နေပြည်တော်၊ ဩဂုတ် ၅
    စီမံကိန်းရေးဆွဲရေးဦးစီးဌာန၊ ခရိုင်နှင့်မြို့နယ်တာဝန်ခံများ လုပ်ငန်းစွမ်းဆောင်ရည် မြှင့်တင်ရေး မွမ်းမံသင်တန်း အမှတ်စဉ် (၁/၂၀၂၄-၂၀၂၅) သင်တန်းဆင်းပွဲအခမ်းအနားကို ၂.၈.၂၀၂၄ ရက်၊ ညနေပိုင်းတွင် နေပြည်တော်ကောင်စီနယ်မြေရှိ စီမံကိန်းရေးဆွဲရေး ဦးစီးဌာန၊ သင်တန်းကျောင်း၌ကျင်းပရာ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဒေါ်သန်းသန်းလင်း တက်ရောက်၍ လမ်းညွှန် အမှာစကားပြောကြားသည်။
        သင်တန်းဆင်းပွဲသို့ စီမံကိန်းနှင့် ဘဏ္ဍာရေးဝန်ကြီးဌာနအောက်ရှိ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်များနှင့် သက်ဆိုင်ရာ တာဝန်ရှိပုဂ္ဂိုလ်များ တက်ရောက်ပါသည်။
       ဒုတိယဝန်ကြီးက သင်တန်းဆင်း အမှာစကား ပြောကြားရာတွင် ခရိုင်နှင့်မြို့နယ် တာဝန်ခံများသည် မိမိတို့ခရိုင်နှင့် မြို့နယ်ရုံးအသီးသီးတွင် ရုံးလုပ်ငန်းစီမံခန့်ခွဲမှုတွင် အားကောင်းရန်လိုအပ်ပြီး အောက်ခြေမှ စီမံကိန်းရေးဆွဲခြင်း (Bottom-up Planning) တွင် ဒေသလိုအပ်ချက်နှင့် နိုင်ငံတော်၏ မူဝါဒနှင့် ပေါင်းစပ်ညှိနှိုင်းမှု အားကောင်းစွာ ဆောင်ရွက်ပေးရန် လိုအပ်ကြောင်း၊ ဂျီဒီပီစာရင်းဇယားများနှင့် စီမံကိန်းအကောင်အထည်ဖော်မှုများ ကို စနစ်တကျစိစစ်ဆောင်ရွက်ပေးရန်လိုအပ်ကြောင်း၊ ဘာသာရပ်ပိုင်းဆိုင်ရာ သဘောတရားများတွင် တွေးခေါ်မျှော်မြင်တီထွင်ဆန်းသစ်မှုရှိစေရန် လေ့ကျင့်ပျိုးထောင်ရမည် ဖြစ်ကြောင်း၊ သင်တန်းမှ စာတွေ့လက်တွေ့ လေ့ကျင့်သင်ကြားခဲ့သည့် သင်ခန်းစာများကို ပြန်လည်အသုံးချရမည်ဖြစ်ကြောင်း၊ မိမိတို့၏ ပင်မတာဝန်များကို အစဉ်တိုးတက်အောင် ဆောင်ရွက်နိုင်ရန် ပြောင်းလဲဖြစ်ပေါ်နေသည့် အခြေအနေများနှင့်အညီ လေ့လာဆည်းပူး ဆောင်ရွက်သွားရန်ဖြစ်ကြောင်း၊ ဝန်ကြီးဌာနက  ချမှတ်ထားသည့် စည်းမျဉ်းစည်းကမ်းများ၊ အခြားဆက်စပ်ဌာနများ၏ စည်းမျဉ်းစည်းကမ်းများကို သိရှိလိုက်နာရန်နှင့် အခြားဆက်စပ်ဌာနများ၏ စည်းမျဉ်းစည်းကမ်းများကို မိမိလက်အောက်ရှိ ဝန်ထမ်းများ သိရှိရန် ဆင့်ပွားပညာပေးရမည်ဖြစ်ကြောင်း၊ ထိုကဲ့သို့ ဆောင်ရွက်နိုင်ရန် ဘာသာရပ်ဆိုင်ရာ စာပေများကို အမြဲဖတ်ရှု့လေ့လာရမည်ဖြစ်ကြောင်း၊ နိုင်ငံဝန်ထမ်းများ ဖြစ်သည့်အတွက် နိုင်ငံတော်၏ တာဝန်များကို သစ္စာရှိစွာ ကျေပွန်အောင် တာဝန်ယူဆောင်ရွက်ကြရမည်ဖြစ်ကြောင်း၊ အစဉ်လေ့ကျင့်သင်ကြား/သင်ယူနေသည့် ဝန်းကျင်ကောင်း တစ်ခုအဖြစ် ဖန်တီးနိုင်ရေးအတွက် ဆက်လက်လေ့လာဆည်းပူး ကြိုးပမ်းဆောင်ရွက်သွားရန် စသည် ဖြင့် လမ်းညွှန်မှာကြားပါသည်။
အဆိုပါ သင်တန်းကို ရက်သတ္တပတ် ၃ ပတ်ကြာ ဖွင့်လှစ်ခဲ့ပြီး ခရိုင်နှင့် မြို့နယ် စီမံကိန်းဦးစီးရုံးများမှ သင်တန်းသား/သူ ၄၆ ဦး တက်ရောက်ကြောင်း သတင်းရရှိပါသည်။
သတင်းစဉ်