှီးဈေးကွက် ဖွံ့ဖြိုးတိုးတက်မှုအခြေအနေများနှင့် ဆက်လက်ဆောင်ရွက်မည့်အခြေအနေများကို ရှင်းလင်း ဆွေးနွေးခဲ့သည်။
အောက်တိုဘာ ၁၈ ရက်တွင်ကျင်းပသည့် နိုင်ငံတကာဘဏ္ဍာရေးအစီရင်ခံခြင်းဆိုင်ရာ စံများစဉ်ဆက်မပြတ်ဖွင့်ဟထုတ်ဖော်ရေးနည်းပညာဆိုင်ရာ အလုပ်ရုံဆွေးနွေးပွဲကိုကျင်းပရာ မြန်မာ နိုင်ငံ ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင်၊ ရန်ကုန်စတော့အိတ်ချိန်းနှင့် စာရင်းဝင်ကုမ္ပဏီများမှ ကိုယ်စားလှယ်များ ပါဝင်တက်ရောက်ခဲ့သည်။ 
ယခုဖိုရမ်တွင်ညှိနှိုင်းဆွေးနွေးခဲ့ကြသည့်လုပ်ငန်းများကို အင်ဒိုနီးရှားနိုင်ငံတွင် ကျင်းပ ပြုလုပ်မည့် အာဆီယံဘဏ္ဍာရေးဝန်ကြီးများ အစည်းအဝေးသို့ ဆက်လက်တင်ပြမည်ဖြစ် ကြောင်းနှင့် အာဆီယံအရင်းအနှီးဈေးကွက်များဖိုရမ်သည် ဒေသတွင်း အရင်းအနှီးဈေးကွက်များ ဖွံ့ဖြိုးတိုးတက်လာရေးအတွက် အာဆီယံနိုင်ငံများမှ အရင်းအနှီးဈေးကွက် စည်းမျဉ်းစည်းကမ်း ထိန်းကျောင်းသူများ (Regulators) ၏ တစ်နှစ်လျှင် (၂) ကြိမ်ကျင်းပပြုလုပ်သည့် အဆင့်မြင့် ဆွေးနွေးပွဲတစ်ခုဖြစ်ကြောင်း သတင်းရရှိသည်။
သတင်းစဉ်