ဂျပန်နိုင်ငံအစိုးရမှ ပြည်ထောင်စုသမ္မတ မြန်မာနိုင်ငံတော် အစိုးရသို့ အကူအညီပေးရေး ဆိုင်ရာ စာချွန်လွှာနှစ်ခု လက်မှတ်ရေးထိုးလဲလှယ်ပွဲ အခမ်းအနားကို ယနေ့ ညနေ ၃ နာရီတွင်   စီမံကိန်းနှင့် ဘဏ္ဍာရေးဝန်ကြီးဌာန ရုံးအမှတ်(၁) အစည်းအဝေးခန်းမ၌ ကျင်းပခဲ့ပါသည်။

 အခမ်းနားတွင်  မြန်မာနိုင်ငံ၏ လျှပ်စစ်ဓါတ်အား ထုတ်လုပ်ရေးလုပ်ငန်း အဆင့်မြှင့်တင်ရေး စီမံချက် အကောင်အထည်ဖော်ရန်အတွက် ဂျပန်ယန်း သန်း ၂၅၀၀ နှင့် ထားဝယ်အထွေထွေ ရောဂါကုဆေးရုံကြီးအဆင့်မြှင့်တင်ရေးစီမံချက် အကောင်အထည်ဖော်ရန်အတွက် ဂျပန်ယန်း ၂၆၆၅ သန်း အကူအညီပေးရေးဆိုင်ရာစာချွန်လွှာများကို ပြည်ထောင်စုသမ္မတ မြန်မာနိုင်ငံတော်အစိုးရ ကိုယ်စား စီမံကိန်းနှင့်ဘဏ္ဍာရေး၀န်ကြီးဌာန၊ ဒုတိယဝန်ကြီး ဦးဆက်အောင်နှင့် ဂျပန်နိုင်ငံ အစိုးရ ကိုယ်စား မြန်မာနိုင်ငံဆိုင်ရာ ဂျပန်သံအမတ်ကြီး Mr. Tateshi HIGUCHI တို့က လက်မှတ်ရေးထိုးလဲလှယ်ခဲ့ကြသည်။

အဆိုပါစာချွန်လွှာများကို လက်မှတ်ရေးထိုးလဲလှယ်ခြင်းဖြင့် မြန်မာ-ဂျပန် နှစ်နိုင်ငံအကြား စီးပွားရေးပူးပေါင်းဆောင်ရွက်မှုနှင့် ချစ်ကြည်ရင်းနှီးမှု အပြန်အလှန်တိုးတက်စေမည်ဖြစ်သည်။ စာချွန်လွှာများအရ မြန်မာနိုင်ငံ၏ လျှပ်စစ်ဓာတ်အား ထုတ်လုပ်ရေးလုပ်ငန်းများ အဆင့်မြှင့်တင် နိုင်၍ ပြည်သူတို့၏ လူမှု စီးပွားဖွံ့ဖြိုးတိုးတက်ရေးကို အထောက်အကူပြုနိုင်မည် ဖြစ်သည့်အပြင် ထားဝယ်အထွေထွေရောဂါကုဆေးရုံကြီးကို အဆင့်မြှင့်တင်နိုင်မည်ဖြစ်သဖြင့် ယင်းဒေသရှိ ဒေသခံ ပြည်သူများ၏ကျန်းမာရေးစောင့်ရှောက်မှုလုပ်ငန်းများအတွက် များစွာ အထောက်အကူ ရရှိနိုင်မည် ဖြစ်ပါသည်။ အဆိုပါစီမံချက် နှစ်ခုအတွက် ဂျပန်နိုင်ငံအစိုးရမှ စုစုပေါင်းအကူအညီ ဂျပန်ယငန်း ၅၁၆၅ သန်းပေးအပ်မည်ဖြစ်သည်။

အခမ်းအနားသို့ စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး ဉီးဆက်အောင်၊ ဒုတိယဝန်ကြီးများ၊ ဒုတိယရှေ့နေချုပ်၊ အမြဲတမ်းအတွင်းဝန်များ၊ ညွှန်ကြားရေးမှူးချုပ်များ၊ ဒုတိယ ညွှန်ကြားရေးမှူးချုပ်များ၊ ဂျပန်နိုင်ငံဘက်မှ မြန်မာနိုင်ငံဆိုင်ရာ ဂျပန်သံအမတ်ကြီး Mr. Tateshi HIGUCHI  နှင့်  ဂျပန်သံရုံးမှ တာဝန်ရှိသူများ တက်ရောက်ကြပါသည်။