ဗဟိုစာရင်းအင်းအဖွဲ့၊ ဌာနတွင်း အရာထမ်း၊ အမှုထမ်းများ စာရင်းအင်းဆိုင်ရာဆော့ဖ်ဝဲများအသုံးချမှုသင်တန်း အမှတ်စဉ် (၁) ဖွင့်ပွဲအခမ်းအနားသို့ ဒုတိယဝန်ကြီးချုပ်နှင့် စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး တက်ရောက်လမ်းညွှန်မှာကြား

နေပြည်တော်၊ ဩဂုတ် ၅
ဗဟိုစာရင်းအင်းအဖွဲ့၊ ဌာနတွင်း အရာထမ်း၊ အမှုထမ်းများ စာရင်းအင်းဆိုင်ရာဆော့ဖ်ဝဲများ အသုံးချမှုသင်တန်း အမှတ်စဉ် (၁) သင်တန်းဖွင့်ပွဲအခမ်းအနားကို ယနေ့ နံနက် ၉ နာရီတွင် ရုံးအမှတ် (၃၂) ၊ အစည်းအဝေးခန်းမ၌ ကျင်းပရာ ဒုတိယဝန်ကြီးချုပ်နှင့် စီမံကိန်းနှင့်ဘဏ္ဍာရေး ဝန်ကြီးဌာန၊ ပြည်ထောင်စုဝန်ကြီး တက်ရောက်၍ လမ်းညွှန်အမှာစကား ပြောကြားပါသည်။
သင်တန်းဖွင့်ပွဲသို့ စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီးများ၊ ညွှန်ကြားရေးမှူးချုပ်များ၊ ဦးဆောင်ညွှန်ကြားရေးမှူး၊ ဒုတိယအမြဲတမ်းအတွင်းဝန်၊ ဒုတိယညွှန်ကြားရေးမှူးချုပ်များနှင့် သက်ဆိုင်ရာတာဝန်ရှိပုဂ္ဂိုလ်များ တက်ရောက်ပါသည်။
ဒုတိယဝန်ကြီးချုပ်နှင့် စီမံကိန်းနှင့် ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးဝင်းရှိန်က သင်တန်းဖွင့် အမှာစကား ပြောကြားရာတွင် ယနေ့ဖွင့်လှစ်သည့် စာရင်းအင်းဆိုင်ရာ ဆော့ဖ်ဝဲများအသုံးချမှုသင်တန်းသည် ဗဟိုစာရင်းအင်းအဖွဲ့ရုံးချုပ်နှင့် တိုင်းဒေသကြီး၊ ပြည်နယ်များတွင် တာဝန်ထမ်းဆောင်လျက်ရှိသည့် အရာထမ်း၊ အမှုထမ်းများ၏ လုပ်ငန်းစွမ်းဆောင်ရည်များ စဉ်ဆက်မပြတ် ဖွံ့ဖြိုးတိုးတက်စေရန်၊ စာရင်းအင်းများကို စီမံခန့်ခွဲရာတွင် ခေတ်မီစာရင်းအင်း ဆော့ဖ်ဝဲများ အသုံးပြု၍ ခွဲခြမ်းစိစစ်နိုင်စေရန်၊ စာရင်းအင်းအစီရင်ခံစာများတွင် စာရင်းအင်း အသုံးပြုသူများ လွယ်ကူစွာ နားလည်နိုင်မည့် Graphs ၊ Charts တို့ဖြင့် စနစ်တကျ ပြုစုထုတ်ပြန် ပေးနိုင်စေရန် ရည်ရွယ်၍ ဖွင့်လှစ်သည့် သင်တန်းဖြစ်ကြောင်း၊ ဗဟိုစာရင်းအင်းအဖွဲ့သည် မြန်မာနိုင်ငံ၏ တရားဝင်စာရင်းအင်းများကို ပြုစုတွက်ချက်ထုတ်ပြန်နေသည့် အမျိုးသားအဆင့် စာရင်းအင်းရုံး ဖြစ်ပြီး နိုင်ငံအတွက် မေခရိုစီးပွားရေးကဏ္ဍတွင် အလွန်အရေးပါသည့် စားသုံးသူ ဈေးဆနှုန်းနှင့် ငွေကြေးဖောင်းပွမှုနှုန်းများ၊ ကုန်သွယ်မှုစာရင်းအင်းများ တွက်ချက်ထုတ်ပြန်ခြင်း၊ မွေးဖွားမှုနှင့် သေဆုံးမှုဆိုင်ရာ စာရင်းအင်းများ တွက်ချက်ထုတ်ပြန်ခြင်း၊ စစ်တမ်းများ ကောက်ယူ၍ အစီရင်ခံစာများ ထုတ်ပြန်ပေးခြင်း၊ သဘာဝဘေးအန္တရာယ်ဆိုင်ရာ စာရင်းအင်း အချက်အလက်များ ကောက်ယူခြင်းစသည့် လုပ်ငန်းများကို ဆောင်ရွက်နေသည့် အဖွဲ့အစည်း ဖြစ်သည့်အတွက် ယခုဖွင့်လှစ်သည့်သင်တန်းသည် အသုံးဝင်၍ များစွာအကျိုးရှိသည့် သင်တန်း တစ်ခုဖြစ်ပြီး သင်တန်းသားများ၏ အရည်အချင်းကိုလည်း ပိုမိုတိုးတက်လာစေမည်ဖြစ်ကြောင်း၊ 
နိုင်ငံတော်ဖွံ့ဖြိုးတိုးတက်ရေးကို အကောင်အထည်ဖော်ဆောင်ရွက်ရာတွင် စာရင်းအင်း ကိန်းဂဏန်းအချက်အလက်များ အရည်အသွေးပြည့်ဝရန် အရေးကြီးကြောင်း၊  ဗဟိုစာရင်းအင်းအဖွဲ့သည် နိုင်ငံတော်၏ စီးပွားရေးနှင့် လူမှုရေးဆိုင်ရာ မူဝါဒကိစ္စရပ် များအတွက် အခြေခံ စာရင်းအင်းများ၊ အချက်အလက်များကို ကောက်ယူစုစည်း လေ့လာသုံးသပ်ခြင်းနှင့် အစီရင်ခံ တင်ပြခြင်းဖြစ်သည့်အတွက် ဌာနတွင် တာဝန်ထမ်းဆောင်နေသည့် ဝန်ထမ်းများ၏ လုပ်ငန်းပိုင်းဆိုင်ရာ ကျွမ်းကျင်မှု၊ စိတ်ဝင်စားမှု၊ ကိန်းဂဏန်းများကို သရုပ်ခွဲနိုင်မှု၊ လုပ်ငန်းပိုင်းဆိုင်ရာ ကျင့်ဝတ်များအား စောင့်ထိန်းလိုက်နာမှု၊ စာရင်းအင်းဆိုင်ရာ တွက်ချက်နည်းများကို ခေတ်နှင့် လျော်ညီစွာ တိုးတက်လိုက်ပါဆောင်ရွက်နိုင်မှုစသည့် စာရင်းအင်းဆိုင်ရာ အရည်အသွေးများ ပြည့်ဝစေရေးမှာ လွန်စွာအရေးကြီးကြောင်း၊ သို့မှသာ နိုင်ငံတော်အတွက် မြေပြင်လိုအပ်ချက်နှင့် ကိုက်ညီမှုရှိသည့် မူဝါဒများကို ချမှတ်နိုင်မည်ဖြစ်ကြောင်း၊ သင်တန်းတွင် စာရင်းအင်းဆိုင်ရာ ဆော့ဖ်ဝဲများဖြစ်သည့် Basic and Advanced Excel ၊ Census and Survey Processing System (CSPro) Software ၊ Microsoft Access Software ၊ Data Visualization Using Power BI Desktop Software ၊ Research Methodology and Data Analysis with R Software တို့ကို သင်ကြားပို့ချမည်ဖြစ်ကြောင်း၊ ယနေ့ခေတ်တွင် နည်းပညာတိုးတက်ထွန်းကား လာသည်နှင့်အမျှ အချက်အလက်များ ထုတ်ပြန်မှုဆိုင်ရာ ဆန်းသစ်တီထွင်မှုများ အစဉ်အမြဲ တိုးတက်ပြောင်းလဲ လျက်ရှိကြောင်း၊ ဗဟိုစာရင်းအင်းအဖွဲ့အနေဖြင့် စာရင်းအင်းများ ကောက်ယူ၊ စုစည်း၊ တွက်ချက်၊ ထုတ်ပြန်ရေးလုပ်ငန်းစဉ်များတွင် နည်းပညာ တိုးတက်ပြောင်းလဲမှုများကို ခေတ်နှင့်အညီ ကျွမ်းကျင်စွာ လိုက်ပါဆောင်ရွက်နိုင်ရန်အတွက် ခေတ်မီဆော့ဖ်ဝဲများ၊ အိုင်တီနည်းပညာများကို စဉ်ဆက်မပြတ် လေ့လာအသုံးပြုရန်အထူးလိုအပ်ကြောင်း၊ ပြည်ပပညာသင်မှ ပြန်လည်ရောက်ရှိ လာသည့် ဝန်ထမ်းများက သင်ကြားခဲ့ရသည့်ပညာရပ်များ၊ အတွေ့အကြုံများအား ဌာနတွင် ပြန်လည်အသုံးချစေရန်နှင့် ဗဟုသုတများ မျှဝေခြင်းများဆောင်ရွက်ကြရန်လိုအပ်ကြောင်း၊ 
ယခု ဖွင့်လှစ်သည့် စာရင်းအင်းဆိုင်ရာဆော့ဖ်ဝဲများ အသုံးချမှုသင်တန်းသည် ဌာနတွင်း လုပ်ငန်းစွမ်းဆောင်ရည်ကို မြှင့်တင်ပေးရုံသာမက နိုင်ငံ၏ စာရင်းအင်းဆိုင်ရာ တိုးတက်ပြောင်းလဲမှုများကိုလည်း အထောက်အကူပြုသည့် သင်တန်းဖြစ်၍ အကျိုးရှိသည့် သင်တန်းတစ်ခုဖြစ်ကြောင်း၊ သင်တန်းတက်ရောက်ခွင့်ရရှိသည့် သင်တန်းသား၊ သင်တန်းသူများသည် သင်တန်းမှ ပို့ချပေးသည့် သင်ခန်းစာများကို သေချာစွာ လေ့လာမှတ်သား၍ မိမိတို့တာဝန်ကျသည့် လုပ်ငန်းခွင်နယ်ပယ်တို့တွင် အကျိုးရှိရှိ ထိရောက်စွာ အသုံးချရန်နှင့်  တိုင်းဒေသကြီး၊ ပြည်နယ်များမှ သင်တန်းသား၊ သင်တန်းသူများအနေဖြင့် မိမိတို့တာဝန်ကျရာဒေသများတွင် ဌာနတွင်းသာမက ဆက်စပ်ဌာန၊ အဖွဲ့အစည်းများအား ဆင့်ပွားသင်တန်းများပို့ချနိုင်သည်အထိ ကြိုးစားသင်ယူကြရန်၊ မိမိအရည်အသွေးများ ပို၍တိုးတက်အောင် လုပ်ဆောင်ကြရန်နှင့် နိုင်ငံတော်အတွက် အကျိုးပြုရန် လမ်းညွှန်မှာကြားပါသည်။
အဆိုပါ သင်တန်းကို ရက်သတ္တပတ် ၃ ပတ်ကြာဖွင့်လှစ်မည်ဖြစ်ပြီး ရုံးချုပ်နှင့် တိုင်းဒေသကြီး၊ ပြည်နယ် ဗဟိုစာရင်းအင်းအဖွဲ့ရုံးခွဲများမှ အရာထမ်း၊ အမှုထမ်း ၃၀ ဦးကို ဌာနမှ သင်တန်းနည်းပြ ဆရာ၊ ဆရာမ ၈ ဦးတို့က စာတွေ့၊ လက်တွေ့ သင်ကြားပို့ချမည်ဖြစ်ကြောင်း သတင်းရရှိ ပါသည်။ 

သတင်းစဉ်