စီမံကိန်းနှင့် ဘဏ္ဍာရေးဝန်ကြီးဌာန၊  ဗဟိုစာရင်းအင်းအဖွဲ့မှ ဉီးဆောင်၍  စာရင်းအင်းကဏ္ဍဆိုင်ရာ ပေါင်းစပ်ညှိနှိုင်းရေးအဖွဲ့ အစည်းအဝေး (၁/၂၀၁၉) ကို ၂၀၁၉ ခုနှစ်၊ ဇွန်လ(၁၇) ရက်နေ့၊ နံနက်(၉:၀၀) နာရီတွင် ရုံးအမှတ်(၃၂)၊ အစည်းအဝေးခန်းမ၌ ကျင်းပပြုလုပ်ခဲ့ပြီး စာရင်းအင်းကဏ္ဍဆိုင်ရာ ပေါင်းစပ်ညှိနှိုင်းရေးအဖွဲ့ဝင်များ၊ ဖွံ့ဖြိုးမှုမိတ်ဖက်များ၊ ပုဂ္ဂလိကအဖွဲ့ အစည်းများနှင့်  ဗဟိုစာရင်းအင်းအဖွဲ့မှ တာဝန်ရှိသူများ အပါအဝင် စုစုပေါင်း (၉၀) ဦးခန့် တက် ရောက်ကြပါသည်။

အစည်းအဝေးတွင် ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဦးဆန်းမြင့် မှ  အဖွင့်အမှာ စကားပြောကြားခဲ့ပြီး ဖွံ့ဖြိုးမှုမိတ်ဖက်များကိုယ်စား UNFPA ဌာနေကိုယ်စားလှယ် Mr.Ramanathan Balakrishnan မှ နှုတ်ခွန်းဆက် အမှာစကား ပြောကြားပါသည်။

အဆိုပါ အစည်းအဝေးကို အမျိုးသားစာရင်းအင်း အရည်အသွေးဖွံ့ဖြိုးတိုးတက် စေရေး အတွက် စာရင်းအင်းဆိုင်ရာဖွံ့ဖြိုးမှု အမျိုးသားအဆင့်မဟာဗျူဟာကို ဖွံ့ဖြိုးမှုမိတ်ဖက်များ၏ အကူအညီဖြင့် အကောင်အထည်ဖော်ဆောင်လျက်ရှိရာ လုပ်ငန်းအဖွဲ့တစ်ခုချင်းစီ၏ လုပ်ငန်း အကောင် အထည်ဖော်ဆောင်ရွက်မှုအခြေအနေများနှင့် လိုအပ်ချက်များ၊ ဆက်လက်ဆောင်ရွက် ရမည့် လုပ်ငန်းစဉ်များအား ဆွေးနွေးညှိနှိုင်း အကြံပြုချက်များရယူနိုင်ရန် ရည်ရွယ်၍ ကျင်းပရခြင်း ဖြစ်ပါသည်။

အစည်းအဝေးတွင် လုပ်ငန်းအဖွဲ့ (၁၀) ဖွဲ့၏တာဝန်ရှိပုဂ္ဂိုလ်များမှ ၎င်းတို့၏ လက်ရှိ လုပ်ငန်းဆောင်ရွက်မှု အခြေအနေများကို ဆွေးနွေးတင်ပြခဲ့ပြီး အစည်းအဝေးသို့ တက်ရောက် လာသူများ မှ ဝိုင်းဝန်းဆွေးနွေး၍ အကြံပြုချက်များကိုရယူပြီး အစည်းအဝေးကို နေ့လည် ၁ နာရီ ခန့်တွင် ရုပ်သိမ်းခဲ့ပါသည်။