အသေးစား၊ အငယ်စားနှင့် အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေး လုပ်ငန်းသုံးသပ်မှု အစီရင်ခံရေးအဖွဲ့၏ (၃/၂၀၂၄) ကြိမ်မြောက် အစည်းအဝေးကျင်းပ

နေပြည်တော်     ဇူလိုင်     ၂၃
အသေးစား၊ အငယ်စားနှင့် အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေး လုပ်ငန်းသုံးသပ်မှု အစီရင်ခံရေးအဖွဲ့၏ (၃/၂၀၂၄) ကြိမ်မြောက် အစည်းအဝေးကို ၂၀၂၄ ခုနှစ်၊ ဇူလိုင်လ ၂၃ ရက်နေ့ နံနက်ပိုင်းတွင် စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ် (၃၂) အစည်းအဝေးခန်း၌ ကျင်းပခဲ့ပါသည်။
အစည်းအဝေးသို့ အသေးစား၊ အငယ်စားနှင့် အလတ်စား စီးပွားရေးလုပ်ငန်းများ ဖွံ့ဖြိုး တိုးတက်ရေး လုပ်ငန်းသုံးသပ်မှု အစီရင်ခံရေးအဖွဲ့ ဥက္ကဋ္ဌ စီမံကိန်းနှင့် ဘဏ္ဍာရေး ဝန်ကြီးဌာန၊ ဒုတိယဝန်ကြီး ဒေါ်သန်းသန်းလင်းနှင့် စီမံကိန်းနှင့် ဘဏ္ဍာရေး ဝန်ကြီးဌာန၊ ရင်းနှီးမြှုပ်နှံမှုနှင့် နိုင်ငံခြားစီးပွား ဆက်သွယ်ရေး ဝန်ကြီးဌာန၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာန၊ စက်မှုဝန်ကြီးဌာန၊ အလုပ်သမားဝန်ကြီးဌာန၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ ပြည်ထောင်စုသမ္မတမြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များ အသင်းချုပ်နှင့် မြန်မာနိုင်ငံ လူငယ်စွန့်ဦးတီထွင် လုပ်ငန်းရှင်များ အသင်းတို့မှ လုပ်ငန်းသုံးသပ်မှု အစီရင်ခံရေးအဖွဲ့ဝင်များ တက်ရောက်ကြပါသည်။
ရှေးဦးစွာ လုပ်ငန်းသုံးသပ်မှုအစီရင်ခံရေးအဖွဲ့ ဥက္ကဋ္ဌ ဒုတိယဝန်ကြီး ဒေါ်သန်းသန်းလင်းက အဖွင့်အမှာစကား ပြောကြားရာတွင် (၂/၂၀၂၄) ကြိမ်မြောက် အစည်းအဝေးကို ၁၄-၅-၂၀၂၄ ရက်နေ့တွင်ကျင်းပခဲ့ပြီး ယနေ့တွင် (၃/၂၀၂၄) ကြိမ်မြောက် အစည်းအဝေးကို ကျင်ပခြင်းဖြစ် ကြောင်း၊ ပြီးခဲ့သည့်အစည်းအဝေးတွင် ၂၀၂၃-၂၀၂၄ ဘဏ္ဍာနှစ်အတွင်း မိမိတို့အဖွဲ့၏ လုပ်ငန်း ဆောင်ရွက်ချက်များကို ပြန်လည်သုံးသပ်ခဲ့ပြီး လာမည့် ၂၀၂၄-၂၀၂၅ ဘဏ္ဍာနှစ်အတွင်း ဆက်လက် ဆောင်ရွက်မည့် အစီအစဉ်များကို ညှိနှိုင်းဆွေးနွေးခဲ့ကြောင်း၊ အစည်းအဝေးတွင် ဆွေးနွေးချက် များအရ အထောက်အကူပြုလုပ်ငန်းအဖွဲ့ (၄)ဖွဲ့က ၂၀၂၄-၂၀၂၅ ဘဏ္ဍာနှစ်အတွင်း ၎င်းတို့ ဆောင်ရွက်မည့် လုပ်ငန်းအစီအစဉ် (Timeline and Schedule) များ ပေးပို့ထားကြောင်း၊ လုပ်ငန်းအဖွဲ့များအနေဖြင့် မိမိတို့၏ (Timeline and Schedule) နှင့်အညီ ဆောင်ရွက်ရန်လည်း တိုက်တွန်းပြောကြားလိုကြောင်း၊ MSME လုပ်ငန်းများ ဖွံ့ဖြိုးတိုးတက်ရေး အေဂျင်စီနှင့် MSME လုပ်ငန်းများ ဖွံ့ဖြိုးတိုးတက်ရေး ရန်ပုံငွေစီမံခန့်ခွဲမှုအဖွဲ့တို့၏ ၂၀၂၃-၂၀၂၄ ဘဏ္ဍာနှစ်၊ (၁-၄-၂၀၂၃ ရက်နေ့မှ ၃၁-၃-၂၀၂၄ ရက်နေ့အထိ) လုပ်ငန်းဆောင်ရွက်မှု အခြေအနေအစီရင်ခံစာကို MSME လုပ်ငန်းများ ဖွံ့ဖြိုးတိုးတက်ရေး လုပ်ငန်းကော်မတီသို့ တင်ပြခဲ့ကြောင်း၊ သက်ရောက်မှုများအား ဆန်းစစ်သုံးသပ်ရေးလုပ်ငန်း အဖွဲ့ကလည်း သက်ရောက်မှုမြင့်မားသည့် MSME လုပ်ငန်း(၁၉)မျိုး အနက် (၇) မျိုး၏ ပတ်ဝန်းကျင်သက်ရောက်မှုများနှင့် ပတ်ဝန်းကျင်ထိခိုက်မှုလျော့ပါးစေရေး နည်းလမ်းများကို ပြုစုတင်ပြထားကြောင်း၊ ဗဟိုစာရင်းအင်းအဖွဲ့မှ MSME Survey ကောက်ယူရန် ဆောင်ရွက်လျက်ရှိကြောင်း၊  မိမိတို့အဖွဲ့အနေဖြင့် ၂၀၂၃-၂၀၂၄ ဘဏ္ဍာနှစ်ကဲ့သို့ ၂၀၂၄-၂၀၂၅ ဘဏ္ဍာနှစ်တွင်လည်း MSME လုပ်ငန်းများ ဖွံ့ဖြိုးတိုးတက်ရေးအတွက် အထောက်အကူပြုစေမည့် အစီရင်ခံစာများ လုပ်ငန်းကော်မတီသို့ စဉ်ဆက်မပြတ် တင်ပြနိုင်ရေး ဆောင်ရွက်ရမည်ဖြစ်ကြောင်း၊ အထောက်အကူပြုလုပ်ငန်းအဖွဲ့များက တင်ပြထားသည့် လုပ်ငန်းအစီအစဉ် (Timeline and Schedule)များအပြင် MSME ဖွံ့ဖြိုးတိုးတက်ရေးအတွက် မည်သို့ထပ်မံဆောင်ရွက်နိုင်သည် ဆိုသည့် အချက်များကို ဆွေးနွေးပေးစေလိုကြောင်း ပြောကြားပါသည်။
ထို့နောက် လုပ်ငန်းသုံးသပ်မှုအစီရင်ခံရေးအဖွဲ့ အတွင်းရေးမှူးက လုပ်ငန်းသုံးသပ်မှု အစီရင်ခံရေးအဖွဲ့၏ (၂/၂၀၂၄) ကြိမ်မြောက် အစည်းအဝေး ဆုံးဖြတ်ချက်များအပေါ် ဆောင်ရွက် ပြီးစီးမှုအခြေအနေများ၊ လုပ်ငန်းသုံးသပ်မှုအစီရင်ခံရေးအဖွဲ့၏ လုပ်ငန်းဆောင်ရွက်ချက်များ၊ ၂၀၂၄-၂၀၂၅ ဘဏ္ဍာနှစ်တွင် အထောက်အကူပြုလုပ်ငန်းအဖွဲ့များက  အစီရင်ခံစာတင်ပြမည့် အစီအစဉ်များအား ရှင်းလင်းတင်ပြပါသည်။ 
ဆက်လက်၍ အထောက်အကူပြုလုပ်ငန်းအဖွဲ့ (၄)ဖွဲ့က အဖွဲ့တစ်ခုချင်းအလိုက် လုပ်ငန်း ဆောင်ရွက်မှု အခြေအနေများ၊ ရှေ့ဆက်လက်ဆောင်ရွက်မည့် လုပ်ငန်းစဉ်များနှင့် စပ်လျဉ်း၍ ဆွေးနွေးတင်ပြကြပါသည်။
ထို့နောက် အသေးစား၊ အငယ်စားနှင့် အလတ်စား စီးပွားရေးလုပ်ငန်းများ ဖွံ့ဖြိုးတိုးတက် ရေးလုပ်ငန်းသုံးသပ်မှုအစီရင်ခံရေးအဖွဲ့ ဥက္ကဋ္ဌ ဒုတိယဝန်ကြီးက အစည်းအဝေးတွင် MSME လုပ်ငန်းများ ဖွံ့ဖြိုးတိုးတက်ရေးနှင့် စပ်လျဉ်းသည့် သတင်းအချက်အလက်များကို ဝေမျှခြင်း၊ အမြင်ဖလှယ်ခြင်းတို့ ဆောင်ရွက်နိုင်သည့်အတွက် များစွာအကျိုးရှိကြောင်း၊ ယခုကဲ့သို့ဆွေးနွေး မှသာ ဆောင်ရွက်ရမည့် လုပ်ငန်းများနှင့် အခက်အခဲများကို သိရှိနိုင်မည်ဖြစ်ကြောင်း၊ MSME Survey ကောက်ယူရာတွင်လည်း သက်ဆိုင်ရာဌာနများမှ ပူးပေါင်းကူညီဆောင်ရွက်ပေးစေ လိုကြောင်း  လမ်းညွှန်မှာကြားခဲ့ပါသည်။        

သတင်းစဉ်