ကနဦးလိုအပ်ချက် စစ်တမ်းကောက်ယူရေး၊ ပျက်စီးဆုံးရှုံးမှုအတည်ပြုရေးနှင့် လိုအပ်ချက်များဆန်းစစ်ဖော်ထုတ်ရေး လုပ်ငန်းကော်မတီဥက္ကဋ္ဌ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဒေါ်သန်းသန်းလင်း ဦးဆောင်သောအဖွဲ့သည် ရာဂိမုန်တိုင်းအရှိန်ကြောင့် ဖြစ်ပေါ်ခဲ့သည့် ပျက်စီးဆုံးရှုံးမှုစာရင်း ကောက်ယူနေမှုများအား ကြည့်ရှုစစ်ဆေး

နေပြည်တော်၊ စက်တင်ဘာ ၁၈

အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီ၏ ကနဦးလိုအပ်ချက် စစ်တမ်းကောက်ယူရေး၊ ပျက်စီးဆုံးရှုံးမှုအတည်ပြုရေးနှင့် လိုအပ်ချက်များဆန်းစစ်ဖော်ထုတ်ရေး လုပ်ငန်းကော်မတီဥက္ကဋ္ဌ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဒေါ်သန်းသန်းလင်း ဦးဆောင်သောအဖွဲ့သည် ယနေ့ နံနက် ၁၁ နာရီတွင် ရာဂိမုန်တိုင်းအရှိန်ကြောင့် မိုးသည်းထန်စွာရွာသွန်းခဲ့ပြီး ရေကြီးရေလျှံမှုများ ဖြစ်ပေါ်ခဲ့သည့် နေပြည်တော်ကောင်စီနယ်မြေ ဇေယျာသီရိမြို့နယ်၊ သစ်တပ်အုပ်စု၊ ရှားစေးဖိုကျေးရွာသို့ သွားရောက်၍ ပျက်စီးဆုံးရှုံးမှုအခြေအနေများအား ကြည့်ရှုစစ်ဆေးပြီး ကျေးရွာအုပ်ချုပ်ရေးမှူးနှင့် အခြေခံပညာ မူလတန်းကျောင်းတာဝန်ခံတို့ နှင့် တွေ့ဆုံ၍ သိရှိလိုသည်များကို မေးမြန်းခဲ့ပြီး အားပေးစကားပြောကြားခဲ့ပါသည်။
ဆက်လက်၍ ပုဗ္ဗသီရိမြို့နယ်အတွင်းရှိ စက်ကုန်းကျေးရွာ၊ ရွာသစ်ကျေးရွာ၊ သာယာကုန်းကျေးရွာ၊ သရက်သမိန်ကျေးရွာ၊ ဇီးကုန်းကျေးရွာများတွင် ပျက်စီးဆုံးရှုံးမှုအခြေအနေများကို ကြည့်ရှုစစ်ဆေးပါသည်။ ထို့နောက် ချောင်းစောက်ကျေးရွာ ဘုန်းတော်ကြီးကျောင်း၌ ကျေးရွာအုပ်ချုပ်ရေးမှူးနှင့် တွေ့ဆုံ၍ ဗဟိုစာရင်းအင်းအဖွဲ့မှ မြေပြင်ကွင်းဆင်းစာရင်းကောက်ယူနေမှု အခြေအနေများအား ကြည့်ရှုစစ်ဆေးပြီး ပညာရေး၊ ကျန်းမာရေး၊ သာသနာရေး၊ လူမှုရေး ကဏ္ဍများအလိုက် ပျက်စီးဆုံးရှုံးမှု ကိန်းဂဏန်းအချက်အလက်များ ပြည့်စုံမှန်ကန်စွာရရှိရေးအတွက် လမ်းညွှန်မှာကြားခဲ့ပါသည်။
သတင်းစဉ်