![](http://www.mopf.gov.mm/sites/default/files/sites/default/files/DAQS_5_1.jpg)
နေပြည်တော်၊ ဇူလိုင်လ (၂၆) ရက်
စီမံကိန်းနှင့် ဘဏ္ဍာရေးဝန်ကြီးဌာနမှ စာရင်းအင်းအချက်အလက် မှန်ကန်ရေးနှင့် အရည်အသွေးပြည့်ဝရေး ဗဟိုကော်မတီ (၁/၂၀၁၈) အစည်းအဝေးကို ၂၀၁၈ခုနှစ်၊ ဇူလိုင်လ (၂၆) ရက်နေ့၊ နံနက် (၈:၃၀) နာရီတွင် စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ် (၁) အစည်း အဝေးခန်းမ၌ကျင်းပရာ စာရင်းအင်းအချက်အလက် မှန်ကန်ရေးနှင့် အရည်အသွေးပြည့်ဝရေး ဗဟိုကော်မတီဥက္ကဋ္ဌ၊ ဒုတိယသမ္မတ(၂) ဦးဟင်နရီဗန်ထီးယူမှ အဖွင့်အမှာစကား ပြောကြား ခဲ့ပါသည်။
စာရင်းအင်းအချက်အလက် မှန်ကန်ရေးနှင့် အရည်အသွေးပြည့်ဝရေး ဗဟိုကော်မတီ ဥက္ကဋ္ဌ၊ ဒုတိယသမ္မတ(၂) ဦးဟင်နရီဗန်ထီးယူမှ ပြောကြားရာတွင် ယခင် စာရင်းအင်း အချက်အလက်များ မှန်ကန်ရေးနှင့်အရည်အသွေးပြည့်ဝရေး ကော်မတီကို နိုင်ငံတော် သမ္မတ ရုံး၏ အမိန့်ကြော်ငြာစာအမှတ်၊ ၇/၂၀၁၆ ဖြင့်ဖွဲ့စည်းခဲ့ပြီး ကော်မတီ အစည်းအဝေးကိုလည်း (၆)ကြိမ် ကျင်းပနိုင်ခဲ့ပြီး ဖြစ်ပါကြောင်း၊ ယခုအခါ ၂၀၁၈ ခုနှစ် ဇန်နဝါရီလ ၂၂ ရက်နေ့တွင် ပြဋ္ဌာန်းခဲ့သည့် ပြည်ထောင်စုလွှတ်တော် ဥပဒေအမှတ် ၁/၂၀၁၈ စာရင်းအင်းဥပဒေအရ စာရင်းအင်း အချက်အလက်မှန်ကန်ရေးနှင့် အရည်အသွေးပြည့်ဝရေး ဗဟိုကော်မတီကို ၂၀၁၈ ခုနှစ် ဇွန်လ (၂၆)ရက် ရက်စွဲပါ ပြည်ထောင်စုအစိုးရအဖွဲ့ အမိန့်ကြော်ငြာစာ အမှတ် ၇၄/၂၀၁၈ ဖြင့် စာရင်းအင်းနှင့် သက်ဆိုင်သည့် ဝန်ကြီးဌာနများ၏ ပြည်ထောင်စုဝန်ကြီးများအား ဗဟို ကော်မတီအဖွဲ့ဝင်များအဖြစ် ပါဝင်စေပြီး အဆင့်မြှင့်တင် ဖွဲ့စည်းလိုက်ပြီ ဖြစ်ပါကြောင်း ပြောကြားခဲ့ပါသည်။
ထို့နောက် စာရင်းအင်းအချက်အလက်မှန်ကန်ရေးသည် ဖွံ့ဖြိုးပြီး နိုင်ငံများသာမက ဖွံ့ဖြိုးဆဲ နိုင်ငံများအတွက်ပါ အလွန်အရေးပါပါကြောင်း၊ နိုင်ငံဖွံ့ဖြိုးရေးအတွက် အခြေခံ ဖြစ်သည့် စာရင်းအင်းများ ရှေ့နောက်ညီညွတ်မှုရှိစေရန်၊ ယုံကြည်ကိုးစားနိုင်၍ ခိုင်မာသော စာရင်းအင်းများ အချိန်မီရရှိရန် လိုအပ်လျက်ရှိပါကြောင်း၊ နိုင်ငံတစ်နိုင်ငံ၏ အမျိုးသား စာရင်းအင်းစနစ် အရည်အသွေး ပြည့်ဝမှသာလျှင် မူဝါဒချမှတ်သူများ၊ စီမံကိန်းရေးဆွဲသူများ၊ ပုဂ္ဂလိကလုပ်ငန်းရှင်များ၊ လူမှု- သယံဇာတများ ခွဲဝေချထားရာတွင်လည်းကောင်း၊ ထည့်သွင်း စဉ်းစားရမည့် အချက်အလက်များ ရရှိနိုင်မှာဖြစ်ပါကြောင်း၊ စီးပွားရေးလုပ်ငန်းရှင်များ အနေဖြင့် လည်း အချက်အလက်များအပေါ် အခြေခံ၍ ရင်းနှီးမြှုပ်နှံမှုများကို ဆောင်ရွက်မှသာလျှင် အရှုံးဖြစ်ပေါ်နိုင်မှုနှင့် စွန့်စားရမှု (Risk Management) တို့ကို စီမံခန့်ခွဲနိုင်မှာ ဖြစ်ပါကြောင်း၊ မိမိတို့နိုင်ငံသည် ဖွံ့ဖြိုးဆဲနိုင်ငံ ဖြစ်ခြင်းကြောင့် အချိန်၊ ငွေကြေးနှင့် လူအင်အားစသည့် ရင်းမြစ်များ အကန့်အသတ်နှင့် တည်ရှိနေပါ၍တတ်နိုင်သမျှ စာရင်းအင်းဆိုင်ရာ ရင်းနှီး မြှုပ်နှံမှုကို အထိရောက်ဆုံး အသုံးချနိုင်ရန် အရေးကြီးပါကြောင်း၊ အချက်အလက်များကို မူဝါဒ အဖြစ်ပြောင်းလဲနိုင်ခြင်း “From Data to Policy” ဖြစ်ပါ၍ ဖော်ထုတ်သုံးတတ်ပါက စာရင်းအင်းဆိုင်ရာ ရင်းနှီးမြှုပ်နှံမှု၏ရလဒ်သည် အလွန်ကြီးမားပါကြောင်း အဖွင့်အမှာစကား ပြောကြားခဲ့ပါသည်။
စာရင်းအင်းများ ပိုမိုတိကျမှန်ကန်စေရေးအတွက် အချိန်၊ လူအင်အား၊ နည်းပညာ အခြေခံအဆောက်အအုံများ လိုအပ်ခြင်းကြောင့် စာရင်းအင်းကဏ္ဍတွင် ရင်းနှီးမြှုပ်နှံရန် လိုအပ် ပါကြောင်း၊ ပြဋ္ဌာန်းလိုက်သည့် စာရင်းအင်းဥပဒေကို အသုံးပြုပြီး သက်ဆိုင်ရာ စာရင်းအင်း နယ်ပယ်များကို တိုးတက်အောင် ဆောင်ရွက်ကြရမည် ဖြစ်ပါကြောင်း၊ “ Better Data, Better Statistics, Better Life” ဆိုသည့်အတိုင်း စာရင်းအင်း အချက်အလက် မှန်ကန်ရေးနှင့် အရည်အသွေးပြည့်ဝရေးဗဟိုကော်မတီ၏ ဦးဆောင်လမ်းညွှန်မှုကို လိုက်နာပြီး မြန်မာပြည်သူ တို့၏ လူနေမှုဘဝကို မြှင့်တင်ပေးနိုင်ရန်အတွက် စာရင်းအင်းစနစ် ဖွံ့ဖြိုးတိုးတက်ရန် လိုအပ်ပါကြောင်း၊ သက်ဆိုင်ရာဝန်ကြီးဌာနများ၊ ဖွံ့ဖြိုးမှုမိတ်ဖက်များ၊ ပညာရှင်များ၊ ပုဂ္ဂလိက ကဏ္ဍ၊ လူမှုအဖွဲ့အစည်းများနှင့်အတူ လက်တွဲပူးပေါင်း၍ တိုးတက်မှုများကို အရှိန်အဟုန်မြှင့်ကာ ဆက်လက်ဆောင်ရွက်ကြရန် လိုအပ်ပါကြောင်း ပြောကြားခဲ့ပါသည်။
ဆက်လက်၍ စာရင်းအင်းအချက်အလက် မှန်ကန်ရေးနှင့် အရည်အသွေးပြည့်ဝရေး ဗဟိုကော်မတီအတွင်းရေးမှူး၊ဗဟိုစာရင်းအင်းအဖွဲ့ ညွှန်ကြားရေးမှူးချုပ်ဒေါက်တာဝါဝါမောင်မှ ယခင်စာရင်းအင်းအချက်အလက်များ မှန်ကန်ရေးနှင့် အရည်အသွေး ပြည့်ဝရေးကော်မတီ၏ ကျင်းပခဲ့သည့် အစည်းအဝေးများ၊ (၃/၂၀၁၇)အစည်းအဝေးတွင် ဆုံးဖြတ်ခဲ့ကြသည့် ဆုံးဖြတ် ချက်များနှင့် ဆောင်ရွက်ချက်များကို ရှင်းလင်းတင်ပြခြင်း၊ စာရင်းအင်းဥပဒေနှင့် စာရင်းအင်း အချက်အလက် မှန်ကန်ရေးနှင့် အရည်အသွေးပြည့်ဝရေး ဗဟိုကော်မတီ ဖွဲ့စည်းရခြင်း၏ ရည်ရွယ်ချက်များနှင့် လုပ်ငန်းတာဝန်များ၊ လုပ်ပိုင်ခွင့်များ၊ စာရင်းအင်းဆိုင်ရာ အမျိုးသား အဆင့်မဟာဗျူဟာ(NSDS) ဖော်ဆောင်နေမှု၏ အခန်းကဏ္ဍနှင့် လုပ်ငန်းစဉ်များ၊ မူဝါဒ အနှစ်ချုပ်များအကြောင်း ရှင်းလင်းတင်ပြခြင်း၊ ဗဟိုစာရင်းအင်းအဖွဲ့မှ ဆောင်ရွက်ခဲ့သည့် မြန်မာနေထိုင်မှုအခြေအနေစစ်တမ်း(၂၀၁၇) အဓိကညွှန်ကိန်းများအစီရင်ခံစာ၊ မြန်မာနိုင်ငံ တစ်ပိုင်တစ်နိုင်၊ အသေးစားနှင့် အလတ်စား စီးပွားရေးလုပ်ငန်း(ကုန်ထုတ်လုပ်မှု) စစ်တမ်း (၂၀၁၇) အစီရင်ခံစာ၊ သဘာဝဘေးအန္တရာယ်နှင့် စပ်လျဉ်း၍ ကနဦးလိုအပ်ချက်များ သိရှိနိုင်ရန် အတွက် ကွင်းဆင်းကောက်ယူခဲ့သည့် အစီရင်ခံစာများနှင့် စီးပွားရေးလုပ်ငန်းများ အမျိုးအစား ခွဲခြားခြင်းဆိုင်ရာ မြန်မာစံပြုသင်္ကေတများ၊ စီးပွားရေးစစ်တမ်းများအတွက် စစ်တမ်း မူဘောင်များ ရရှိရန်အတွက် Statistical Business Registers (SBR) ဆောင်ရွက်ခြင်း၊ CRVS စနစ်၊ မွေးဖွားမှုနှင့်သေဆုံးမှု မှတ်ပုံတင်ခြင်းဆိုင်ရာလုပ်ငန်းများ ပူးပေါင်း ဆောင်ရွက် နေမှုများ နှင့် ပတ်သက်၍ ရှင်းလင်းတင်ပြခဲ့ပါသည်။
ထို့နောက် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ ၂၀၁၈ခုနှစ်တွင် ကောက်ယူခဲ့သည့် တိရစ္ဆာန်သန်းခေါင်စာရင်းကောက်ယူခြင်းလုပ်ငန်းအား ရှင်းလင်းတင်ပြ ခြင်း၊ လျှပ်စစ်နှင့် စွမ်းအင်ဝန်ကြီးဌာန၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနတို့မှ ပြည်ထောင်စုဝန်ကြီးများ၊ ပို့ဆောင်ရေးနှင့် ဆက်သွယ်ရေးဝန်ကြီးဌာန ဒုတိယဝန်ကြီး၊ မြန်မာနိုင်ငံတော်ဗဟိုဘဏ် ဒုတိယ ဥက္ကဋ္ဌ၊ တိုင်းဒေသကြီးနှင့် ပြည်နယ်အစိုးရအဖွဲ့များမှ စီးပွားရေးနှင့်သက်ဆိုင်သည့် ဝန်ကြီးများ၊ စာရင်းအင်းဆိုင်ရာ ဖွံ့ဖြိုးမှု အမျိုးသားအဆင့် မဟာဗျူဟာ ဖော်ဆောင်နိုင်ရေး လုပ်ငန်းအဖွဲ့ ခေါင်းဆောင်များမှ သက်ဆိုင်ရာကဏ္ဍအလိုက် ရှင်းလင်း တင်ပြခဲ့ပါသည်။
ဆက်လက်၍ အစည်းအဝေးတက်ရောက်လာသူများမှ ကဏ္ဍအလိုက် ဝိုင်းဝန်းဆွေးနွေး တင်ပြကြပြီးတင်ပြချက်များအပေါ် စီမံကိန်းနှင့်ဘဏ္ဍာရေးဝန်ကြီးဌာန ပြည်ထောင်စုဝန်ကြီးမှ ပြန်လည် ဆွေးနွေးတင်ပြခဲ့ပြီးနောက် စာရင်းအင်းအချက်အလက် မှန်ကန်ရေးနှင့် အရည်အသွေး ပြည့်ဝရေးဗဟိုကော်မတီဥက္ကဋ္ဌ၊ ဒုတိယသမ္မတ(၂)ဦးဟင်နရီဗန်ထီးယူမှ ဗဟို စာရင်းအင်း အဖွဲ့နှင့် သက်ဆိုင်ရာဝန်ကြီးဌာနများ၊ တိုင်းဒေသကြီး/ပြည်နယ်များနှင့် ပူးပေါင်းညှိနှိုင်း၍ စာရင်းဇယားများ မှန်ကန်ရေးနှင့် အရည်အသွေးပြည့်ဝရေး၊ အချိန်နှင့်တစ်ပြေးညီ ရရှိနိုင်ရေး အတွက် ဆောင်ရွက်ကြရမည်ဖြစ်ကြောင်း၊ သက်ဆိုင်ရာ ဌာနများအနေဖြင့် မိမိတို့၏ စာရင်းအင်းများကို တာဝန်ခံမှု တာဝန်ယူမှုဖြင့် ဆောင်ရွက်ကြပြီး ဌာနများအကြား Data Sharing လုပ်၍ ပူးပေါင်းဆောင်ရွက်မှသာ စာရင်းအင်းအချက်အလက်များ မှန်ကန်ရေးနှင့် အရည်အသွေးပြည့်ဝရေးလုပ်ငန်းများ အကောင်အထည်ဖော် ဆောင်ရွက်နိုင်မည်ဖြစ်ကြောင်း နိဂုံးချုပ်အမှာစကား ပြောကြား၍ အခမ်းအနားကိုရုပ်သိမ်းခဲ့ပါသည်။
အစည်းအဝေးသို့ စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး၊ သယံဇာတ နှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန ပြည်ထောင်စုဝန်ကြီး၊ လျှပ်စစ်နှင့် စွမ်းအင် ဝန်ကြီးဌာန ပြည်ထောင်စုဝန်ကြီး၊ စက်မှုဝန်ကြီးဌာန ပြည်ထောင်စုဝန်ကြီး၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနပြည်ထောင်စုဝန်ကြီး၊ ပို့ဆောင်ရေးနှင့်ဆက်သွယ်ရေးဝန်ကြီး ဌာန ဒုတိယဝန်ကြီး၊ မြန်မာနိုင်ငံတော်ဗဟိုဘဏ် ဒုတိယဥက္ကဋ္ဌ၊ တိုင်းဒေသကြီးနှင့် ပြည်နယ် အစိုးရအဖွဲ့များမှ စီးပွားရေးနှင့်သက်ဆိုင်သည့် ဝန်ကြီးများ၊ ပြည်ထောင်စုဝန်ကြီးဌာနများမှ အမြဲတမ်းအတွင်းဝန်များ၊ ညွှန်ကြားရေးမှူးချုပ်များ၊ စာရင်းအင်းဆိုင်ရာ ဖွံ့ဖြိုးမှု အမျိုးသား အဆင့်မဟာဗျူဟာ ဖော်ဆောင်နိုင်ရေး လုပ်ငန်းအဖွဲ့ခေါင်းဆောင်များ၊ စီမံကိန်းနှင့်ဘဏ္ဍာရေး ဝန်ကြီးဌာနမှ လက်ထောက်အတွင်းဝန်များနှင့် တာဝန်ရှိသူများအပါအဝင် စုစုပေါင်း(၁၂၀)ဦးခန့် တက်ရောက်ခဲ့ကြပါသည်။
(သတင်းစဉ်)