၂၀၁၈ ခုနှစ်၊ စက်တင်ဘာလ(၂)ရက်နေ့မှ (၃) ရက်နေ့အထိ

          ဗဟိုစာရင်းအင်းအဖွဲ့မှ  စာရင်းအင်းဆိုင်ရာ အသိပညာပေးသင်တန်းများကို ၂၀၁၈ခုနှစ်၊ စက်တင်ဘာလ(၂)ရက်နေ့တွင် ကယားပြည်နယ်၊ ပညာရေးမှူးရုံးတွင် လည်းကောင်း၊ စက်တင်ဘာလ(၃)ရက်နေ့တွင် ကယားပြည်နယ်၊ လွိုင်ကော်မြို့၊ စုပေါင်းရုံး အစည်းအဝေး ခန်းမတွင်  လည်းကောင်း ဖွင့်လှစ်ပို့ချခဲ့ပါသည်။  

          ကယားပြည်နယ်၊ ပညာရေးမှူးရုံး အစည်းအဝေးခန်းမတွင် သင်ကြားပို့ချခဲ့သော စာရင်းအင်းဆိုင်ရာအသိပညာပေးသင်တန်းတွင် ကယားပြည်နယ်၊ စီမံကိန်းနှင့်ဘဏ္ဍာရေး ဝန်ကြီး ဦးမော်မော် နှင့် ဗဟိုစာရင်းအင်းအဖွဲ့၊ ဒုတိယညွှန်ကြားရေးမှူးချုပ် ဦးသန်းဇော် တို့မှ အဖွင့်အမှာစကား ပြောကြားခဲ့ပါသည်။ သင်တန်းသို့ ကယားပြည်နယ်အတွင်းရှိ မြို့နယ် ပညာရေးမှူးများ၊ ပညာရေးစာရင်းအင်းလက်တွေ့ဆောင်ရွက်နေသူများနှင့် ကယား ပြည်နယ် ဗဟိုစာရင်းအင်းအဖွဲ့မှ ပြည်နယ်တာဝန်ခံ၊ ဒုတိယညွှန်ကြားရေးမှူး ဦးမောင်သင်နှင့် အရာထမ်း၊ အမှုထမ်းများ၊ စုစုပေါင်း(၃၂)ဦးခန့် တက်ရောက်ခဲ့ကြပါသည်။

          ကယားပြည်နယ်၊ လွိုင်ကော်မြို့၊ စုပေါင်းရုံး အစည်းအဝေးခန်းမတွင်  သင်ကြား ပို့ချခဲ့သော စာရင်းအင်းဆိုင်ရာ အသိပညာပေးသင်တန်းတွင် ဗဟိုစာရင်းအင်းအဖွဲ့၊ ဒုတိယ ညွှန်ကြားရေးမှူးချုပ် ဦးသန်းဇော် မှ အဖွင့်အမှာစကား ပြောကြားခဲ့ပါသည်။ သင်တန်းသို့  ကယားပြည်နယ်အတွင်းရှိ မြို့နယ်အုပ်ချုပ်ရေးမှူးများ၊ ကယားပြည်နယ်၊ ဗဟိုစာရင်း အင်းအဖွဲ့မှ  ပြည်နယ်တာဝန်ခံ၊ ဒုတိယညွှန်ကြားရေးမှူး ဦးမောင်သင်နှင့်  အရာထမ်း၊ အမှုထမ်းများ စုစုပေါင်း (၃၃) ဦးခန့် တက်ရောက်ခဲ့ပါသည်။

           အဆိုပါ သင်တန်းသည် နိုင်ငံတော်ဖွံ့ဖြိုးတိုးတက်ရေးအတွက် စာရင်းအင်း အချက်အလက်မှန်ကန်ရေးနှင့် အရည်အသွေးပြည့်ဝရေးလုပ်ငန်းများနှင့် အမျိုးသားစာရင်း အင်းစနစ် အရေးပါပုံအား သိရှိနားလည်စေရန်၊  စာရင်းအင်းဥပဒေသစ်ကို ပြည်နယ်နှင့် တိုင်းဒေသကြီးများရှိ စာရင်းအင်းလုပ်ငန်းများ တာဝန်ယူဆောင်ရွက်နေသည့် ဌာနဆိုင်ရာများ၊ အဖွဲ့အစည်းများအကြား ရှင်းလင်းစွာ သိရှိနိုင်စေရန်၊ ဌာနဆိုင်ရာများအနေဖြင့် SDGs ညွှန်ကိန်းများအကြောင်း သိရှိနိုင်စေရန်၊ SDGs ပန်းတိုင်များနှင့် နိုင်ငံတော်၏ စီးပွားရေး မူဝါဒများ ချိတ်ဆက်ဆောင်ရွက်နေမှုများအား သိရှိစေရန်၊ ဗဟိုစာရင်းအင်းအဖွဲ့၏ စာရင်းအင်းစနစ်သည် Decentralized စနစ်ဖြစ်၍ သက်ဆိုင်ရာဝန်ကြီးဌာနများ၏ စာရင်းအင်းများ၊ ပြည်နယ်နှင့် တိုင်းဒေသကြီး၏ မြို့နယ်စာရင်းအင်းများ၊ အခြေခံစာရင်းအင်း များ မှန်ကန်ရန်လိုအပ်ပါသဖြင့် အရည်အသွေးပြည့်ဝသည့် စာရင်းဇယားများ အချိန်နှင့် တစ်ပြေးညီ ရရှိနိုင်စေရန် ရည်ရွယ်၍ ကျင်းပခဲ့ခြင်း ဖြစ်ပါသည်။