စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီးဦးကျော်ဝင်း ဦးဆောင်၍ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းမှ တာဝန်ရှိပုဂ္ဂိုလ်များ၊ စီးပွားရေးလုပ်ငန်းရှင် စုစုပေါင်း (၅၆) ဦး ပါဝင်သော မြန်မာကိုယ်စားလှယ်အဖွဲ့သည် တရုတ်-မြန်မာ စီးပွားရေး စင်္ကြံလမ်းတည်ထောင်ရေးနှင့် စပ်လျဉ်းသည့် အစည်းအဝေး သို့ တက်ရောက်ရန်အတွက် ဖေဖော်ဝါရီလ (၃) ရက်နေ့မှ (၇)ရက်နေ့ထိ တရုတ်ပြည်သူ့သမ္မတနိုင်ငံ ခရီးစဉ် သွားရောက်ခဲ့ပါသည်။
ပြည်ထောင်စုဝန်ကြီးနှင့် မြန်မာကိုယ်စားလှယ်အဖွဲ့သည် ဖေဖော်ဝါရီလ (၃) ရက်နေ့တွင် ယူနန်ပြည်နယ်၊ ကူမင်းမြို့သို့ ရောက်ရှိခဲ့ရာ ယူနန်ပြည်နယ် ဖွံ့ဖြိုးတိုးတက်ရေးနှင့်ပြုပြင် ပြောင်းလဲမှုကော်မရှင်ဥက္ကဋ္ဌမှ ကြိုဆိုဧည့်ခံသော ညစာစားပွဲသို့ တက်ရောက်ပြီး စီးပွားရေးရာ ကိစ္စရပ်များအား ဆွေးနွေးခဲ့ပါသည်။ ဆက်လက်၍ ကချင်ပြည်နယ်၊ မြစ်ကြီးနားမြို့တွင် မွေးမြူရေးလုပ်ငန်းကဏ္ဍ၌ ရင်းနှီးမြှုပ်နှံများပြုလုပ်မည့် Yunling Cattle(BMY cattle) မှ တာဝန်ရှိသူများနှင့် တွေ့ဆုံခဲ့ပါသည်။ ယင်းသို့တွေ့ဆုံရာတွင် ပြည်ထောင်စုဝန်ကြီးမှ နှစ်နိုင်ငံ စီးပွားရေး လုပ်ငန်းရှင်များ ချိတ်ဆက်၍ နှစ်ဖက်အကျိုးဖြစ်ထွန်းစေမည့် အခွင့်အလမ်းများ လမ်းပွင့်လာစေရန် ကြိုးပမ်းကြစေလို ကြောင်း ဆွေးနွေးပြောကြားခဲ့ပါသည်။
ဖေဖော်ဝါရီလ ၄ ရက်နေ့တွင်  ပြည်ထောင်စုဝန်ကြီးနှင့် မြန်မာကိုယ်စားလှယ်အဖွဲ့သည် China Southern Power Grid Company ၊ Kunming Iron & Steel Holding Co., Ltd ၊ Kunming Yiliang Red Lion Cement Factory တို့သို့ သွားရောက်လေ့လာခဲ့ပြီး တာဝန်ရှိသူများနှင့် တွေ့ဆုံ၍  မြန်မာနိုင်ငံတွင် ရင်းနှီးမြှုပ်နှံမှုလုပ်ငန်းများ ဆောင်ရွက်ရေး အတွက် ရင်းနှီးမြှုပ်နှံမှုကော်မရှင်အနေဖြင့် လိုအပ်သည်များ ညှိနှိုင်းပေးသွားမည်ဖြစ်ကြောင်း ပြောကြားခဲ့ပါသည်။ ထို့နောက် Yunnan Provincial Energy Investment Group Co., Ltd. သို့ သွားရောက်၍ အဆိုပါကုမ္ပဏီနှင့် မြန်မာနိုင်ငံတို့အကြား  ပူးပေါင်းဆောင်ရွက်မည့် နော်ချမ်းခစီမံကိန်းနှင့် သာကေတ Gas Power Plant စီမံကိန်းနှင့် စပ်လျဉ်း၍ ဆွေးနွေး ညှိနှိုင်း ခဲ့ပါသည်။
ဖေဖော်ဝါရီလ ၅ ရက်နေ့တွင်  ပြည်ထောင်စုဝန်ကြီးဦးဆောင်သော မြန်မာကိုယ်စားလှယ် အဖွဲ့ နှင့် ယူနန်ပြည်နယ် ပြည်သူ့အစိုးရမှ တာဝန်ရှိပုဂ္ဂိုလ်များ၊ စီးပွားရေးလုပ်ငန်းရှင်ကြီးများ အကြား ကျင်းပသည့် တွေ့ဆုံပွဲသို့ တက်ရောက်ခဲ့ပြီး ဖွံ့ဖြိုးတိုးတက်မှုအတွက် ပူးပေါင်း ဆောင်ရွက်သွားမည် ဖြစ်ကြောင်း၊ ယူနန်ပြည်နယ်မှ ရင်းနှီးမြှုပ်နှံမှုလုပ်ငန်းများအား ဖိတ်ခေါ် ပါကြောင်း ပြောကြားခဲ့ပါသည်။ တွေ့ဆုံပွဲအပြီးတွင် ယူနန်ပြည်နယ်ပါတီ အတွင်းရေးမှူးမှ ဖိတ်ကြားသည့် နေ့လည်စာစားပွဲသို့ တက်ရောက်ခဲ့ပြီး နှစ်နိုင်ငံစီးပွားရေးရာ ကိစ္စရပ်များ၊ ရင်းနှီးမြှုပ်နှံမှုနှင့် ကုန်စည်ကူးသန်း ရောင်းဝယ်ရေးဆိုင်ရာ ကိစ္စရပ်များအား ရင်းနှီးပွင့်လင်းစွာ ဆွေးနွေးခဲ့ပါသည်။  
ပြည်ထောင်စုဝန်ကြီးသည် ဖေဖော်ဝါရီလ ၆ ရက်နေ့၊  နံနက် ၁၀ နာရီတွင် ပေကျင်းမြို့ရှိ တရုတ်ပြည်သူ့သမ္မတနိုင်ငံ၊ နိုင်ငံတော်ဧည့်ဂေဟာ၌ ကျင်းပပြုလုပ်သည့် တရုတ်-မြန်မာ စီးပွားရေး စင်္ကြံလမ်းတည်ထောင်ရေးနှင့် စပ်လျဉ်းသည့်ဝန်ကြီးအဆင့် အစည်းအဝေး သို့ တရုတ်ပြည်သူ့ သမ္မတနိုင်ငံ ဖွံ့ဖြိုးတိုးတက်ရေး နှင့် ပြုပြင်ပြောင်းလဲမှုကော်မရှင် ဒုတိယဥက္ကဋ္ဌ Mr. Ningzizhe (Ministerial Level) နှင့်အတူ တက်ရောက်၍ စီးပွားရေးစင်္ကြံ တည်ထောင်ရေးအပေါ် သဘောထား အမြင်များဖလှယ်ကြပြီး ရှေ့ဆက်လက်ဆောင်ရွက်မည့် လုပ်ငန်းစဉ်များ၊ စီးပွားရေးစင်္ကြံလမ်း တည်ထောင်ရေးလုပ်ငန်းများအတွက် ညွှန်ကြား ရေးမှူးချုပ်၊ ဒုတိယညွှန်ကြားရေးမှူးချုပ် အဆင့်ရှိ ပုဂ္ဂိုလ်များနှင့် လုပ်ငန်းကော်မတီ ဖွဲ့စည်း၍ ထိရောက်စွာ ဆောင်ရွက်သွားနိုင်ရေး ကိစ္စရပ်များနှင့် ပြည်ထောင်စုသမ္မတမြန်မာနိုင်ငံ အစိုးရနှင့် တရုတ်ပြည်သူ့သမ္မတနိုင်ငံအစိုးရတို့အကြား စီးပွားရေး စင်္ကြံလမ်း တည်ထောင်ရေး ဆိုင်ရာ နားလည်မှုစာချွှန်လွှာ(မူကြမ်း)အား အပြီးသတ်ညှိနှိုင်းမှု ပြုလုပ်ခဲ့ ပါသည်။ ထို့နောက် ပြည်ထောင်စုဝန်ကြီးနှင့် မြန်မာကိုယ်စားလှယ်အဖွဲ့သည် Bank of China ၊ China State Construction Engineering Corporation Ltd. နှင့် Huawei Company တို့သို့သွားရောက်၍ တာဝန်ရှိသူများနှင့် တွေ့ဆုံပြီး မြန်မာနိုင်ငံရှိ ရင်းနှီးမြှုပ်နှံမှုလုပ်ငန်းများ တွင် အသစ်ထပ်မံ ရင်းနှီးမြှုပ်နှံမည့်ကိစ္စရပ်များအပေါ် ရင်းနှီးပွင့်လင်းစွာ ဆွေးနွေးခဲ့ပါသည်။
ဖေဖော်ဝါရီလ ၇ ရက်နေ့တွင် China Communications Construction ကုမ္ပဏီ၊ CIITC  ကုမ္ပဏီတို့သို့ သွားရောက်လေ့လာခဲ့ပြီး ကုမ္ပဏီများမှ ၎င်းတို့၏ကုမ္ပဏီနှင့် စပ်လျဉ်းသည်များကို ရှင်းလင်းတင်ပြပြီး ပြည်ထောင်စုဝန်ကြီးမှ    ရင်းနှီးမြှုပ်နှံမှုလုပ်ငန်းများ တိုးမြှင့်လုပ်ဆောင်ကြရေး ဆွေးနွေးခဲ့ပါသည်။
ဖေဖော်ဝါရီလ ၇ ရက်နေ့ ညနေပိုင်း၌ MIC အတွင်းရေးမှူး/ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန ညွှန်ကြားရေးမှူးချုပ် သည် မြန်မာနိုင်ငံမှ စီးပွားရေးလုပ်ငန်းရှင်များ၊ တရုတ်ပြည်သူ့သမ္မတနိုင်ငံမှ စီးပွားရေးလုပ်ငန်းရှင်များ နှင့် တွေ့ဆုံဆွေးနွေးခဲ့ပါသည်။ အဆိုပါတွေ့ဆုံ ဆွေးနွေးပွဲတွင် CITIC ကုမ္ပဏီ၊ China National Petroleum Corporation ၊ China Development Bank၊ China National Agriculture Development Group နှင့်  CNNC ကုမ္ပဏီတို့မှ စုစုပေါင်း (၂၅)ဦးတက်ရောက်ခဲ့ပြီး၊ တက်ရောက်လာသူများက မြန်မာနိုင်ငံတွင် ဆန်စပါးအဖွဲ့ချုပ်နှင့် လယ်ယာကဏ္ဍ ပူးပေါင်း ဆောင်ရွက်မှုအစီအစဉ်များ၊ ရေနံချက်စက်ရုံ၊ လျှပ်စစ်ဓါတ်အားပေးလုပ်ငန်းနှင့် LNG လုပ်ငန်း များ၌ ရင်းနှီးမြှုပ်နှံမှုအစီအစဉ်များ၊ One Belt One Road စီမံကိန်း၊ SMEs လုပ်ငန်းများ အတွက် ချေးငွေထုတ်ပေးရေး ဆောင်ရွက်မည့်အစီအစဉ်များ၊ ရထားစက်ခေါင်း ဒီဇယ်အင်ဂျင် စက်ရုံ ပြန်လည်စတင်နိုင်ရေး ကိစ္စရပ်များ၊ ကုန်စည်များအား ပြည်ပသို့ ဆောလျင်စွာတင်ပို့ခွင့် ရရှိရေးတို့နှင့်စပ်လျဉ်း၍ မြန်မာအစိုးရနှင့် မြန်မာနိုင်ငံ ရင်းနှီးမြှုပ်နှံမှုကော်မရှင်တို့မှ လိုအပ်သည်များ ကူညီဆောင်ရွက်ပေးနိုင်ရေး တင်ပြကြပြီး ပူးပေါင်းဆောင်ရွက်မည့် လုပ်ငန်း များနှင့်စပ်လျဉ်း၍ အပြန်အလှန် ညှိနှိုင်းဆွေးနွေးခဲ့ပါသည်။
ပြည်ထောင်စုဝန်ကြီးနှင့် မြန်မာကိုယ်စားလှယ်အဖွဲ့သည် ယင်းနေ့ ဒေသစံတော်ချိန် ညနေ ၅ နာရီတွင် ပေကျင်းမြို့မှပြန်လည်ထွက်ခွာခဲ့ပါသည်။ ပြည်ထောင်စုဝန်ကြီးနှင့် မြန်မာ ကိုယ်စားလှယ်အဖွဲ့၏ တရုတ်ပြည်သူ့သမ္မတနိုင်ငံခရီးစဉ်သည် အောင်မြင်မှုရှိသည့် ခရီးစဉ် တစ်ခုဖြစ်ပါကြောင်း သတင်းရရှိပါသည်။ ဖေဖော်ဝါရီ -  ၈