မြန်မာနိုင်ငံ၏ ရေရှည်တည်တံ့ခိုင်မြဲပြီးဟန်ချက်ညီသော ဖွံ့ဖြိုးတိုးတက်ရေးစီမံကိန်း ( Myanmar Sustainable Development Plan – MSDP ) ၏ မဏ္ဍိုင် (၁)၊ ပန်းတိုင် (၂)၊ မဟာဗျူဟာ (၅) ရပ်၏ Action Plan များကို အကောင်အထည်ဖော်ဆောင်ရွက်မည့် မေခရိုစီးပွားရေး စီမံခန့်ခွဲမှု ကဏ္ဍဆိုင်ရာ ပေါင်းစပ်ညှိနှိုင်းရေးအဖွဲ့( Macroeconomic Management Sector Coordination Group – MMSCG) ၏ လုပ်ငန်းဆောင်ရွက်တိုးတက်မှုအခြေအနေများနှင့် စပ်လျဉ်း၍ ဆဋ္ဌမအကြိမ်မြောက် အစည်းအဝေးအား ၂၀၂၀ ပြည့်နှစ်၊ ဖေဖော်ဝါရီလ ၂၀ ရက်နေ့တွင် Park Poyal Hotel ၊ နေပြည်တော်၌ ကျင်းပခဲ့ပါသည်။ အဆိုပါ အစည်းအဝေးအား မေခရိုစီးပွားရေးစီမံခန့်ခွဲမှုကဏ္ဍဆိုင်ရာ ပေါင်းစပ်ညှိနှိုင်းရေး အဖွဲ့ ဒုတိယဥက္ကဋ္ဌ၊ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ ဒုတိယဝန်ကြီး၊ ဦးမောင်မောင်ဝင်းမှ ဦးဆောင်ခဲ့ပြီး MMSCG အောက်ရှိ လုပ်ငန်းအဖွဲ့ (၅) ဖွဲ့မှ အဖွဲ့ခေါင်းဆောင်များနှင့် ဖိတ်ကြားထားသည့် တာဝန်ရှိပုဂ္ဂိုလ်များ ၊ ဖွံ့ဖြိုးမှုမိတ်ဖက်အဖွဲ့အစည်းများမှ ကိုယ်စားလှယ်များ တက်ရောက်ခဲ့ကြပါသည်။

အစည်းအဝေးတွင် မေခရိုစီးပွားရေး စီမံခန့်ခွဲမှုအခြေအနေနှင့် ဖွံ့ဖြိုးတိုးတက်မှု ဆောင်ရွက်ချက် များအပေါ် ဒုတိယဝန်ကြီးမှ ရှင်းလင်းပြောကြားခဲ့ပြီး လုပ်ငန်းအဖွဲ့ (၅) ဖွဲ့ ဖြစ်သည့် ရငွေကြိုတင်ခန့်မှန်း ရေးနှင့် စီမံကြီးကြပ်ရေးအဖွဲ့၊ အသုံးစရိတ် စီမံခန့်ခွဲရေးအဖွဲ့၊ ဘဏ္ဍာငွေဖြည့်ဆည်းရေးနှင့် ဆုံးရှုံးနိုင် ခြေစီမံခန့်ခွဲရေးအဖွဲ့၊ နှစ်လတ်ဘဏ္ဍာရေးမူဘောင်ရေးဆွဲပြုစုရေးအဖွဲ့နှင့် မြန်မာနိုင်ငံတော်ဗဟိုဘဏ်နှင့် စီမံကိန်း၊ ဘဏ္ဍာရေးနှင့်စက်မှုဝန်ကြီးဌာနတို့ ပေါင်းစပ်ညှိနှိုင်းရေးလုပ်ငန်းအဖွဲ့တို့၏ အဖွဲ့ခေါင်းဆောင် များမှ လုပ်ငန်းအဖွဲ့အလိုက် လက်ရှိဆောင်ရွက်ထားရှိမှုအခြေအနေများ၊ တိုးတက်မှုများ၊ ကြုံတွေ့ရသည့် စိန်ခေါ်မှုများ နှင့် ရှေ့ဆက်လက်ဆောင်ရွက်မည့် ကိစ္စရပ်များကို ရှင်းလင်းတင်ပြခဲ့ရာ World Bank, IMF, EU, UNICEF, ADB, JICA, DFID, DFAT, Spectrum, USAID စသည့် ဖွံ့ဖြိုးမှုမိတ်ဖက် အဖွဲ့အစည်းများမှ တက်ရောက်လာကြသော ကိုယ်စားလှယ်များက ဆွေးနွေးမေးမြန်းခြင်း၊ အဖွဲ့များ၏ လုပ်ငန်းဆောင်ရွက်မှုများနှင့်ပတ်သက်၍ အကြုံပြုဆွေးနွေးခြင်းနှင့် အခြားတက်ရောက်လာသူများမှ ဆွေးနွေးခြင်းတို့ ပြုလုပ်ခဲ့ကြပါသည်။ ထို့နောက် မေခရိုစီးပွားရေးစီမံခန့်ခွဲမှုကဏ္ဍဆိုင်ရာ ပေါင်းစပ်ညှိနှိုင်း ရေးအဖွဲ့ ဒုတိယဥက္ကဋ္ဌ၊ စီမံကိန်း၊ ဘဏ္ဍာရေးနှင့်စက်မှုဝန်ကြီးဌာန၊ ဒုတိယဝန်ကြီး၊ ဦးမောင်မောင်ဝင်းမှ ဖြည့်စွက်ဆွေးနွေးခြင်းနှင့် ရှေ့ဆက်လက်ဆောင်ရွက်မည့်လုပ်ငန်းစဉ်များအပေါ် လမ်းညွှန်မှုများပြုလုပ် ခဲ့ပါသည်။