Forum on Cascading the Outcomes of Meetings of the ASEAN Community Statistical System (ACSS) Committee and Other ASEAN Sectoral Bodies to Myanmar Statistics Society

စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့သည် အာဆီယံအသိုက်အဝန်း စာရင်း အင်းစနစ်ကော်မတီနှင့် အခြားအာဆီယံအဖွဲ့များ၏ အစည်းအဝေးရလဒ်များဆိုင်ရာ သတင်းအချက် အလက်များအား မြန်မာစာရင်းအင်းအသိုက်အဝန်းသို့ မျှဝေသည့်ဖိုရမ်ကို၂၀၁၈ခုနှစ်၊ ဖေဖော်ဝါရီလ ၇ရက်နေ့၊ နံနက်(၉း၀၀)နာရီတွင် နေပြည်တော်၊ မင်္ဂလာသီရိဟိုတယ်၌ ကျင်းပရာ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးဆက်အောင်မှ တက်ရောက်အဖွင့်အမှာ စကားပြော ကြားခဲ့ပါသည်။

ဒုတိယဝန်ကြီးမှ ပြောကြားရာတွင် ယနေ့ဖိုရမ်ကိုကျင်းပရခြင်း၏ အဓိကရည်ရွယ်ချက်မှာ အာဆီယံအသိုက်အဝန်း စာရင်းအင်းစနစ်ကော်မတီနှင့် အခြားအာဆီယံအဖွဲ့အစည်းများတွင် မြန်မာနိုင်ငံ၏ စာရင်းအင်းနယ်ပယ်ဆိုင်ရာ ပါဝင်ဆောင်ရွက်မှုများအား မျှဝေရန်နှင့်် စာရင်းအင်းဆိုင်ရာ ဖွံ့ဖြိုးမှုအခြေအနေများကို အသိပေးရန်ဖြစ်ပါကြောင်း၊ မြန်မာနိုင်ငံတွင် အမျိုးသားစာရင်းအင်းစနစ် ခိုင်မာအားကောင်းလာစေရန်သာမက အာဆီယံအသိုက်အဝန်း စာရင်းအင်းစနစ်နှင့်အညီ ဆောင်ရွက်နိုင်ရန်ရည်ရွယ်၍ စာရင်းအင်းဥပဒေအသစ်ကို ၂၀၁၈ခုနှစ်၊ ဇန်နဝါရီလ ၂၂ ရက်နေ့တွင် လွှတ်တော်မှ အတည်ပြုပြဌာန်းခဲ့ပြီးဖြစ်ပါကြောင်း၊ နိုင်ငံတော်အစိုးရသည် လူမှု-စီးပွားဖွံ့ဖြိုးတိုးတက်မှု၊ တရားမျှတမှု၊တန်းတူညီတူရှိမှုနှင့် သိသာထင်ရှားသည့် အခွင့်အလမ်းများကို ပံ့ပိုးပေးနိုင်ရန်အတွက်စီးပွားရေးမူဝါဒ (၁၂)ရပ်ကို ချမှတ်ခဲ့ပါကြောင်း၊ စီးပွားရေး၊ လူမှုရေး၊ ပတ်ဝန်းကျင်ထိန်းသိမ်းရေး၊ ငြိမ်းချမ်းရေး လုပ်ငန်းစဉ်များနှင့် ဖွံ့ဖြိုးမှုအစီအစဉ်များကို ပူးပေါင်းဆောင်ရွက်သွားရမည်ဖြစ်ပါကြောင်း၊ ကုလသမဂ္ဂ၏၂၀၃၀ဖွံ့ဖြိုးမှုအစီအစဉ်ဖြစ်သည့် စဉ်ဆက်မပြတ်ဖွံ့ဖြိုးမှု ပန်းတိုင်များကိုလည်း ၂၀၁၆ခုနှစ်မှစတင်၍ အကောင်အထည်ဖော်ဆောင်ရွက်လျက် ရှိရာငြိမ်းချမ်းရေးနှင့် ပူးပေါင်း ဆောင်ရွက်ရေးကို ဦးစားပေးဆောင်ရွက်လျက် ရှိပါကြောင်း၊ထို့အပြင် မြန်မာနိုင်ငံသည် အာဆီယံအဖွဲ့ဝင် နိုင်ငံတစ်နိုင်ငံသာမက မဲ​ခေါင်ဒေသတွင်း အဖွဲ့ဝင်နိုင်ငံလည်းဖြစ်ပါကြောင်း၊ လက်တွေ့ကျသည့် စီမံကိန်းများ၊ မူဝါဒများချမှတ် အကောင်အထည်ဖော်ရာတွင် ထိရောက်မှု ရှိစေရန်အတွက် စာရင်းအင်းအချက်အလက်များကို နားလည်သိရှိရန် လိုအပ်ပါကြောင်း၊ မိမိတို့ ရောက်ရှိနေသည့် တိုးတက်မှုအခြေအနေများကို သိရှိရန်အတွက် စောင့်ကြည့်လေ့လာခြင်းနှင့် အကဲဖြတ်ခြင်းကို ဆောင်ရွက်နိုင်ရန်လိုအပ်ပါကြောင်း၊ ထိုကဲ့သို့ စောင့်ကြည့်လေ့လာ အကဲဖြတ်နိုင်ရန်အတွက် စာရင်းအင်းအချက်အလက်များသည် အရေးကြီးပါကြောင်း၊ ဗဟိုစာရင်းအင်းအဖွဲ့အနေဖြင့် စဉ်ဆက်မပြတ်ဖွံ့ဖြိုးမှုပန်းတိုင်ဆိုင်ရာ အခြေခံနှစ်ညွှန်ကိန်း အစီရင်ခံစာကို ထုတ်ပြန်ပြီးဖြစ်ပါကြောင်း၊ စဉ်ဆက်မပြတ် ဖွံ့ဖြိုးမှုပန်းတိုင်များကို အကောင်အထည်ဖော်ဆောင်ရန်နှင့် စာရင်းအင်းဆိုင်ရာ ဖွံ့ဖြိုးတိုးတက်မှုအတွက် နိုင်ငံတွင်း သာမက အာဆီယံဒေသတွင်း အစီအစဉ်များနှင့်လည်း ကိုက်ညီအောင် အကြံပြုဆွေးနွေးကြရန် လိုအပ်ပါကြောင်း၊ အာဆီယံနိုင်ငံများ၏ အာဆီယံအသိုက်အဝန်းစာရင်းအင်းစနစ်မှ စာရင်းအင်း စနစ်များမျှဝေမှုကို ကျေးဇူးတင်ရှိပါကြောင်း၊ ဒေသတွင်းစာရင်းအင်းစနစ် ခိုင်မာအားကောင်း စေရန်အတွက် ပံ့ပိုးကူညီပေးကြသောအာဆီယံစာရင်းအင်းဌာန၊ ဥရောပ-အာဆီယံနှင့် ဖွံ့ဖြိုးမှု မိတ်ဖက်အဖွဲ့အစည်းများအားလုံးကိုလည်းကျေးဇူးတင်ရှိပါကြောင်းပြောကြားခဲ့ပါသည်။

ဆက်လက်၍ ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်မှ အမှာစကား ပြောကြားရာတွင် ယနေ့ဖိုရမ်ကျင်းပရခြင်းမှာ အာဆီယံအသိုက်အဝန်း စာရင်းအင်းစနစ် ကော်မတီ၏ အစည်းအဝေးမှ အာဆီယံအသိုက်အဝန်း စာရင်းအင်းစနစ်နှင့် ပတ်သက်သော ဆောင်ရွက်ချက် များနှင့်စပ်လျဉ်း၍ ထွက်ပေါ်လာသော ရလဒ်များအားမျှဝေရန်၊ အာဆီယံ အဖွဲ့ဝင်နိုင်ငံများ၏ အမျိုးသားစာရင်းအင်းစနစ် အကောင်အထည်ဖော်မှုနှင့်စပ်လျဉ်း၍ အတွေး အမြင်များ ဖလှယ်ရန်ဖြစ်ပါကြောင်း၊ မြန်မာနိုင်ငံသည် အာဆီယံအဖွဲ့ဝင်နိုင်ငံဖြစ်သည့်အတွက် အာဆီယံနှင့် ပတ်သက်သောကိစ္စရပ်များတွင် တက်ကြွစွာပါဝင်ဆောင်ရွက်လျှက် ရှိပါကြောင်း အာဆီယံအသိုက်အဝန်း စာရင်းအင်းစနစ်ကော်မတီမှ Data လျှို့ဝှက်ထိန်းသိမ်းခြင်း၊Data မျှဝေခြင်းစသည့် မူဝါဒများနှင့် လမ်းညွှန်ချက်များကို ချမှတ်လျှက်ရှိပါကြောင်း၊ မြန်မာနိုင်ငံ အနေဖြင့်လည်း အမျိုးသားစာရင်းအင်းစနစ်ကို မြင့်တင်နိုင်ရန်နှင့်် စာရင်းအင်းဆိုင်ရာ ဖွံ့ဖြိုး တိုးတက်မှု အမျိုးသားအဆင့်မဟာဗျူဟာ အကောင်အထည်ဖော်မှုအား ကြီးကြပ်ရန်အတွက် စာရင်းအင်းအချက် အလက်မှန်ကန်ရေးနှင့် အရည်အသွေးပြည့်ဝရေး ကော်မတီအား ဖွဲ့စည်း ဆောင်ရွက်လျှက်ရှိပါကြောင်း၊ သို့ဖြစ်ပါ၍ Stakeholder များကြားတွင် ပူးပေါင်းဆောင်ရွက် ခြင်းဖြင့် မိမိတို့လိုချင်သော ထင်သာမြင်သာရှိသည့် ရလဒ်များအားရရှိနိုင်မည် ဖြစ်ပါကြောင်း ပြောကြားခဲ့ပါသည်။

အာဆီယံအတွင်းရေးမှူးချုပ်ရုံး၏ စာရင်းအင်းဌာနမှ Senior Officer ၊ Mr. Puguh B Irawanမှ အမှာစကားပြောကြားရာတွင် ယနေ့ကျင်းပသောဖိုရမ်သည် အမျိုးသားစာရင်းအင်း စနစ်တွင် ပါဝင်ပတ်သက်သည့်သူများသို့ အာဆီယံအသိုက်အဝန်းစာရင်းအင်းစနစ်အစီအစဉ်မှ ထွက်ပေါ်လာသော ရလဒ်များကို မျှဝေပေးနိုင်မည့်အပြင် အာဆီယံအဖွဲ့အစည်း၏ အကြံပြုချက် များကိုလည်းကျယ်ကျယ်ပြန့်ပြန့် ပေးနိုင်မည်ဖြစ်ပါကြောင်း၊ အာဆီယံအသိုက်အဝန်း စာရင်းအင်းစနစ်၏ ပူးပေါင်းဆောင်ရွက်မှုအားဖြင့် (၅၀)ကြိမ်မြောက် အာဆီယံ နှစ်ပတ်လည် အခမ်းအနားကိုလည်း ကျင်းပနိုင်ခဲ့ကြောင်း၊ အာဆီယံအသိုက်အဝန်းစာရင်းအင်းစနစ်နှင့် အာဆီယံစာရင်းအင်းဌာနတို့သည် သက်ဆိုင်ရာ Stakeholderများနှင့်လည်းဒေသတွင်းနှင့် နိုင်ငံတွင်းတွင် ပိုမိုပူးပေါင်းဆောင်ရွက်မည်ဖြစ်ပါကြောင်း ပြောကြားခဲ့ပါသည်။

ဆက်လက်၍ အာဆီယံအသိုက်အဝန်းဆိုင်ရာ စာရင်းအင်းစနစ်၏ ဆယ်စုနှစ်နှစ်ခုအတွင်း ပူးပေါင်းဆောင်ရွက်မှုများ၊ နှစ်ပေါင်း(၅၀)အတွင်း အာဆီယံ၏ ဖွံ့ဖြိုးတိုးတက်မှု ပုံရိပ်များနှင့် မြန်မာနိုင်ငံ၏ စာရင်းအင်းဆိုင်ရာ ဖွံ့ဖြိုးတိုးတက်မှုများနှင့် စပ်လျဉ်းသည့် ဗီဒီယိုဖိုင်များကို ပြသပြီး စုပေါင်းမှတ်တမ်းဓါတ်ပုံများ ရိုက်ကူးကြပါသည်။

ထို့နောက် ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်မှ လက်ရှိ မြန်မာနိုင်ငံ၏ စာရင်းအင်းဆိုင်ရာ ဖွံ့ဖြိုးတိုးတက်မှုအခြေအနေများနှင့် အာဆီယံအသိုက်အဝန်း စာရင်းအင်းစနစ်တို့ကိုလည်းကောင်း၊အာဆီယံအတွင်းရေးမှူးချုပ်ရုံး၏ စာရင်းအင်းဌာန Senior Officer ၊ Mr. Puguh B Irawan မှ အာဆီယံအသိုက်အဝန်း စာရင်းအင်း စနစ်၏ သမိုင်းနှင့်မှတ်တိုင်များတို့ကိုလည်းကောင်း ရှင်းလင်းပြောကြားကာ တက်ရောက်လာသူများမှ မေးမြန်းဆွေးနွေးကြပြီး ဖိုရမ်ကို ခေတ္တရပ်နားခဲ့ပါသည်။

နေ့လည်ပိုင်းတွင် EU-ASEAN COMPASS ၏ စာရင်းအင်းဆိုင်ရာအစီအစဉ်များကို COMPASS အဖွဲ့ခေါင်းဆောင် Mr. YannickBineau မှ လည်းကောင်း၊ စာရင်းအင်းကဏ္ဍ ဆိုင်ရာ ပေါင်းစပ်ညှိနှိုင်းရေးအဖွဲ့၏ အခန်းကဏ္ဍကို World Bank မှ စီးပွားရေးစာရင်းအင်း ပညာရှင် Mr.Clarence မှ လည်းကောင်းဆွေးနွေး ပြောကြားခဲ့ပါသည်။

ထို့နောက် ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်မှ သဘာပတိအဖြစ် ဆောင်ရွက်၍ Mr.HeangKanol၊ Mr.Mohammad Ari Nugraha ၊ Mr.Puguh B Irawan၊Mr. YannickBineau ၊ Ms.Hyeran Kimတို့မှ Panelists များအဖြစ် အာဆီယံ အဖွဲ့ဝင်နိုင်ငံများ၏ စာရင်းအင်းဆိုင်ရာအတွေ့အကြုံများ၊ လုပ်ထုံးလုပ်နည်းများနှင့် ပတ်သက်၍ ဆွေးနွေးတင်ပြရာ တက်ရောက်လာသူများမှ ဝိုင်းဝန်းဆွေးနွေးကြပြီး အစည်းအဝေးအား ညနေ (၄:၃၀) နာရီတွင် ရုပ်သိမ်းခဲ့ပါသည်။ ဖိုရမ်သို့ သက်ဆိုင်ရာဦးစီးဌာနများမှ ညွှန်ကြားရေးမှူးချုပ် များ၊ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများ၊ အာဆီယံအမျိုးသား စာရင်းအင်း ရုံးများနှင့် စာရင်းအင်းအဖွဲ့အစည်းများမှ ကိုယ်စားလှယ်များ၊ ပြင်ပသုတေသန အဖွဲ့အစည်းများ၊ ဖွံ့ဖြိုးမှုမိတ်ဖက်များအပါအဝင် စုစုပေါင်း (၁၀၅) ဦးခန့် တက်ရောက်ကြပါသည်။