စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း အမျိုးသားအဆင့်လျှပ်စစ်သုံးယာဉ်နှင့် ဆက်စပ်လုပ်ငန်းများ ကြည့်ရှုစစ်ဆေးခြင်းနှင့် (၃၂) ကြိမ်မြောက် အပြည်ပြည်ဆိုင်ရာအကောက်ခွန်နေ့အခမ်းအနားတက်ရောက်

ရန်ကုန် ၊ ဇန်နဝါရီ  ၂၇

စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းသည် ဇန်နဝါရီလ ၂၄ ရက်၊ နံနက်ပိုင်းတွင် အမျိုးသားအဆင့်လျှပ်စပ်သုံးယာဉ်နှင့် ဆက်စပ်လုပ်ငန်းများဖွံ့ဖြိုးတိုးတက်ရေးဦးဆောင်ကော်မတီ၊ ဒုတိယဥက္ကဋ္ဌ (၁) စက်မှုဝန်ကြီးဌာန၊ ပြည်ထောင်စုဝန်ကြီး ဒေါက်တာချာလီသန်းနှင့်အတူ ရန်ကုန်တိုင်းဒေသကြီး၊ ရွာသာကြီးရှိ  RG Logistic Bonded Warehouse (Ywarthargyi Dry Port) တွင် ရောက်ရှိနေသည့် Chin Dwin Shan Construction Co., Ltd. မှတင်သွင်းလာသည့် လျှပ်စစ်သုံးယာဉ် ၃၀ စီး နှင့် NPK Motors Co., Ltd. မှ တင်သွင်းလာသည့် လျှပ်စစ်သုံးယာဉ် ၁၀ စီး၊ စုစုပေါင်း ၄၀ စီး အတွက် ဆိပ်ကမ်းရှင်းလင်းရေး လုပ်ငန်းစဉ်များကို ကြည့်ရှုစစ်ဆေးခဲ့သည်။ ယင်းနေ့မွန်းလွဲပိုင်းတွင် အကောက်ခွန်ဦးစီးဌာန၊ညွှန်ကြားရေးမှူးချုပ်နှင့် RG Logistic Bounded Warehouse နှင့် KM Logistic Terminal Bounded Warehouse မှ တာဝန်ရှိပုဂ္ဂိုလ်များက Bounded Warehouse လုပ်ငန်းဆောင်ရွက်နေမှုအခြေအနေများကို ရှင်းလင်းတင်ပြရာ ဒုတိယဝန်ကြီးက လိုအပ်သည်များကို ပေါင်းစပ်ညှိနှိုင်းဆောင်ရွက်ပေးပြီး Bounded Warehouse များအတွင်း လှည့်လည်ကြည့်ရှုစစ်ဆေးသည်။ ဒုတိယဝန်ကြီးသည် ဇန်နဝါရီ ၂၅ ရက်၊ နံနက်ပိုင်းတွင် ငွေချေးသက်သေခံလက်မှတ်လုပ်ငန်းများကြီးကြပ်ရေးကော်မရှင်ရုံးသို့ ရောက်ရှိပြီး၊ ငွေချေးသက်သေခံလက်မှတ်လုပ်ငန်းများ ကြီးကြပ်ရေးကော်မရှင်ရုံး၏ Website ပြင်ဆင်ရေးဆွဲရေးအတွက် တင်ဒါအစည်းအဝေးသို့ တက်ရောက်သည်။ ယင်းနေ့မွန်းလွဲပိုင်းတွင် သီလဝါအထူးစီးပွားရေးဇုန်၊ Wilmar ဆိပ်ကမ်းနှင့် ဆန်စက်၊ ဆီစက်၊ ဂျုံစက်များ၊ Denko စက်သုံးဆီဆိပ်ကမ်းနှင့် MITT အပြည်ပြည်ဆိုင်ရာဆိပ်ကမ်းတို့သို့ ရောက်ရှိပြီး အကောက်ခွန်ရှင်းလင်းရေးလုပ်ငန်းစဉ်များအား ကြည့်ရှုစစ်ဆေးရာ အကောက်ခွန်ဦးစီးဌာန၊ ညွှန်ကြားရေးမှူးချုပ်၊ သီလဝါအထူးစီးပွားဇုန်စီမံခန့်ခွဲမှုကော်မတီဥက္ကဌနှင့် ဆိပ်ကမ်း တာဝန်ရှိသူများက လုပ်ငန်းဆောင်ရွက်မှုအခြေအနေများကိုရှင်းလင်းတင်ပြပြီး၊ ဒုတိယဝန်ကြီးက လိုအပ်သည်များကို ပေါင်းစပ်ညှိနှိုင်းဆောင်ရွက်ပေးသည်။  ဒုတိယဝန်ကြီးသည် ဇန်နဝါရီ ၂၆ ရက်၊ နံနက်ပိုင်းတွင် အကောက်ခွန်ဦးစီးဌာန၊ ဇေယျာသီဟခန်းမ၌ ကျင်းပပြုလုပ်သည့် (၃၂) ကြိမ်မြောက်အပြည်ပြည်ဆိုင်ရာ အကောက်ခွန်နေ့အခမ်းအနားသို့ ရန်ကုန်တိုင်းဒေသကြီးဝန်ကြီးချုပ်၊ ရန်ကုန်တိုင်းဒေသကြီး၊ ဝန်ကြီးများနှင့်အတူ တက်ရောက်ခဲ့ပြီး ဇန်နဝါရီ  ၂၇ ရက်၊ နံနက်ပိုင်းတွင် နေပြည်တော်သို့ ပြန်လည်ရောက်ရှိကြောင်း သတင်းရရှိပါသည်။(သတင်းစဉ်)