ပြည်သူ့ဘဏ္ဍာရေးစီမံခန့်ခွဲမှုသင်တန်းကျောင်း (PFM Academy) နှင့် မြန်မာဖွံ့ဖြိုးမှု အဖွဲ့အစည်း (MDI) တို့ ပူးပေါင်း၍ Policy Analysis သင်တန်းကို ၂၀၂၀ ပြည့်နှစ် ၊ ဇူလိုင်လ ၂၇ ရက်နေ့မှ သြဂုတ်လ ၄ ရက်နေ့အထိ (၅) ရက်တာသင်တန်းအား  စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ ရသုံးမှန်းခြေငွေစာရင်းဦးစီးဌာန၊ ပြည်သူ့ဘဏ္ဍာရေးစီမံခန့်ခွဲမှုသင်တန်း ကျောင်း၌ ပို့ချသင်ကြားမည်ဖြစ်၍ သင်တန်းပထမရက်နေ့ ၂၇-၇-၂၀၂၀ ရက်နေ့တွင် ရသုံး မှန်းခြေငွေစာရင်းဦးစီးဌာန ၊ ဒုတိယညွှန်ကြားရေးမှူးချုပ်  ဒေါ်သိင်္ဂီဦးမှလည်းကောင်း၊ သင်တန်း ပို့ချမည့် ဆရာမဒေါ်ခင်မမမျိုး၊ ညွှန်ကြားရေးမှူး၊ မြန်မာဖွံ့ဖြိုးမှုအဖွဲ့အစည်း (MDI) မှ လည်း ကောင်း သင်တန်းတက်ရောက်လာသူများအား သင်တန်းဖွင့်လှစ်ရခြင်း၏ ရည်ရွယ်ချက် နှင့် အဖွင့်အမှာစကားများအား ပြောကြားခဲ့ပြီး သင်တန်းအား နေ့လည် ၁၃:၃၀ နာရီတွင် စတင် ပို့ချခဲ့ပါသည်။

     အဆိုပါ Policy Analysis သင်တန်းသို့ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ ပြည်ထောင်စုဝန်ကြီးရုံး၊ စီမံကိန်းရေးဆွဲရေးဦးစီးဌာန၊ စီမံကိန်းစိစစ်ရေးနှင့် တိုးတက်မှု အစီရင်ခံရေးဦးစီးဌာန၊ ရသုံးမှန်းခြေငွေစာရင်းဦးစီးဌာန၊ ငွေတိုက်ဦးစီးဌာနတို့မှ သင်တန်းသား၊ သင်တန်းသူ အရာထမ်း (၂၀) ဦး တက်ရောက်ခဲ့ကြပါသည်။ အဆိုပါ သင်တန်းတွင် (၁) မူဝါဒ ဆိုင်ရာစက်ဝန်း၊ မူဝါဒဆိုင်ရာ လုပ်ငန်းစဉ် နှင့် မူဝါဒဆိုင်ရာ စိစစ်သုံးသပ်မှုများ၊ (၂) မူဝါဒ ဆိုင်ရာပြဿနာများအား ဖော်ထုတ်ခြင်း နှင့် အကဲဖြတ်စံနှုန်းများအား တိုးတက်အောင် ပြုလုပ်ခြင်း၊ (၃) မူဝါဒဆိုင်ရာ ရွေးချယ်နိုင်သည့် နည်းလမ်း နှင့် ရွေးချယ်ထားသော မူဝါဒများ ကို အကဲဖြတ်ခြင်းများအား သတ်မှတ်ခြင်း၊ (၄) မူဝါဒဆိုင်ရာရွေးချယ်နိုင်သည့် နည်းလမ်းများ နှင့် မူဝါဒအကောင်အထည်ဖော်ခြင်းများကို ဖော်ထုတ်ခြင်းနှင့် (၅) မူဝါဒခွဲခြမ်းစိတ်ဖြာခြင်း ဆိုင်ရာ Case Study များနှင့် မူဝါဒခွဲခြမ်းစိတ်ဖြာခြင်းဆိုင်ရာ သက်သေအထောက်အထားများ ကို သင်ကြားပို့ချသွားမည်ဖြစ်ပြီး သင်တန်းကာလမှာ ၂၇-၇-၂၀၂၀ ရက်နေ့ မှ ၄-၈-၂၀၂၀ ရက်နေ့အထိ တစ်ရက်လျှင် (၄) နာရီနှုန်းဖြင့် စုစုပေါင်း (၅) ရက်ကြာ သင်ကြားပို့ချမည် ဖြစ်ပါသည်။ နိုင်ငံ့ဝန်ထမ်းများအနေဖြင့် အဆိုပါသင်တန်းမှ နိုင်ငံတစ်နိုင်ငံ၏ လူမှုရေး၊ စီးပွားရေးနှင့် နိုင်ငံရေးအခြေအနေများ၏ ပြောင်းလဲမှုအခြေအနေကို ဆန်းစစ်တတ်စေရန်နှင့် ပြောင်းလဲနေသည့် လူ့အဖွဲ့အစည်း၏ လိုအပ်ချက်များကို ဖြည့်ဆည်းနိုင်ရန်အတွက် ဆောင်ရွက်ရန် လိုအပ်သည့် မူဝါဒအခြေအနေများကို နားလည်စေမည်ဖြစ်ပြီး Decision Maker များ၏ မူဝါဒဆိုင်ရာဆုံးဖြတ်ချက်များ ချမှတ်ရာတွင် ကျိုးကြောင်းသင့်လျော်ပြီး ဖြစ်နိုင်ချေရှိသော ဆုံးဖြတ်ချက်များ ချမှတ်နိုင်ရန်အတွက် အထောက်အပံ့ပေးနိုင်စေရန် ရည်ရွယ်၍ ဖွင့်လှစ်ကြောင်း သိရှိရပါသည်။