နေပြည်တော် ၊ ဇန်နဝါရီ  ၁၈
(ASEAN Economic Community–AEC) အေအီးစီ ၂၀၂၅ အတွက် အာဆီယံစီးပွားရေး အသိုက်အဝန်းဆိုင်ရာ လုပ်ငန်းများ  အကောင်အထည်ဖော်ရေး ကော်မတီမှ ဖွဲ့စည်းပေးထားသော “ကောင်းမွန်သောစီမံမှု လုပ်ထုံးလုပ်နည်းကျင့်သုံးရေး (Good Regulatory Practice – GRP) ဆိုင်ရာလုပ်ငန်းကော်မတီ”၏ တတိယအကြိမ် လုပ်ငန်းညှိနှိုင်းအစည်းအဝေးကို ယနေ့နံနက်ပိုင်းတွင် နေပြည်တော်ရှိ စီမံကိန်းနှင့်ဘဏ္ဍာရေးဝန်ကြီးဌာန၊ ပြည်သူ့ဘဏ္ဍာရေးစီမံခန့်ခွဲမှု သင်တန်းကျောင်း၌ ကျင်းပသည်။ 
အစည်းအဝေးသို့ လုပ်ငန်းကော်မတီဥက္ကဋ္ဌ၊ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း၊ ကော်မတီအဖွဲ့ဝင်များဖြစ်ကြသည့် သက်ဆိုင်ရာဝန်ကြီးဌာန၊ ဦးစီးဌာန (၂၈) ခုမှ ကော်မတီအဖွဲ့ဝင်များဖြစ်ကြသည့် ညွှန်ကြားရေးမှူးချုပ်၊ ဒုတိယအမြဲတမ်းအတွင်းဝန်များနှင့်  ဌာနဆိုင်ရာအဆင့်မြင့်ကိုယ်စားလှယ်များ တက်ရောက်ကြသည်။
အစည်းအဝေးတွင် ဦးစွာ လုပ်ငန်းကော်မတီဥက္ကဋ္ဌ၊ ဒုတိယဝန်ကြီး ဦးမောင်မောင်ဝင်းက အဖွင့်အမှာစကား ပြောကြားရာ၌ အာဆီယံစီးပွားရေး အသိုက်အဝန်းလမ်းပြမြေပုံ ၂၀၂၅ တွင် ပါရှိသော လုပ်ငန်းများဆောင်ရွက်နိုင်ရန် လုပ်ငန်းကော်မတီ (၂၂) ရပ်ကို သက်ဆိုင်ရာကဏ္ဍအလိုက်ဖွဲ့စည်းထားရှိရာ “ကောင်းမွန်သောစီမံမှု လုပ်ထုံးလုပ်နည်းကျင့်သုံးရေး (Good Regulatory Practice – GRP) ဆိုင်ရာလုပ်ငန်းကော်မတီ” သည်လည်း တစ်ခုအပါအဝင်ဖြစ် ကြောင်း၊ လုပ်ငန်းကော်မတီအနေဖြင့်လည်း GRP ဆိုင်ရာလုပ်ငန်းစီမံချက်အရ GRP ရည်မှန်းချက်များ ပြည့်မီအောင်ဆောင်ရွက်နိုင်ရေး၊ လုပ်ငန်းစီမံချက်ပါ အဓိကလုပ်ငန်းကြီး (၄) ရပ်တွင် ပြဋ္ဌာန်းဖော်ပြထားသည့် ဦးစားပေးနယ်ပယ်များနှင့် မဟာဗျုဟာများကို အချိန်နှင့်တစ်ပြေးညီ သတ်မှတ်အချိန်ကာလများအတိုင်း ဆောင်ရွက်သွားကြခြင်းဖြင့် နိုင်ငံအတွင်း Good Governance ၊ e-Government ၊ Stakeholders Engagement ကိစ္စရပ်များ တိုးတက်လာစေခြင်း၊ လုပ်ထုံးလုပ်နည်းများကြောင့် ဖြစ်ပေါ်လာရသောအခက်အခဲများကို လျှော့ချပေးပြီး ပိုမိုကောင်းမွန်ပြီး ထိရောက်မှုရှိသော စီမံမှုလုပ်ထုံးလုပ်နည်းများနှင့် အုပ်ချုပ်မှုဆိုင်ရာ လုပ်ငန်းစဉ်များ ဆောင်ရွက်ပေးခြင်းဖြင့် သက်ဆိုင်ရာဝန်ကြီးဌာန/ဦးစီးဌာနများ အလိုက်လက်ရှိဆောင် ရွက်လျက်ရှိသည့်လုပ်ငန်းစဉ်များ ပိုမိုတိုးတက်ကောင်းမွန်လာစေနိုင်သည့် အကျိုးရလဒ်ကောင်းများ ရရှိစေနိုင်မည်ဖြစ်ကြောင်း၊ ကောင်းမွန်သောစီမံမှု လုပ်ထုံးလုပ်နည်းကျင့်သုံးရေးကို အကောင်အထည်ဖော် ဆောင်ရွက်ခြင်းအားဖြင့် မလိုလားအပ်သောအဆင့်များ၊ အတားအဆီးများကို သေချာစွာရှာဖွေဖော်ထုတ်နိုင်မည်ဖြစ်ကြောင်း၊ ရှာဖွေဖော်ထုတ်တွေ့ရှိချက်များကို ပြန်လည်ပြင်ဆင်သုံးသပ်၍ ပြည်သူလူထု၏ လိုအပ်ချက်များနှင့်ကိုက်ညီမှုရှိပြီး လက်တွေ့ကျသောလုပ်ထုံးလုပ်နည်းများ ချမှတ်ဆောင်ရွက်နိုင်မှာဖြစ်ကြောင်း၊ ထိုသို့ဆောင်ရွက်ခြင်းအားဖြင့် အာဆီယံဒေသတွင်း ကုန်သွယ်မှုအဟန့်အတားများကို လျှော့ချပေးနိုင်မည်ဖြစ်သည့်အတွက် နိုင်ငံတော်စီးပွားရေးဖွံ့ဖြိုးတိုးတက်မှုကို အထောက်အကူပြုမည်ဖြစ်ကြောင်း စသည်ဖြင့် ပြောကြားပါသည်။  
ဆက်လက်၍ လုပ်ငန်းကော်မတီအဖွဲ့ဝင်ဌာနများမှ ဆောင်ရွက်ပြီးစီးမှုအခြေအနေများ နှင့် ဆက်လက်ဆောင်ရွက်သွားမည့်အခြေအနေများကို တင်ပြခဲ့ကြပြီး ကော်မတီဝင်များ၏ အကြံပြုဆွေးနွေးမှုများအပေါ် လုပ်ငန်းကော်မတီဥက္ကဋ္ဌ၊ ဒုတိယဝန်ကြီးက ပြန်လည်ရှင်းလင်းဆွေးနွေး၍ နိဂုံးချုပ်အမှာစကားပြောကြားကာ အစည်းအဝေးကို ရုပ်သိမ်းခဲ့ကြောင်း သတင်း ရရှိသည်။
သတင်းစဉ်