နိုင်ငံတော် ဖွံ့ဖြိုးတိုးတက်ရေးအတွက် လက်တွေ့ကျသော စီမံကိန်းများ ရေးဆွဲရေး ညှိနှိုင်းအစည်းအဝေး ကျင်းပ

၂၀၁၈ ခုနှစ် အောက်တိုဘာလ ၁ ရက်နေ့မှ ၂၀၁၉ ခုနှစ် စက်တင်ဘာလ ၃၁ ရက်နေ့အထိ ပြောင်းလဲကျင့်သုံးမည့် ၂၀၁၈-၂၀၁၉ ဘဏ္ဍာရေးနှစ်တွင် နိုင်ငံတော် ဖွံ့ဖြိုးတိုးတက်ရေးအတွက်  လက်တွေ့ကျသည့် စီမံကိန်းများ ရေးဆွဲအကောင်အထည် ဖော်နိုင်ရန် တိုင်းဒေသကြီး/ ပြည်နယ် များ၏ ပုဂ္ဂလိက ကုန်ထုတ်လုပ်မှု၊ ဝန်ဆောင်မှု၊ ကုန်သွယ်မှုလုပ်ငန်းများနှင့် ရင်းနှီးမြှုပ်နှံမှု လုပ်ငန်းများ စိစစ်မှတ်တမ်းပြုရေး ညှိနှိုင်းအစည်းအဝေးကို ယနေ့ နံနက် ၉ နာရီတွင် စီမံကိန်း နှင့် ဘဏ္ဍာရေးဝန်ကြီးဌာန ရုံးအမှတ် (၁) အစည်းအဝေးခန်းမ၌ ကျင်းပရာ ပြည်ထောင်စုဝန်ကြီး ဦးကျော်ဝင်း တက်ရောက် အဖွင့်အမှာစကား ပြောကြားသည်။

          ပြည်ထောင်စုဝန်ကြီးက ယနေ့အစည်းအဝေးကို ဘဏ္ဍာရေးနှစ် အချိန်ကာလ ပြောင်းလဲ ကျင့်သုံးမည့် ၂၀၁၈-၂၀၁၉ ဘဏ္ဍာနှစ်တွင် နိုင်ငံတော်ဖွံ့ဖြိုးတိုးတက်ရန် လက်တွေ့ကျသည့် စီမံကိန်းများ ရေးဆွဲ အကောင်အထည်ဖော်နိုင်ရေးအတွက် ရည်ရွယ်ကျင်းပရခြင်းဖြစ်ပါကြောင်း၊

အဆိုပါ စီမံကိန်းများရေးဆွဲရာတွင် ဖွံ့ဖြိုးတိုးတက်မှုကို တိုင်းတာသည့် GDP စာရင်းများကို ပြောင်းလဲနေသည့် စီးပွားရေးဆိုင်ရာ အချက်အလက်များနှင့်အညီ ပကတိ အခြေအနေကို ထင်ဟပ်သည့် အနီးစပ်ဆုံး ကိန်းဂဏန်းများဖြင့် တွက်ချက်တိုင်းတာနိုင်ရန် လိုအပ်ကြောင်း၊ နိုင်ငံ၏ လက်ရှိလူဦးရေနှင့် အခြေခံစားသုံးကုန် ပစ္စည်းများ ထုတ်လုပ်နိုင်မှု၊ ပြည်ပသို့ ကုန် ပစ္စည်းတင်ပို့နိုင်မှု တို့ကို အခြေခံ၍ အနာဂတ်တွင် ဖြစ်ပေါ်လာမည့် လူဦးရေ၊ လိုအပ်မည့် အခြေခံ စားသုံးကုန်နှင့် ပြည်ပသို့တင်ပို့နိုင်မည့် ကုန်ပစ္စည်းများကို ခန့်မှန်းကာ တိုင်းဒေသကြီး/ ပြည်နယ် အလိုက် လက်တွေ့ကျသည့် စီမံကိန်းများကို ရေးဆွဲလုပ်ကိုင် ဆောင်ရွက်စေလိုကြောင်း၊ စိုက်ပျိုးရေးအခြေခံ စက်မှုနိုင်ငံ (Agro-based Industrialize Nation) ဖြစ်အောင် ဆောင်ရွက် ကြရမည် ဖြစ်ကြောင်း၊ ဌာန တာဝန်ခံများအနေဖြင့် အချိန်ဇယားများ အလိုက် စနစ်တကျ ရေးဆွဲ စေလိုပါကြောင်း၊ ကဏ္ဍအလိုက် အကောင်အထည်ဖော်မည့် လုပ်ငန်းများအတွက် ကိန်းဂဏန်း များရရှိအောင် နယ်မြေများဒေသအသီးသီးရှိ လိုအပ်သည့်စာရင်းအင်းများကို စုစည်း ဆောင်ရွက် ရမည်ဖြစ်ကြောင်း၊ တိုင်းဒေသကြီး/ ပြည်နယ်အစိုးရများကို ဗဟိုပြု၍ ရရှိလာသည့် စာရင်းအင်း များကို အသေးစိတ် အထပ်ထပ်စစ်ဆေးဆောင်ရွက်စေလိုကြောင်း၊ GDP တွက်ချက်ရာတွင် ပကတိ မြေပြင်အခြေအနေကို မျက်ဝါးထင်ထင် တွေ့မြင်နိုင်မည့် ပါဝင်သင့်သော  စာရင်းအင်း များပါဝင်အောင် ဆောင်ရွက်ရန်လိုကြောင်း၊

          ဗဟိုစာရင်းအင်းအဖွဲ့အနေဖြင့် နိုင်ငံတကာနှင့်ပူးပေါင်း၍ စာရင်းအင်း အချက်အလက်များ ရရှိအောင် လုပ်ငန်းစည်းမျဉ်းများအတိုင်း ဆောင်ရွက်နေသည်များရှိသော်လည်း ပထမဦးစား ပေးအနေဖြင့် မိမိတို့နိုင်ငံ ဖွံ့ဖြိုးတိုးတက်ရေးအတွက် အထောက်အပံ့ဖြစ်မည့် စာရင်းအင်း ကိန်း ဂဏန်းများ ရရှိအောင် ဆောင်ရွက်ကြရမည်ဖြစ်ကြောင်း၊ စာရင်းအင်းများ စုစည်းရရှိရေး အတွက် ဆောင်ရွက်မည့် Work Plan များ ထားရှိပြီး ဆောင်ရွက်ရမည် ဖြစ်ကြောင်း၊ ၎င်း စာရင်းအင်းများကို စိစစ်သုံးသပ်၍ ဆောင်ရွက်ကြရမည် ဖြစ်ကြောင်း၊

          ရင်းနှီးမြှုပ်နှံမှုနှင့်ကုမ္ပဏီများ ညွှန်ကြားမှုဦးစီးဌာန ဦးစီးမှူးများအနေဖြင့် တိုင်း ဒေသကြီး/ ပြည်နယ်အလိုက် ရင်းနှီးမြှုပ်နှံမှု တိုးတက်အောင် ဆောင်ရွက်ရန်သာမက တစ်နိုင်ငံ လုံး၏ စီးပွားရေးကို လွှမ်းခြုံကြည့်ရှုနိုင်ရန် လိုအပ်ကြောင်း၊ ရင်းနှီးမြှုပ်နှံမှု တိုးမြင့်လာရေး အတွက် အချို့သော အတားအဆီးများကို ဖြေလျှော့နိုင်မည့် နည်းလမ်းများအား ရှာဖွေ တင်ပြ ဆောင်ရွက်ကြရမည်ဖြစ်ကြောင်း၊ ဌာနအလိုက် လုပ်ငန်း တာဝန်များကို ကျေကျေပွန်ပွန်ဖြင့် အလေးအနက်ထား ဆောင်ရွက်ကြစေလိုကြောင်း၊ ထူးချွန်ထက်မြက်စွာ ဆောင်ရွက်နိုင်သည့် နိုင်ငံ့ ဝန်ထမ်းများအား ဂုဏ်ပြုချီးမြှင့်သွားမည် ဖြစ်ကြောင်း၊ တိုင်းဒေသကြီး/ ပြည်နယ် အစိုးရ များ၏ အထောက်အကူ ရယူ၍ ကျွမ်းကျင်လိမ္မာစွာဖြင့် ဆောင်ရွက်ကြရန် တိုက်တွန်း ပြောကြား သည်။

ထို့နောက် စီမံကိန်းရေးဆွဲရေးဦးစီးဌာန ညွှန်ကြားရေးမှူးချုပ် ဦးမောင်မောင်တင့်က တိုင်းဒေသကြီး/ ပြည်နယ်များ၏ ပုဂ္ဂလိက လုပ်ငန်းဦးရေစာရင်း ကောက်ယူစုစည်းနိုင်မှု ကို လည်းကောင်း၊ ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာ ဒေါ်ဝါဝါမောင်က တိုင်းဒေသကြီး/ ပြည်နယ်များတွင် ယခင်ကောက်ယူခဲ့သည့် စစ်တမ်းများနှင့် နောင်လာမည့် ကာလများတွင် ဆောင်ရွက်မည့် စစ်တမ်းများကို လည်းကောင်း၊ ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာန ဒုတိယညွှန်ကြားရေးမှူးချုပ် ဦးသန့်စင်လွင်က တိုင်းဒေသကြီး/ ပြည်နယ် အလိုက် ကုမ္ပဏီမှတ်ပုံတင်စာရင်းနှင့် တိုင်းဒေသကြီး/ပြည်နယ် တစ်ခုချင်းစီတွင် မှတ်ပုံ တင်ထားရှိသော လုပ်ငန်းအမျိုးအစားအလိုက် အရေအတွက်နှင့် ရင်းနှီးမြှုပ်နှံမှု ပမာဏကို လည်းကောင်း အသီးသီး ရှင်းလင်းတင်ပြကြသည်။

          အစည်းအဝေးသို့ စီမံကိန်းနှင့် ဘဏ္ဍာရေးဝန်ကြီးဌာနရှိ ဦးစီးဌာန၊ အဖွဲ့အစည်းများမှ ဌာနအကြီးအကဲများ၊  နေပြည်တော်ကောင်စီ၊ တိုင်းဒေသကြီး/ပြည်နယ်များမှ ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန၊ စီမံကိန်းရေးဆွဲရေး ဦးစီးဌာန၊ ဗဟိုစာရင်းအင်းအဖွဲ့တို့မှ ဦးစီးမှူးများ၊ တာဝန်ရှိသူများ တက်ရောက်ကြသည်။

၂၀၁၈ ဇန်နဝါရီ ၁၇ ၊ နေပြည်တော်