ပြင်သစ်ဖွံ့ဖြိုးတိုးတက်ရေးအေဂျင်စီ (French Development Agency-AFD) နှင့် ရန်ကုန် တိုင်းဒေသကြီးအစိုးရအဖွဲ့တို့ ပူးပေါင်းဆောင်ရွက်မည့် Transport, Waterfront and Heritage Urban Project (TWHUP) စီမံချက် အကောင်အထည်ဖော် ဆောင်ရွက်နိုင်ရေးနှင့်စပ်လျဉ်းသည့် ညှိနှိုင်းအစည်းအဝေးကို စီမံကိန်းနှင့် ဘဏ္ဍာရေးဝန်ကြီးဌာန၊ နိုင်ငံခြားစီးပွား ဆက်သွယ်ရေးဦးစီး ဌာန၊ ညွှန်ကြားရေးမှူးချုပ် ဦးထွန်းထွန်းနိုင်နှင့် မြန်မာနိုင်ငံဆိုင်ရာ ပြင်သစ်သံအမတ်ကြီးH.E. Mr. Olivier Richard တို့ ဦးဆောင်၍ ၉-၂-၂၀၁၈ ရက်နေ့၊ နေ့လယ် ၁၃း၀၀ နာရီမှ ၁၆း၀၀ နာရီအထိ စီမံကိန်းနှင့် ဘဏ္ဍာရေးဝန်ကြီးဌာန၊ ရုံးအမှတ်(၁)၌ ကျင်းပ ပြုလုပ်ခဲ့ပါသည်။

အဆိုပါညှိနှိုင်းအစည်းအဝေးသို့ ရန်ကုန်မြို့ရှိ AFD ရုံးမှ Head of Office ဖြစ်သူMr. Ghislain Reib နှင့် ပြင်သစ်နိုင်ငံ၊ AFD ရုံးချုပ်မှ ကိုယ်စားလှယ်များ၊ ရန်ကုန်တိုင်းဒေသကြီး အစိုးရအဖွဲ့ရုံး၊ ရန်ကုန်မြို့တော်စည်ပင်သာယာရေးကော်မတီ၊ ပို့‌ဆောင်ရေးနှင့် ဆက်သွယ်ရေး ဝန်ကြီးဌာန၊ သာသနာရေးနှင့် ယဉ်ကျေးမှု ဝန်ကြီးဌာနနှင့် ငွေတိုက်ဦးစီးဌာနတို့မှ ကိုယ်စားလှယ်များ စုစုပေါင်း ၁၅ ဦးခန့် တက်ရောက်ခဲ့ပြီး TWHUP စီမံချက်တွင် ထည့်သွင်းဆောင်ရွက်မည့် လုပ်ငန်း များ၊ စီမံချက် ခွင့်ပြုချက်ရရှိရေး လုပ်ငန်းစဉ်များနှင့် အချိန်ကာလ၊ စီမံချက် အကောင်အထည်ဖော် ဆောင်ရွက်နိုင်ရေးအတွက် ရှေ့ဆက်လက်ဆောင်ရွက်မည့် လုပ်ငန်း စဉ်များနှင့်စပ်လျဉ်း၍ ရင်းနှီး ပွင့်လင်းစွာ ဆွေးနွေးခဲ့ပါသည်။