စီမံကိန်း၊ ဘဏ္ဍာရေးနှင့်စက်မှုဝန်ကြီးဌာန၊ အုပ်ချုပ်မှုနှင့်ဖွံ့ဖြိုးမှုပညာဘွဲ့လွန်သင်တန်းဌာန (GSAD)နှင့် မိတ္ထီလာ စီးပွားရေးတက္ကသိုလ်တို့ ပူးပေါင်းဖွင့်လှစ်သော ပြည်သူ့ရေးရာစီမံခန့်ခွဲမှုပညာ ဘွဲ့လွန် ဒီပလိုမာ (Postgraduate Diploma in Public Policy and Administration)နှင့် စာရင်းအင်းပညာ ဘွဲ့လွန်ဒီပလိုမာ (Postgraduate Diploma in Statistics) သင်တန်း ဖွင့်ပွဲအခမ်းအနားကို ယနေ့နံနက် ၀၉:၀၀ နာရီတွင် နေပြည်တော်ရှိ အမျိုးသားမှတ်တမ်းများ မော်ကွန်းတိုက်ဦးစီးဌာန၌ ကျင်းပခဲ့ပါသည်။

အခမ်းအနားသို့ စီမံကိန်း၊ ဘဏ္ဍာရေးနှင့်စက်မှုဝန်ကြီးဌာန ပြည်ထောင်စုဝန်ကြီးဦးစိုးဝင်း၊ ဒုတိယ ဝန်ကြီးများနှင့် ပညာရေးဝန်ကြီးဌာနမှ ဒုတိယဝန်ကြီး၊ အမြဲတမ်းအတွင်းဝန်များ၊ ညွှန်ကြားရေးမှူးချုပ်များ၊ မိတ္ထီလာစီးပွားရေး တက္ကသိုလ်မှ ပါမောက္ခချုပ်၊ ဒုတိယပါမောက္ခချုပ်နှင့် ဌာနမှူးများ၊ ပို့ချဆရာ/ ဆရာမများ၊ ပြည်သူ့ရေးရာစီမံခန့်ခွဲမှုပညာ ဘွဲ့လွန်ဒီပလိုမာနှင့် စာရင်းအင်းပညာဘွဲ့လွန်ဒီပလိုမာ သင်တန်းသား၊ သင်တန်းသူများ တက်ရောက်ခဲ့ ကြသည်။

အခမ်းအနားတွင် ပြည်ထောင်စုဝန်ကြီးက ယနေ့ဖွင့်လှစ်တဲ့ သင်တန်းကတော့ အုပ်ချုပ်မှုနှင့် ဖွံ့ဖြိုးမှုပညာ ဘွဲ့လွန်သင်တန်းဌာနကနေ ဝန်ထမ်းများ၏ စွမ်းဆောင်ရည် မြင့်မား ရန်နှင့် လူ့စွမ်းအား အရင်းအမြစ်ဖွံ့ဖြိုးတိုးတက်စေရန်အတွက် ရည်ရွယ်၍ပြည့်သူ့ရေးရာမူဝါဒနှင့် အုပ်ချုပ်မှုပညာဘွဲ့လွန် ဒီပလိုမာ (PG Dip in PPA)နှင့် စာရင်းအင်းပညာဘွဲ့လွန်ဒီပလိုမာ (PG Dip in Stats) သင်တန်း၊ အမှတ်စဉ်(၄) ဖြစ်ပါတယ်။ Diploma သင်တန်းများအား ပညာရေးဝန်ကြီးဌာန၊ မိတ္ထီလာ စီးပွားရေး တက္ကသိုလ်နှင့် ပူးပေါင်းပြီး ပညာရေးဝန်ကြီးဌာနမှ အသိအမှတ်ပြုသည့် ဘွဲ့လွန်ဒီပလိုမာ လက်မှတ်များ ပေးအပ်သည့် Accreditation ရရှိအောင် ဆောင်ရွက်ထားပြီး ဖြစ်ပါတယ်။ ထို့ပြင် Courses/Syllabus များကိုလည်း Board of Study တင်ပြီး စနစ်တကျရေးဆွဲ ပြဌာန်းထားပြီး ဖြစ်ပါတယ်။  နိုင်ငံတော်ဖွံ့ဖြိုးတိုးတက်ဖို့ဆောင်ရွက်တဲ့နေရာမှာ ဝန်ထမ်းအလွှာစုံရဲ့ အရည်အချင်းနှင့် အရည်အသွေးတွေကို ထိထိရောက်ရောက် မြှင့်တင်ပေးနိုင်ရန် ဖွင့်လှစ်ခဲ့ခြင်း ဖြစ်ပါတယ်။ ယခင်ကသင်တန်း (၃)ခု ဖွင့်လှစ်ခဲ့ပြီး ဘွဲ့လွန်ဒီပလိုမာ လက်မှတ်ရရှိပြီးသူ (၄၃၄) ဦး မွေးထုတ် ပေးခဲ့ပြီး ဖြစ်ပါတယ်။ သင်တန်းကို အမှုထမ်း အဆင့်ကနေ ညွှန်ကြားရေးမှူးချုပ် ထိ တက်ရောက် ကြပါတယ်။

ယခုသင်တန်းအမှတ်စဉ် (၄)တွင် ဝန်ထမ်းများ၏စွမ်းဆောင်ရည်မြှင့်မားဖို့ ပြည်သူ့ရေးရာမူဝါဒနှင့် အုပ်ချုပ်မှုပညာဘွဲ့လွန် ဒီပလိုမာ (PG Dip in PPA) သင်တန်းမှာ သင်တန်းသား/သူ (၆၈)ဦးနှင့် စာရင်းအင်း ပညာဘွဲ့လွန်ဒီပလိုမာ (PG Dip in Stats) သင်တန်းမှာ သင်တန်းသား/ သူ (၆၈)ဦး ၊ စုစုပေါင်း (၁၃၆)ဦး၊ တက်ရောက်ခွင့် ရရှိကြပြီး သင်တန်းကာလမှာ (၁)နှစ် ကြာမြင့်မှာဖြစ်ပါတယ်။ သင်တန်း ဖွင့်လှစ်ရန်အတွက် နိုင်ငံပိုင်သတင်းစာ များမှ ထည့်သွင်းဖော်ပြခဲ့ရာ ပုဂ္ဂလိက ပြည်သူများ အနေဖြင့် စိတ်ဝင်စားကြောင်း၊ တက်ခွင့်ရပါက တက်လိုပါကြောင်း ဆက်သွယ်လာကြကြောင်း သိရှိရပါတယ်။

ယခုလို ဘွဲ့လွန်ဒီပလိုမာသင်တန်းတွေ အောင်အောင်မြင်မြင် ဖွင့်လှစ်နိုင်ရန် အုပ်ချုပ်မှုနှင့် ဖွံ့ဖြိုးမှုပညာ ဘွဲ့လွန်သင်တန်းဌာနနှင့် အတူပူးပေါင်း ဆောင်ရွက်ပေးတဲ့ မိတ္ထီလာ စီးပွားရေး တက္ကသိုလ်၊ စာရင်းအင်းပညာ ဘွဲ့လွန်ဒီပလိုမာကို ဖွင့်လှစ်နိုင်ဖို့ ကြီးကြပ်ပေးတဲ့ ဗဟိုစာရင်းအင်းအဖွဲ့နှင့် ဝန်ကြီးဌာန အသီးသီးက ပံ့ပိုးကူညီ သင်ကြားပေးကြတဲ့ ဆရာ/ ဆရာမများကိုလည်း ကျေးဇူးတင်ရှိပါတယ်။

လက်ရှိဖွင့်လှစ်တဲ့သင်တန်းတွေက ရုံးချိန်ပြင်ပ သင်တန်းတွေအဖြစ် ဖွင့်လှစ်ပေးထားထာ ဖြစ်သောကြောင့် ဒီသင်တန်း တက်ရောက်ရခြင်းဖြင့် နေပြည်တော်မှာရှိတဲ့ ဌာနဆိုင်ရာ အသီးသီးက ဝန်ထမ်းများအတွက် လွယ်ကူစွာ ပညာဆက်လက် သင်ကြားနိုင်ခြင်း၊ လုပ်ငန်းခွင် မပျက် တနင်္လာမ ှသောကြာနေ့များတွင် ရုံးချိန်ပြင်ပတွင် သင်ကြား နိုင်ခြင်း၊ ဝန်ထမ်းများအနေဖြင့် စာတွေ့၊ လက်တွေ့ကို အခြေခံထားသဖြင့် သင်တန်းမှအတွေ့အကြုံများ၊ တတ်ကျွမ်းမှုများသည် ပြည်သူ့ရေးရာမူဝါဒနှင့် အုပ်ချုပ်မှုဆိုင်ရာ ကိစ္စရပ်များ၊ စာရင်းအင်းဆိုင်ရာ ကိစ္စရပ်များတွင် များစွာ အထောက်အကူ ပြုနိုင်မှာ ဖြစ်ပါတယ်။ လက်တွေ့ အသုံးချနိုင်မှုကို အလေးထားပြီး ဖွင့်လှစ်ပေးရခြင်း ဖြစ်တယ်။ ကမ္ဘာမှာပြောင်းလဲတိုးတက်မှု ဖြစ်ပေါ်နေတဲ့အုပ်ချုပ်မှုကိစ္စရပ်တွေ၊ ဖွံ့ဖြိုးမှုလုပ်ငန်း စီမံခန့်ခွဲမှုသီအိုရီတွေကို ခေတ်နှင့်အညီ လေ့လာပြီး မိမိတို့နိုင်ငံအတွက် အကောင်းဆုံး ဖြစ်အောင် လက်တွေ့ အသုံးချနိုင်မည်လို့ ယုံကြည်ပါကြောင်းပြောကြားလိုပါတယ်။

သင်တန်းများတွင် နိုင်ငံ့ဝန်ထမ်းများ၏ စွမ်းဆောင်ရည် မြှင့်တင်ပေးရန်၊ ပြည်သူ့ရေးရာ မူဝါဒများချမှတ်နိုင်ရေးအတွက် သဘောတရားများကို သင်ကြားပေးရန်နှင့် လေ့ကျင့်ပေးရန်၊ စာရင်း ဇယား အချက်အလက်များ တိကျမှန်ကန်စွာရရှိနိုင်ရန်၊ နိုင်ငံတော်၏ အုပ်ချုပ်မှုယန္တရား ကောင်းမွန် စေရန်အတွက် တာဝန်ယူ ဆောင်ရွက်မည့် အရည်အသွေးပြည့်ဝသည့် နိုင်ငံ့ဝန်ထမ်း ခေါင်းဆောင် ကောင်းများ မွေးထုတ်ပေးရန်နှင့် လေ့ကျင့်ပျိုးထောင်ပေးရန်အတွက် စာတွေ့ လက်တွေ့ ကွင်းဆင်း လေ့လာခြင်း၊ စာတမ်းများ တင်သွင်းခြင်းများဖြင့် သင်ကြားပို့ချ ပေးသွားမည် ဖြစ်ပါကြောင်း ပြောကြားခဲ့ပါသည်။