နေပြည်တော်၊ ဒီဇင်ဘာလ  ၁၈

   ပြည်တွင်းအခွန်များဦးစီးဌာန ၊ ရုံးအမှတ် ၄၆ ၊ နေပြည်တော်၊ အစည်းအဝေးခန်းမ၌ ၁၈-၁၂-၂၀၁၈ ရက်နေ့ မွန်းလွဲ ၁၃:၃၀ နာရီတွင် အခွန်ထမ်းပြည်သူများအနေဖြင့် အီလက်ထရောနစ်စနစ်များအသုံးပြု၍ အခွန်ပေးဆောင်နိုင်ရေးအတွက် အကောင်အထည်ဖော်ဆောင်ရွက်မည့် လုပ်ငန်းစဉ်များ ရှင်းလင်းဆွေးနွေးပွဲကို ကျင်းပပြုလုပ်ခဲ့ရာ ပြည်တွင်းအခွန်များဦးစီးဌာန၊ ညွှန်ကြားရေးမှူးချုပ် ဦးမင်းထွဋ်မှ အဖွင့်အမှာစကား ပြောကြားခဲ့ပါသည်။အဆိုပါရှင်းလင်းဆွေးနွေးပွဲတွင် ပြည်တွင်းအခွန်များဦးစီးဌာန၊ သတင်းအချက်အလက်နှင့်နည်းပညာဌာနခွဲ ညွှန်ကြားရေးမှူး ဦးတင်မောင်သန့်မှ အခွန်ထမ်းပြည်သူများအနေဖြင့် အီလက်ထရောနစ်စနစ်များအသုံးပြု၍ အခွန်ပေးဆောင်နိုင်ရေးအတွက် အကောင်အထည်ဖော်ဆောင်ရွက်မည့် လုပ်ငန်းစဉ်ဆိုင်ရာကိစ္စရပ်များကို ရှင်းလင်းတင်ပြခဲ့ပြီး မြန်မာနိုင်ငံတော်ဗဟိုဘဏ်၊ ဒုတိယညွှန်ကြားရေးမှူးချုပ်နှင့် တက်ရောက်လာသည့်ဌာနများအလိုက် တာဝန်ရှိသူများမှလည်း ဆွေးနွေးတင်ပြခဲ့ကြပါသည်။

   အဆိုပါ ရှင်းလင်းပွဲဆွေးနွေးပွဲသို့ ပြည်တွင်းအခွန်များဦးစီးဌာနမှ ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများ၊ မြန်မာနိုင်ငံတော်ဗဟိုဘဏ်မှ တာဝန်ရှိသူများ၊ မြန်မာ့စီးပွားရေးဘဏ်မှ တာဝန်ရှိသူများ၊ မြန်မာနိုင်ငံဘဏ်များအသင်းမှ တာဝန်ရှိသူများ၊ MPU မှ တာဝန်ရှိသူများ၊ ပုဂ္ဂလိကဘဏ်များမှ တာဝန်ရှိသူများ၊ မိုဘိုင်းငွေရေးကြေးရေးဝန်ဆောင်မှုအဖွဲ့အစည်းများမှ တာဝန်ရှိသူများနှင့် ပြည်တွင်းအခွန်များဦးစီးဌာနမှ တာဝန်ရှိသူများ တက်ရောက်ဆွေးနွေးခဲ့ကြကြောင်း သိရှိရပါသည်။