မြန်မာနိုင်ငံ ပြည်သူ့ဘဏ္ဍာရေးစီမံခန့်ခွဲမှု ခေတ်မီဖွံ့ဖြိုးတိုးတက်ရေး စီမံကိန်းအောက်တွင် PFM Academy သင်တန်းကျောင်း တည်ထောင်ရေးဆိုင်ရာ Curriculum သင်ရိုးညွှန်းတမ်း ရေးဆွဲခြင်းနှင့် Training packages များပြင်ဆင်ခြင်းတို့နှင့်စပ်လျဉ်း၍ ၂၇-၈-၂၀၁၈ ရက်နေ့တွင် စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီးဦးမောင်မောင်ဝင်း ဦးဆောင်သော PFM Academy ဦးဆောင်စိစစ်ရေးဘုတ်အဖွဲ့နှင့် ရသုံးမှန်းခြေငွေစာရင်းဦးစီးဌာန ဒုတိယညွှန်ကြားရေးမှူးချုပ် ဒေါ်ရီရီမြင့်ဦးဆောင်သည့် စီမံကိန်း၏ စွမ်းဆောင်ရည် ဖွံ့ဖြိုးတိုးတက်ရေးကော်မတီ (Skill Development Committee) အဖွဲ့ဝင်များသည် Firm ACCA နှင့် တွေ့ဆုံဆွေးနွေးခဲ့ ကြပါသည်။ထို့နောက် Firm ACCA သည် ၂၇-၈-၂၀၁၈ ရက်နေ့မှ ၃၁-၈-၂၀၁၈ ရက်နေ့အတွင်း ပြည်ထောင်စုလွှတ်တော်၊ ပြည်သူ့ငွေစာရင်းပူးပေါင်းကော်မတီ၊ ပြည်ထောင်စုစာရင်းစစ်ချုပ်ရုံး၊ ပြည်တွင်းအခွန်များဦးစီးဌာန၊ ရသုံးမှန်းခြေငွေစာရင်းဦးစီးဌာန၊ စီမံကိန်းရေးဆွဲရေးဦးစီးဌာန၊ စီမံကိန်းစိစစ်ရေးနှင့် တိုးတက်မှုအစီရင်ခံရေးဦးစီးဌာန၊ ငွေတိုက်ဦးစီးဌာနနှင့် မြန်မာ့စီးပွားရေး ဘဏ်တို့နှင့် သီးခြားစီတွေ့ဆုံ၍လည်းကောင်း၊ ဆောင်ရွက်မှုအဆင့် Level တူအလိုက် ပေါင်းစု တွေ့ဆုံခြင်းဖြင့်လည်းကောင်း၊ ဌာနဆိုင်ရာဝန်ထမ်းများ၏ လိုအပ်ချက်များ၊ လက်ရှိသင်တန်းများ ပေးလျက်ရှိသည့် အခြေအနေများ၊ ဌာနအဖွဲ့အစည်းများမှ ရယူလိုသည့် သင်ရိုးညွှန်းတမ်းပုံစံ၊ သင်ကြားနည်းစနစ်၊ အရည်အချင်းစစ်ဆေးမှုပုံစံ၊ ပါဝင်စေလိုသည့် Contents များ၊ Modules များ တို့အပေါ် ဆွေးနွေးမှုများ ပြုလုပ်ခဲ့ပါသည်။