စီမံကိန်းနှင့်ဘဏ္ဍာရေးဝန်ကြီးဌာန၊ စီမံကိန်းရေးဆွဲရေးဦးစီးဌာန၏ ခရိုင်နှင့်မြို့နယ်တာဝန်ခံများ လုပ်ငန်းစွမ်းဆောင်ရည်မြှင့်တင်ရေးမွမ်းမံသင်တန်း (၁/၂၀၂၃) နှင့် ငွေစာရင်းဆိုင်ရာမွမ်းမံသင်တန်း (၂/၂၀၂၃) သင်တန်းဆင်းပွဲအခမ်းအနားကို ၂၅.၈.၂၀၂၃ ရက်နေ့၊ နံနက် (၉း၀၀) နာရီတွင် စီမံကိန်းရေးဆွဲရေးဦးစီးဌာန၏ နေပြည်တော် သင်တန်းကျောင်းခန်းမ၌ ကျင်းပခဲ့ပါသည်။

အခမ်းအနားသို့ ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများ နှင့် သင်တန်းသား၊ သင်တန်းသူများ တက်ရောက်ကြပါသည်။

အခမ်းအနားတွင် ညွှန်ကြားရေးမှူးချုပ်က အဖွင့်အမှာစကားပြောကြားရာတွင် သင်ကြားခဲ့ရသည့် အတွေ့အကြုံနှင့်ဗဟုသုတများကို သက်ဆိုင်ရာလက်တွေ့နယ်ပယ်များတွင် အကျိုးရှိရှိအသုံးချကြရန်၊ အဂတိလိုက်စားမှုကင်းစင်ရေး အလေးထားဆောင်ရွက်သွားကြရန်၊ ဝန်ထမ်းများ၏စွမ်းဆောင်ရည်ပိုမိုတိုးတက်လာစေရေးအတွက် ဆောင်ရွက်သွားကြရန်၊ ရုံးလုပ်ငန်းလက်စွဲနှင့် ဥပဒေစည်းမျဉ်း စည်းကမ်းများအတိုင်း လိုက်နာဆောင်ရွက်သွားကြရန်၊ သတင်းအချက်အလက်ခိုင်မာမှုရှိစေရေးအတွက် ကြပ်မတ်ဆောင်ရွက်သွားကြရန်နှင့် အရာထမ်း၊ အမှုထမ်းများ၏ လုပ်ငန်းစွမ်းဆောင်ရည်ကောင်းမှသာ ဌာန၏လုပ်ငန်းများ ပိုမိုတိုးတက်လာမည် ဖြစ်သည့်အတွက် နိုင်ငံ့ဝန်ထမ်းများ စည်းမျဉ်း စည်းကမ်းနှင့်အညီ နေထိုင်ပြုမူရန် လမ်းညွှန်မှာကြားခဲ့ပါသည်။

ထို့နောက် ညွှန်ကြားရေးမှူးချုပ်နှင့် ဒုတိယညွှန်ကြားရေးမှူးချုပ်တို့က သင်တန်းဆင်းအောင်လက်မှတ်များပေးအပ်ခဲ့ပြီး သင်တန်းတွင် ပထမ၊ ဒုတိယဆုနှင့် တတိယဆု ရရှိသူ သင်တန်းသား/ သူများကို ဆုများအသီးသီး ချီးမြှင့်ခဲ့ပါသည်။

အဆိုပါသင်တန်းကို ၇.၈.၂၀၂၃ ရက်နေ့ မှ ၂၅-၈-၂၀၂၃ ရက်နေ့အထိ ဖွင့်လှစ်သင်ကြားခဲ့ပြီး သင်တန်းဆင်းပွဲအခမ်းအနားကို နံနက် (၁၀:၀၀)နာရီတွင် ရုပ်သိမ်းခဲ့ပါသည်။