နေပြည်တော်၊ ဩဂုတ် ၃  
စဉ်ဆက်မပြတ်စီးပွားရေးဖွံ့ဖြိုးတိုးတက်ရေးဆိုင်ရာလုပ်ငန်းကော်မတီ၏ လုပ်ငန်းညှိနှိုင်း အစည်းအဝေးကို ၂၀၂၃ ခုနှစ်၊ ဩဂုတ်လ ၃ ရက် နံနက်ပိုင်းတွင် စီမံကိန်းနှင့် ဘဏ္ဍာရေးဝန်ကြီး ဌာန၊ ရုံးအမှတ် (၃၂) အစည်းအဝေးခန်းမ၌ ကျင်းပခဲ့သည်။
အစည်းအဝေးသို့ စဉ်ဆက်မပြတ်စီးပွားရေးဖွံ့ဖြိုးတိုးတက်ရေးဆိုင်ရာလုပ်ငန်းကော်မတီ ဥက္ကဋ္ဌ၊ စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီးဒေါ်သန်းသန်းလင်းနှင့် စဉ်ဆက်မပြတ် စီးပွားရေး ဖွံ့ဖြိုးတိုးတက်ရေးဆိုင်ရာ လုပ်ငန်းကော်မတီအဖွဲ့ဝင်များ တက်ရောက်ခဲ့ကြသည်။
အစည်းအဝေးတွင်  စဉ်ဆက်မပြတ်စီးပွားရေးဖွံ့ဖြိုးတိုးတက်ရေးဆိုင်ရာလုပ်ငန်းကော်မတီ ဥက္ကဋ္ဌ၊ ဒုတိယဝန်ကြီးဒေါ်သန်းသန်းလင်းက အဖွင့်အမှာစကားပြောကြားရာတွင် ၂၀၂၃ ခုနှစ်၊ မေလ ၈ ရက်တွင် ကျင်းပခဲ့သော အာဆီယံစီးပွားရေးအသိုက်အဝန်း (အေအီးစီ) ၂၀၂၅ အကောင်အထည်ဖော်ရေးလုပ်ငန်းကော်မတီများ၏ ၁/၂၀၂၃ ကြိမ်မြောက် ညှိနှိုင်းအစည်းအဝေး ဆုံးဖြတ်ချက်များအပေါ် မိမိတို့လုပ်ငန်းကော်မတီအနေနှင့် အချိန်နှင့်တစ်ပြေးညီ ဆက်လက် အကောင်အထည်ဖော်ဆောင်ရွက်ရန် လိုအပ်ပါကြောင်း၊ 
၂၀၂၃ ခုနှစ် အတွင်း အာဆီယံစီးပွားရေး အသိုက်အဝန်း ၂၀၂၅ အောက်တွင် စဉ်ဆက်မပြတ် စီးပွားရေးဖွံ့ဖြိုးတိုးတက်မှုအနေနှင့် နှစ်အလိုက် ဦးစားပေးလုပ်ငန်း (Annual Priority) (၂)ခု ဖြစ်သည့် အာဆီယံ ပင်လယ်၊ သမုဒ္ဒရာရေကြောင်း အခြေခံအဏ္ဏဝါစီးပွားရေး လုပ်ငန်းဆိုင်ရာမူဘောင်ဖွံ့ဖြိုးရေး (Development of ASEAN Blue Economy Framework)နှင့် အာဆီယံကာဗွန် လျှော့ချရေး မဟာဗျူဟာ(ASEAN Strategy for Carbon Neutrality)တို့ ပါရှိပါကြောင်း၊ ယင်းဉီးစားပေး လုပ်ငန်းများကို ပို့ဆောင်ရေးနှင့်ဆက်သွယ်ရေးဝန်ကြီးဌာန၊      သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ ရင်းနှီးမြှုပ်နှံမှုနှင့် နိုင်ငံခြားစီးပွား ဆက်သွယ်ရေးဝန်ကြီးဌာန၊ စွမ်းအင်ဝန်ကြီးဌာနတို့က အဓိက တာဝန်ယူဆောင်ရွက်ရန်ဖြစ်ပါ ကြောင်း၊ 
သို့ဖြစ်ပါ၍ စဉ်ဆက်မပြတ် ဖွံ့ဖြိုးတိုးတက်ရေးလုပ်ငန်းများ အောင်မြင်စွာဆောင်ရွက်နိုင် ရေးနှင့် ပတ်သက်ပြီး သက်ဆိုင်ရာဌာနများနှင့် ကဏ္ဍအချင်းချင်း ချိတ်ဆက်ဆောင်ရွက်ရမည့် လုပ်ငန်းများကို လုပ်ငန်းကော်မတီအနေဖြင့် ပေါင်းစပ်ညှိနှိုင်း (Cross Sectorial Coordination) ဆောင်ရွက်ပေးမည်ဖြစ်ပါကြောင်း၊ ဦးစားပေးလုပ်ငန်းများကို တာဝန်ယူဆောင်ရွက်သည့် ဌာန/ အဖွဲ့အစည်းများအနေဖြင့် သုံးလပတ်အလိုက် လုပ်ငန်းဆောင်ရွက်ချက် တိုးတက်မှုအစီရင်ခံစာ များနှင့် တက်ရောက်ခဲ့သည့်အစည်းအဝေးများမှ ဆွေးနွေးချက်များနှင့် ဆုံးဖြတ်ချက်များကို စဉ်ဆက်မပြတ်စီးပွားရေးဖွံ့ဖြိုးတိုးတက်မှု လုပ်ငန်းကော်မတီ၏ အတွင်းရေးမှူးရုံးဖြစ်သည့် ဗဟို စာရင်းအင်းအဖွဲ့သို့ ပေးပို့ရန် တိုက်တွန်းပြောကြားသည်။
ဆက်လက်၍ စဉ်ဆက်မပြတ် စီးပွားရေးဖွံ့ဖြိုးတိုးတက်ရေးဆိုင်ရာ လုပ်ငန်းကော်မတီဝင် များက ၂၀၂၃ ခုနှစ်အတွင်း တက်ရောက်ခဲ့သည့် လုပ်ငန်းအဖွဲ့အစည်းအဝေးများ၊  အေအီးစီ အကောင်အထည်ဖော်မှုဆိုင်ရာ လုပ်ငန်းစဉ်များ၏ ဆောင်ရွက်ချက် တိုးတက်မှုအခြေအနေများ၊ လုပ်ငန်းများ အကောင်အထည်ဖော်ရာတွင် တွေ့ကြုံရသည့် အခက်အခဲများ၊ စိန်ခေါ်မှုများနှင့် ရှေ့ဆက်လက်ဆောင်ရွက်မည့် လုပ်ငန်းစဉ်များနှင့် စပ်လျဉ်း၍ ဆွေးနွေးတင်ပြကြပါသည်။
ထို့နောက် စဉ်ဆက်မပြတ်စီးပွားရေးဖွံ့ဖြိုးတိုးတက်ရေးဆိုင်ရာလုပ်ငန်းကော်မတီ ဥက္ကဋ္ဌ၊ ဒုတိယဝန်ကြီးမှ ရှေ့ဆက်လက်ဆောင်ရွက်ရမည့် လုပ်ငန်းစဉ်များနှင့် ပတ်သက်၍ သက်ဆိုင်ရာ ဌာန၊ အဖွဲ့အစည်းများအားပေါင်းစပ်ညှိနှိုင်းပေးခဲ့ပါသည်။                                                                                                                                                                                                                                                                                                                             

သတင်းစဉ်