နေပြည်တော် ၊ ဒီဇင်ဘာ ၂၇ 

ပြည်သူ့ဘဏ္ဍာရေးစီမံခန့်ခွဲမှု အထူးမွမ်းမံသင်တန်း အမှတ်စဉ် (၄) သင်တန်းဆင်းပွဲ အခမ်းအနားကို ယနေ့၊ နေ့လယ်ပိုင်းတွင် စီမံကိန်းနှင့် ဘဏ္ဍာရေးဝန်ကြီးဌာန၊ ရသုံးမှန်းခြေငွေစာရင်း ဦးစီးဌာန၊ ပြည်သူ့ဘဏ္ဍာရေးစီမံခန့်ခွဲမှုသင်တန်းကျောင်း (နေပြည်တော်) ၌ ကျင်းပရာ အခမ်းအနား သို့ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီးများ ဖြစ်ကြသော ဦးမောင်မောင်ဝင်းနှင့် ဒေါ်သန်းသန်းလင်း၊ ပြည်သူ့ဘဏ္ဍာရေးစီမံခန့်ခွဲမှုသင်တန်းကျောင်း၊ စီမံခန့်ခွဲမှုအဖွဲ့ အဖွဲ့ဝင် ဌာန အကြီးအကဲများ၊ သင်တန်းနည်းပြများ၊ ဗဟိုအဖွဲ့အစည်းများနှင့် ဝန်ကြီးဌာနအသီးသီးမှ သင်တန်း သား/ သူများနှင့် တာဝန်ရှိသူများ တက်ရောက်ကြသည်။ 
အခမ်းအနားတွင် စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းက သင်တန်းဆင်းအမှာစကား ပြောကြားပြီး၊ ဒုတိယဝန်ကြီး ဒေါ်သန်းသန်းလင်းက သင်တန်းဆင်း လက်မှတ်များ ပေးအပ်ချီးမြှင့်သည်။ ထို့နောက် သင်တန်းသား/သူများကိုယ်စား သင်တန်းသား တစ်ဦးက ကျေးဇူးတင်စကား ပြောကြားသည်။
အဆိုပါသင်တန်းသို့  ဗဟိုအဖွဲ့အစည်းများနှင့် ပြည်ထောင်စုဝန်ကြီးဌာနများအောက်ရှိ ဌာန အဖွဲ့အစည်းများမှ  စီမံကိန်းနှင့် ဘဏ္ဍာရေးဆိုင်ရာတာဝန်ခံ ညွှန်ကြားရေးမှူးအဆင့် အရာထမ်း ၃၂ ဦး တက်ရောက်ကြသည်။ 
သင်တန်းတွင် ပြည်သူ့ဘဏ္ဍာရေးစီမံခန့်ခွဲမှုဆိုင်ရာ အခြေခံသိကောင်းစရာများ၊ အခွန်ပေး ဆောင်ရာ၌ လိုက်နာဆောင်ရွက်ရမည့်အချက်များနှင့် ငွေကြေးခဝါချမှု တိုက်ဖျက်ရေးဆိုင်ရာ အခွန် ကိစ္စရပ်များ၊ စီမံကိန်းရေးဆွဲခြင်း၊ ဘတ်ဂျက်ရေးဆွဲခြင်းနှင့် အကောင်အထည်ဖော်ခြင်း၊ ပြည်ပချေး ငွေနှင့် ပြည်ပအကူအညီရယူခြင်း၊ နိုင်ငံခြားငွေသုံးစွဲခြင်း၊ ငွေတိုက်လုပ်ငန်းဆိုင်ရာ ဘဏ္ဍာရေး သတင်းအချက်အလက်များ၊ စာရင်းစစ်ဆေးခြင်း၊ လုပ်ငန်းဆောင်ရွက်မှုနှင့် လိုက်နာဆောင်ရွက်မှု စစ်ဆေးခြင်းစသည့် ဘာသာရပ်များကို စာတွေ့၊ လက်တွေ့နှင့်ယှဉ်၍ ဆွေးနွေးပို့ချခဲ့ပြီး သင်တန်း ကာလမှာ ရက်သတ္တပတ်လေးပတ် ကြာမြင့်ခဲ့ကြောင်း သိရသည်။(သတင်းစဉ်)