စဉ်ဆက်မပြတ် ဖွံ့ဖြိုးမှု ပန်းတိုင်များ (Sustainable Development Goals - SDGs) ကို နိုင်ငံတကာ၌ အကောင်အထည်ဖော် ဆောင်ရွက်လျက် ရှိနေကြပါကြောင်း၊ မြန်မာနိုင်ငံ၌လည်း အမျိုးသားအဆင့် ဘက်စုံ စီမံကိန်း၊ ဒေသန္တရနှင့် ကဏ္ဍအလိုက် ကာလတို၊ ကာလလတ်နှင့် ကာလရှည်ဖွံ့ဖြိုးမှု စီမံကိန်းများ အထူးသဖြင့် ၅ နှစ်စီမံကိန်း မဟာဗျူဟာ မူဘောင်အတွင်းတွင် စဉ်ဆက်မပြတ် ဖွံ့ဖြိုးမှု ပန်းတိုင်ပါ လုပ်ငန်းများကို မဟာဗျူဟာကျကျ အချိတ်အဆက် မိမိထည့်သွင်း အကောင်အထည် ဖော်ဆောင် နိုင်ရေးသည် အလွန်အရေးပါလျှက်ရှိပါကြောင်း စာရင်းအင်းအချက်အလက်များ မှန် ကန်ရေးနှင့် အရည်အသွေးပြည့်ဝရေးကော်မတီနာယက ဒုတိယသမ္မတ ဦးဟင်နရီ ဗန်ထီးယူ ကပြောကြားသည်။

ယနေ့ မွန်းလွဲ ၂ နာရီတွင် စီမံကိန်းနှင့် ဘဏ္ဍာရေးဝန်ကြီးဌာန အစည်းအဝေး ခန်းမ၌ ကျင်းပသည့် စာရင်းအင်း အချက်အလက်များ မှန်ကန်ရေးနှင့် အရည်အသွေး ပြည့်ဝရေး ကော်မတီ ဆဋ္ဌမအကြိမ် အစည်းအဝေး (၃/၂၀၁၇)နှင့် ကနဦး လိုအပ်ချက် စစ်တမ်းကောက်ယူရေး လုပ်ငန်းကော်မတီ စတုတ္ထ အကြိမ် အစည်းအဝေး(၃/၂၀၁၇) တွင် ဒုတိယသမ္မတ က ထိုသို့ ပြောကြားခဲ့ခြင်းဖြစ်သည်။

ဆက်လက်၍ ဒုတိယသမ္မတက ပြည့်စုံကောင်းမွန်သော စာရင်းအင်းများ အပေါ် အခြေခံပြီး လက်တွေ့ကျသည့် စီမံကိန်းများ ဖြစ်ပေါ်စေရေးအတွက် ပိုမိုပေါင်းစပ် ညှိနှိုင်း ဆောင်ရွက်ကြရန် လိုအပ်ပါကြောင်း၊ စဉ်ဆက်မပြတ်ဖွံ့ဖြိုးမှု ပန်းတိုင်ဆိုင်ရာ ရည်မှန်းချက်များနှင့် အကောင်အထည်ဖော်မှုနှင့် ဆောင်ရွက်မှု အခြေအနေများကို စောင့်ကြည့် အကဲဖြတ်မှုများ ပြုလုပ်ကြရမည်ဖြစ်ပြီး လိုအပ်ချက်များနှင့် စပ်လျဉ်း၍ လည်း အချိန်နှင့် တစ်ပြေးညီ တင်ပြဆောင်ရွက်သွားကြရ မည်ဖြစ်ပါကြောင်း၊

နိုင်ငံတော်ဖွံ့ဖြိုး တိုးတက်ရေးအတွက် စီမံကိန်းများ၊ စီမံချက်များ ရေးဆွဲခြင်းနှင့် မူဝါဒချမှတ်ခြင်းများ ဆောင်ရွက်ရာတွင် သက်ဆိုင်ရာကဏ္ဍများ၏ ပကတိ အခြေအနေ မှန်ကို သိရှိနိုင်ရန် မူလစာရင်းအင်း အချက်အလက်များ ကောက်ယူခြင်း၊ လူမှုစီးပွား ဆိုင်ရာ စစ်တမ်းများ ကောက်ယူခြင်းနှင့် သဘာဝဘေး အန္တရာယ်ဆိုင်ရာ စစ်တမ်းများ ကောက်ယူ ခြင်းများကို မြန်မာနိုင်ငံ အမျိုးသား စာရင်းအင်းစနစ်တွင် ပါဝင်သည့် အဖွဲ့အစည်း များပေါင်းစပ် ပါဝင်ဆောင်ရွက်ကြရန် လိုအပ်မည်ဖြစ်ပါကြောင်း၊

စာရင်းအင်းလုပ်ငန်းစဉ်များ ပီပြင်စွာ အကောင်အထည်ဖော် ဆောင်ရွက်နိုင်ရေး၊ ခိုင်မာ၍ အရည်အသွေး ပြည့်ဝသည့် စာရင်းအင်း ကိန်းဂဏန်းများ ထုတ်ပြန်နိုင်ရေးနှင့် စာရင်းအင်းဆိုင်ရာ လွှမ်းခြုံမှု အားကောင်း စေရေးတို့အတွက် နိုင်ငံတကာ စံနှုန်းများနှင့် အညီ စာရင်းအင်း ဥပဒေသစ်ကို ပြန်လည်ရေးဆွဲခဲ့ရာ ၂၀၁ရခုနှစ်၊ အောက်တိုဘာလ (၂၅)ရက်တွင် ပြည်သူ့လွှတ်တော်က အတည်ပြုခဲ့ပါကြောင်း၊

စာရင်းအင်းရလဒ်များ ထိရောက်မှန်ကန်စွာ ထုတ်ပြန်နိုင်ရေးအတွက် သက်ဆိုင် ရာ ဝန်ကြီးဌာနများ၊ စာရင်းအင်းဆိုင်ရာ အချက်အလက် ထုတ်ပြန်သူများနှင့် အချက် အလက် သုံးစွဲသူများ ပူးပေါင်းဆောင်ရွက်ကြရမည် ဖြစ်ပါကြောင်း၊ Statistics User-Provider Relations ကောင်းမွန်စေရေးကိုလည်း ချိတ်ဆက် ဆောင်ရွက်ကြရန် လိုအပ်ပါကြောင်း၊ အမျိုးသားစာရင်းအင်းစနစ် တစ်ရပ်လုံး ခြုံငုံမိစေရေးနှင့် စာရင်းအင်း ဆိုင်ရာ ဝန်ထမ်းများ၏ ကျွမ်းကျင်မှု အရည်အသွေးကို မြှင့်တင်နိုင်ရေးအတွက် စာရင်း အင်းနည်းပညာ ဖွံ့ဖြိုးရေး သင်တန်းများဖွင့်လှစ် ဆောင်ရွက်ကြရမည်ဖြစ်ပါကြောင်း၊

မွေးဖွားမှုနှင့် သေဆုံးမှုဆိုင်ရာ စာရင်းအင်းနယ်ပယ် တိုးတက်ရေးအတွက် မွေးဖွားမှုနှင့် သေဆုံးမှု မှတ်ပုံတင်ခြင်း စီမံချက်များကို သက်ဆိုင်ရာ ဌာနများအနေဖြင့် ဆက်လက် ပူးပေါင်း ဆောင်ရွက်ရန် တိုက်တွန်း လိုပါကြောင်း ပြောကြားသည်။ ထို့ပြင် “ဘေးအန္တရာယ်ကြောင့် ထိခိုက်ဆုံးရှုံးနိုင်ခြေ လျှော့ချရေးဆိုင်ရာ ဆန်ဒိုင်းမူဘောင်” ပါ သတ်မှတ်ချက်များ အောင်မြင်စေရေးအတွက် ကဏ္ဍဆိုင်ရာ၊ ဒေသန္တရဆိုင်ရာ ရည်မှန်း ချက်များ ချမှတ်အကောင် အထည်ဖော် ဆောင်ရွက်ကြရမည်ဖြစ်ပြီး ညွှန်းကိန်းများ တိုးတက်စေရေးအတွက် နိုင်ငံနှင့် ကိုက်ညီသည့် အဓိပ္ပာယ်သတ်မှတ်ချက်များနှင့် နည်း လမ်းများကို ဝိုင်းဝန်း ပူးပေါင်းအဖြေရှာ ဆောင်ရွက်ကြရန် တိုက်တွန်းလိုပါကြောင်း၊ ယခုနှစ် သဘာဝဘေးအန္တရာယ်ဆိုင်ရာ စစ်တမ်းကို ဗဟိုစာရင်းအင်းအဖွဲ့က ကောက် ယူမည်ဖြစ်သည့်အတွက် တိုင်းဒေသကြီးနှင့်ပြည်နယ်များ အနေဖြင့် ပူးပေါင်း ဆောင်ရွက်ကြရန် မှာကြားလိုပါကြောင်း၊

ဘေးအန္တရာယ်နှင့်ပတ်သက်၍ အချို့သော စီမံချက်များကို ရေတိုကာလအတွင်း ဆောင်ရွက်နိုင်မည် ဖြစ်သော်လည်း အချို့ကို ရေရှည်ဆောင် ရွက်သွားရမည် ဖြစ်ပါ ကြောင်း၊ အလားတူအချို့သော စီမံချက်များကို နိုင်ငံတော်ရန်ပုံငွေဖြင့် သုံးစွဲနိုင်မည် ဖြစ်သော်လည်း အချို့ကို ဖွံ့ဖြိုးမှုမိတ်ဖက်များနှင့် ပူးပေါင်းဆောင်ရွက်မှသာ အဆင်ပြေ နိုင်မည် ဖြစ်ပါကြောင်း၊ နိုင်ငံဖွံ့ဖြိုးရေးအတွက် မြေပြင် စာရင်းအင်း အချက်အလက် မှန်များ ခိုင်မာရေး၊ အချိန်နှင့် တစ်ပြေးညီ ရှိစေရေးနှင့် ရှေ့နောက်ညီညွတ်မှုရှိရေး တို့အတွက် Stakeholder များ အားလုံး ပါဝင်ဆောင်ရွက်ကြရန် လိုအပ်သကဲ့သို့ ဝန်ကြီးဌာနများ အချင်းချင်းအကြား၊ ဗဟိုအဆင့်နှင့် တိုင်းဒေသကြီးနှင့် ပြည်နယ် အစိုးရများ အကြားတွင် စာရင်းအင်းဆိုင်ရာ ပူးပေါင်းဆောင်ရွက်မှု ယန္တရားကို အချိတ် အဆက်မိမိ အရှိန် အဟုန်မြှင့် တိုးချဲ့ဆောင်ရွက် ကြရမည် ဖြစ်ပါကြောင်း၊

တာဝန်ယူဆောင်ရွက်ရသည့် လုပ်ငန်းကဏ္ဍများ ပိုမိုထိရောက်အောင် တိုးမြှင့် ဆောင်ရွက်နိုင်ရေးအတွက် လိုအပ်ချက်များ ဖြည့်ဆည်းဆောင် ရွက်ပေးကြရန်နှင့် ငွေကြေးသုံးစွဲမှု လုပ်ငန်းတိုင်းကို အထောက်အထားများ၊ ဥပဒေ၊ နည်းဥပဒေများနှင့် အညီ စနစ်တကျ စီမံခန့်ခွဲ ဆောင်ရွက်သွားကြရန် တိုက်တွန်းလိုပါကြောင်း ပြောကြား သည်။

ထို့နောက် စာရင်းအင်းအချက်အလက်များ မှန်ကန်ရေးနှင့် အရည်အသွေး ပြည့်ဝ ရေး ကော်မတီဥက္ကဋ္ဌနှင့် ကနဦးလိုအပ်ချက် စစ်တမ်းကောက်ယူရေး၊ ပျက်စီးဆုံးရှုံးမှု အတည်ပြုရေးနှင့် လိုအပ်ချက်များ ဆန်းစစ် ဖော်ထုတ်ရေးလုပ်ငန်း ကော်မတီဥက္ကဋ္ဌ စီမံကိန်းနှင့်ဘဏ္ဍာရေး ဝန်ကြီးဌာန ပြည်ထောင်စုဝန်ကြီး ဦးကျော်ဝင်းနှင့် အတွင်းရေး မှူး ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာ ၀ါ၀ါမောင်က စာရင်းအင်း အချက်အလက်များ မှန်ကန်ရေးနှင့် အရည်အသွေးပြည့်ဝရေး ကော်မတီ၏ ယခင် အစည်းအဝေး လမ်းညွှန်ချက်များအပေါ် ဆောင်ရွက်ပြီးစီးမှုနှင့် ဆက်လက် ဆောင်ရွက် နေမှု အခြေအနေများ၊ ကနဦးလိုအပ်ချက် စစ်တမ်းကောက်ယူရေး၊ ပျက်စီးဆုံးရှုံးမှု အတည်ပြုရေးနှင့် လိုအပ်ချက်များ ဆန်းစစ်ဖော်ထုတ်ရေး လုပ်ငန်းကော်မတီ၏ ဆောင် ရွက်ခဲ့မှု အခြေအနေနှင့် သဘာဝဘေး အန္တရာယျစစ်တမ်း (၂၀၁၇) ကောက်ယူရေး စီမံဆောင်ရွက်ထားမှု အခြေအနေတို့အား ရှင်းလင်းတင်ပြကြသည်။

ထို့နောက် အစည်းအဝေးသို့ တက်ရောက်လာကြသည့် စာရင်းအင်း အချက် အလက် များမှန်ကန်ရေးနှင့် အရည်အသွေး ပြည့်ဝရေး ကော်မတီဝင်များနှင့် ကနဦး လိုအပ်ချက် စစ်တမ်းကောက်ယူရေး၊ ပျက်စီးဆုံးရှုံးမှု အတည်ပြုရေးနှင့် လိုအပ်ချက်များ ဆန်းစစ်ဖော် ထုတ်ရေး လုပ်ငန်း ကော်မတီဝင်များက သက်ဆိုင်ရာ တိုင်းဒေသကြီးနှင့် ပြည်နယ်အလိုက် ဆောင်ရွက်မှု အခြေအနေများအား ရှင်းလင်းတင်ပြကြသည်။

ယင်းနောက် ပြည်ထောင်စုဝန်ကြီး ဦးကျော်ဝင်းက ရှင်းလင်းတင်ပြချက်များနှင့် စပ်လျဉ်း ၍ ဖြည့်စွက် ရှင်းလင်းသည်။

ထို့နောက် စာရင်းအင်း အချက််အလက်များ မှန်ကန်ရေးနှင့် အရည်အသွေး ပြည့်ဝရေး ကော်မတီ နာယက ဒုတိယသမ္မတက မိမိတို့နိုင်ငံ၏ အခြေပြစာရင်းအင်း ညွှန်းကိန်းများသည် နိုင်ငံတကာ အသိမှတ်ပြု စာရင်းအင်းများ ဖြစ်လာစေရေးအတွက် တိကျမှန်ကန်မှုရှိရန် လိုအပ်ပါကြောင်း၊ နိုင်ငံတော်၏ လက်ရှိ ဖြစ်ပေါ်နေသော စီးပွားရေး၊ လူမှုရေး အခြေအနေများကို ထင်ဟပ်နိုင်သည့် စာရင်းအင်း အချက် အလက်များ ပေါ်ထွက်လာစေရေးအတွက် အစွမ်းကုန်ကြိုးပမ်း ဆောင်ရွက်ကြရမည် ဖြစ်ပါကြောင်း ပြောကြားသည်။

အစည်းအဝေးသို့ ဒုတိယဝန်ကြီး ဦးမောင်မောင်ဝင်းနှင့် ဦးဆက်အောင်၊ စာရင်း အင်းအချက်အလက်များ မှန်ကန်ရေးနှင့် အရည်အသွေးပြည့်ဝရေး ကော်မတီနှင့် ကနဦး လိုအပ်ချက် စစ်တမ်းကောက်ယူရေး၊ ပျက်စီးဆုံးရှုံးမှု အတည်ပြုရေးနှင့် လိုအပ်ချက်များ ဆန်းစစ်ဖော်ထုတ်ရေး လုပ်ငန်းကော်မတီဝင် တိုင်းဒေသကြီးနှင့် ပြည်နယ်ဝန်ကြီးများ၊ အမြဲတမ်းအတွင်းဝန်များနှင့် တာဝန်ရှိသူများ တက်ရောက်ကြ သည်။