နေပြည်တော်၊ အောက်တိုဘာ (၃၀)ရက်

          စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့နှင့် ကုလသမဂ္ဂဖွံ့ဖြိုးမှုအစီအစဉ် (UNDP)တို့ပူးပေါင်း၍ မြန်မာနိုင်ငံ၏ စဉ်ဆက်မပြတ် ဖွံ့ဖြိုးမှုပန်းတိုင်ဆိုင်ရာအခြေခံနှစ် ညွှန်ကိန်း အစီရင်ခံစာ (SDGs Indicator Baseline Report for Myanmar)  မိတ်ဆက်ပွဲနှင့် စဉ်ဆက်မပြတ် ဖွံ့ဖြိုးမှုပန်းတိုင်ဆိုင်ရာ အသိပညာမြှင့်တင်မှု အလုပ်ရုံဆွေးနွေးပွဲ ဖွင့်ပွဲအခမ်းအနား ကိုနေပြည်တော်ရှိ သင်္ဂဟဟိုတယ်၌ အောက်တိုဘာလ (၃၀)ရက်နေ့၊ နံနက် (၉:၀၀) နာရီတွင် ကျင်းပရာကျန်းမာရေးနှင့် အားကစားဝန်ကြီးဌာန၊ ပြည်ထောင်စုဝန်ကြီး ဒေါက်တာမြင့်ထွေး တက်ရောက် အမှာစကားပြောကြားပါသည်။

အဆိုပါအစည်းအဝေးကို စီမံကိန်းနှင့်ဘဏ္ဍာရေးဝန်ကြီးဌာန ပြည်ထောင်စုဝန်ကြီးကိုယ်စား၊ အမြဲတမ်းအတွင်းဝန် ဦးထွန်းထွန်းနိုင်၊ ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်၊ ကုလသမဂ္ဂဖွံ့ဖြိုးမှုအစီအစဉ် (UNDP) မှ Country Director  Mr. Peter Batchelor နှင့် သက်ဆိုင်ရာဦးစီးဌာနများမှ ညွှန်ကြားရေးမှူးချုပ်များ၊ လက်ထောက်အတွင်းဝန် များ၊ ညွှန်ကြားရေးမှူးများ သက်ဆိုင်ရာကဏ္ဍအသီးသီးမှ ကျွမ်းကျင်ပညာရှင်များ၊ ဖွံ့ဖြိုးမှု မိတ်ဖက်များနှင့် တာဝန်ရှိသူများစုစုပေါင်း(၂၅၀) ဦးခန့် တက်ရောက်ခဲ့ပြီး အမြဲတမ်းအတွင်းဝန် ဦးထွန်းထွန်းနိုင်နှင့် ကုလသမဂ္ဂဖွံ့ဖြိုးမှု အစီအစဉ် (UNDP) မှ Country Director  Mr. Peter Batchelor ကျေးဇူးတင်စကား ပြောကြားခဲ့ပါသည်။

          ထို့နောက် မွန်းလွဲ(၁၂:၃၀)နာရီတွင် အခမ်းအနားကို ဆက်လက်ကျင်းပရာ ဗဟိုစာရင်းအင်းအဖွဲ့ ညွှန်ကြားရေးမှူးချုပ်၊ ဒေါက်တာဝါဝါမောင်က သဘာပတိအဖြစ် ဆောင်ရွက်၍ ဒုတိယ ညွှန်ကြားရေးမှူးချုပ် ဒေါ်ခင်မာအေး၊ စီမံကိန်းရေးဆွဲရေးဦးစီးဌာန၊ ရသုံးမှန်းခြေငွေစာရင်း ဦးစီးဌာနနှင့် (UNDP)တို့မှ ကိုယ်စားလှယ်များက စဉ်ဆက်မပြတ် ဖွံ့ဖြိုးမှုပန်းတိုင်ဆိုင်ရာ အချက်အလက်များ အသုံးဝင်ပုံနှင့် အခြားနိုင်ငံများမှ အတွေ့အကြုံများကို ဆွေးနွေးတင်ပြရာ တက်ရောက်လာသူများမှ သိရှိမေးမြန်းလိုသည်များအား ပြန်လည် ဆွေးနွေးခဲ့ကြပါသည်။

(သတင်းစဉ်)