နေပြည်တော်၊  ၂၀၂၄ ခုနှစ်၊ ဩဂုတ်လ ၂၉ ရက်

ကမ္ဘာလုံးဆိုင်ရာဖွံ့ဖြိုးတိုးတက်မှု ဦးဆောင်ဦးရွက်ပြုမှုအစီအစဉ် (Global Development Initiative – GDI) အောက်မှဆောင်ရွက်ရန် ပြည်ထောင်စုဝန်ကြီးဌာနများမှ အဆိုပြုထားသည့် စီမံကိန်းများနှင့်စပ်လျဉ်း၍ ညှိနှိုင်းအစည်းအဝေးကို စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဒေါ်သန်းသန်းလင်း ဦးဆောင်၍ စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ် ၃၂ ၌ ယနေ့မနက်ပိုင်းတွင် ကျင်းပပါသည်။
အစည်းအဝေးသို့ ကမ္ဘာလုံးဆိုင်ရာဖွံ့ဖြိုးတိုးတက်မှု ဦးဆောင်ဦးရွက်ပြုမှု အစီအစဉ်အောက်မှဆောင်ရွက်ရန် စီမံကိန်းများအဆိုပြုထားသည့် ပြည်ထောင်စုဝန်ကြီးဌာနများမှ တာဝန်ရှိသူများ တက်ရောက်ကြပါသည်။
အစည်းအဝေးတွင် ဒုတိယဝန်ကြီးက ကမ္ဘာလုံးဆိုင်ရာ ဖွံ့ဖြိုးတိုးတက်မှု ဦးဆောင်ဦးရွက် ပြုမှုအစီအစဉ်အောက်မှဆောင်ရွက်ရန် ဝန်ကြီးဌာနအသီးသီးက အဆိုပြုထားသည့် စီမံကိန်းများနှင့်စပ်လျဉ်း၍ GDI စီမံကိန်းလမ်းညွှန်ချက်ပါ သတ်မှတ်ချက်များနှင့်စိစစ်၍ အဆိုပြုနိုင်ရေးနှင့် ၂၀၂၃ ခုနှစ် GDI ၏ တိုးတက်မှုအစီရင်ခံစာပါ စီမံကိန်းများ ဆောင်ရွက်နေမှုအခြေအနေများနှင့် စပ်လျဉ်း၍ ဆွေးနွေးပါသည်။ 
ထို့နောက် အစည်းအဝေးတက်ရောက်လာကြသူများက အဆိုပြုထားသည့် စီမံကိန်းများနှင့်စပ်လျဉ်း၍ ရှင်းလင်းတင်ပြကြပါသည်။
ရှင်းလင်းတင်ပြချက်များအပေါ် ဒုတိယဝန်ကြီးက လိုအပ်သည်များ ပေါင်းစပ်ညှိနှိုင်းပေးပြီး အစည်းအဝေးကို (၁၂:၃၀) နာရီတွင် ရုပ်သိမ်းခဲ့သည်။
သတင်းစဉ်