စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းသည် ဖိလစ်ပိုင်နိုင်ငံ၊ မနီလာမြို့တွင် ၂၀၁၇ ခုနှစ် စက်တင်ဘာလ ၆ ရက်နေ့မှ  ၁၁ ရက်နေ့အထိ ကျင်းပလျက်ရှိသည့်  (၄၉)ကြိမ်မြောက် အာဆီယံစီးပွားရေးဝန်ကြီးများ အစည်းအဝေးနှင့် ဆက်စပ်အစည်းအဝေးများသို့ တက်ရောက်လျက်ရှိသည်။

ပြည်ထောင်စုဝန်ကြီးသည် စက်တင်ဘာလ ၆ ရက်နေ့ ညနေပိုင်းတွင် Solaire Resort ၌ ဖိလစ်ပိုင်နိုင်ငံ သမ္မတ H.E. Rodrigo Roa Duterte အား အခြားအာဆီယံစီးပွားရေး ဝန်ကြီးများ၊ အာဆီယံလွတ်လပ်သော ကုန်သွယ်မှုဒေသကောင်စီ ဝန်ကြီးများ၊ အာဆီယံ ရင်းနှီးမြှုပ်နှံမှု ဒေသ ကောင်စီ ဝန်ကြီးများ၊ အာဆီယံအတွင်းရေးမှူးချုပ် တို့နှင့်အတူ ဂါရဝပြုတွေ့ဆုံပါသည်။ ထို့နောက် ယင်း Resort ၌ ဆက်လက်ပြုလုပ်သည့် ASEAN Business Awards ပေးအပ်သည့် အခမ်းအနားသို့ ဖိလစ်ပိုင်နိုင်ငံသမ္မတ၊ အခြားအာဆီယံစီးပွားရေး ဝန်ကြီးများနှင့်အတူ တက်ရောက်ပါသည်။
ထို့နောက် စက်တင်ဘာလ ၇ ရက်နေ့ နံနက်ပိုင်းတွင် ပြုလုပ်သည့် (၄၉) ကြိမ်မြောက် အာဆီယံ စီးပွားရေးဝန်ကြီးများ အစည်းအဝေးနှင့် ဆက်စပ်အစည်းအဝေးများ ဖွင့်ပွဲအခမ်းအနားသို့ တက်ရောက်ပြီးနောက် ယင်းနေ့တွင် တစ်ဆက်တည်း ဆက်လက်ကျင်းပသည့် (၃၁) ကြိမ်မြောက် အာဆီယံ လွတ်လပ်သော ကုန်သွယ်မှုဒေသကောင်စီ အစည်းအဝေး၊ (၂၀) ကြိမ်မြောက် အာဆီယံ ရင်းနှီးမြှုပ်နှံမှုဒေသကောင်စီ အစည်းအဝေး၊ အာဆီယံစီးပွားရေး ဝန်ကြီးများ အလုပ်သဘော နေ့လယ် စာစားပွဲနှင့် (၄၉) ကြိမ်မြောက် အာဆီယံစီးပွားရေးဝန်ကြီးများ အစည်းအဝေးများသို့ တက်ရောက်ပါ သည်။
(၃၁) ကြိမ်မြောက် အာဆီယံလွတ်လပ်သော ကုန်သွယ်မှုဒေသကောင်စီ အစည်းအဝေးတွင် ဝန်ကြီးများမှ အာဆီယံကုန်စည်ကုန်သွယ်ရေး သဘောတူစာချုပ် အကောင်အထည်ဖော်မှုတွင် အချိန် ကာလ အတန်ကြာ ဖြေရှင်းရန် ကြန့်ကြာနေသော ကိစ္စရပ်များနှင့် စပ်လျဉ်း၍ နောက်တစ်ကြိမ် ကျင်းပ မည့် အစည်းအဝေးတွင် တိုးတက်မှု သဘောဆောင်သည့် ရလဒ်များ တင်ပြနိုင်ရေးအတွက် တိုက်တွန်း ပြီး အကောက်ခွန် မဟုတ်သည့် ကုန်သွယ်မှုဆိုင်ရာ အတားအဆီးများ ဖယ်ရှားရေးအတွက် အာဆီယံ အဆင့်မြင့် စီးပွားရေးအရာရှိများကို တာဝန်ပေးပါသည်။ ထို့နောက် ကုန်သွယ်မှု လွယ်ကူချောမွေ့ စေရေးအတွက် ထုတ်လုပ်သူ ကိုယ်တိုင် ပင်ရင်းသက်သေခံလက်မှတ် ထုတ်ပေးသည့်စနစ် ဆောင်ရွက် နိုင်ရေးအတွက် ညှိနှိုင်းမှုတွင် အချို့အာဆီယံအဖွဲ့ဝင်နိုင်ငံများအနေဖြင့် လက်တွေ့ကျကျ စဉ်းစား ဆောင်ရွက်ရေး နှင့် အာဆီယံပြတင်းတစ်ပေါက်စနစ် အကောင်အထည်ဖော်မှုကို အရှိန်မြှင့် ဆောင်ရွက်ရေး ကိစ္စများအပေါ် လမ်းညွှန်ခဲ့ပါသည်။
(၂၀) ကြိမ်မြောက် အာဆီယံ ရင်းနှီးမြှုပ်နှံမှုဒေသကောင်စီ အစည်းအဝေးတွင် အာဆီယံ ရင်းနှီးမြှုပ်နှံမှု လွယ်ကူချောမွေ့စေရေးအတွက် ဦးစားပေးဆောင်ရွက်ရန် ကိစ္စများကို ဆွေးနွေးပြီး အာဆီယံဘက်စုံရင်းနှီးမြှုပ်နှံမှု သဘောတူစာချုပ်အရ ဆောင်ရွက်လျက်ရှိသည့် လုပ်ငန်းစဉ်များ၏ ဖြစ်ပေါ်တိုးတက်မှုအပေါ် မှတ်တမ်းတင်၍ ရည်မှန်းထားသည့် အချိန်ကာလ အတွင်း အကောင်အထည် ဖော်ဆောင်ရွက်နိုင်ရေးကို တိုက်တွန်းပါသည်။ ထို့အပြင် ၂၀၁၇ ခုနှစ် ဖိလစ်ပိုင်နိုင်ငံ အာဆီယံ အလှည့်ကျဥက္ကဋ္ဌ တာဝန်ယူနေစဉ် ကာလအတွင်း ဆောင်ရွက်ရန် သတ်မှတ်ထားသည့် deliverable များတွင် ပါဝင်သည့်  ရင်းနှီးမြှုပ်နှံမှုနှင့် စပ်လျဉ်းသည့် ကိစ္စရပ်များသည် အာဆီယံ၏ ယှဉ်ပြိုင်နိုင်စွမ်း ရှိသည့် ဝန်းကျင်ကို ဖြစ်ပေါ်စေသည့်အတွက် ယင်းကိစ္စများအပေါ် အရှိန်အဟုန်မြှင့် ဆက်လက် ဆောင်ရွက်ရန်ကိုလည်း တိုက်တွန်းပါသည်။ ယင်းအစည်းအဝေးတွင် ပြည်ထောင်စုဝန်ကြီးမှ  အာဆီယံရင်းနှီးမြှုပ်နှံမှု လွယ်ကူချောမွေ့စေရေးအတွက် ကမ္ဘာ့တစ်ဝှမ်းရှိ ရင်းနှီးမြှုပ်နှံမှုဆိုင်ရာ ဖွံ့ဖြိုးတိုးတက်မှုများကို လေ့လာ၍ adaptable ဖြစ်သော ရင်းနှီးမြှုပ်နှံမှုဝန်းကျင် ရှာဖွေဖော်ထုတ်ရန် ထိုမှတစ်ဆင့် ခိုင်မာသည့် မူဝါဒများ၊ မဟာဗျူဟာများ ချမှတ်ဆောင်ရွက်ရန် လိုအပ်ကြောင်းကို ပါဝင် ဆွေးနွေးပါသည်။ 
နေ့လယ်ပိုင်းတွင် ဆက်လက်ကျင်းပသည့်(၄၉) ကြိမ်မြောက် အာဆီယံစီးပွားရေးဝန်ကြီးများ အစည်းအဝေးတွင် ၂၀၁၇ ခုနှစ်အတွင်း ဦးစားပေးဆောင်ရွက်ရန် သတ်မှတ်ထားသည့် အာဆီယံ စီးပွားရေး အသိုက်အဝန်း မဏ္ဍိုင်ဆိုင်ရာ လုပ်ငန်းစဉ်များ၏ အကောင်အထည်ဖော်မှု အခြေအနေများ အပေါ် မှတ်တမ်းတင်ခဲ့ပြီး ဆက်လက်ဆောင်ရွက်ရမည့် လုပ်ငန်းစဉ်များအတွက် သက်ဆိုင်ရာ လုပ်ငန်း အဖွဲ့များအနေဖြင့် အရှိန်မြှင့်ကြိုးပမ်း ဆောင်ရွက်ရန် ဝန်ကြီးများမှ တိုက်တွန်းပါသည်။ ထို့နောက် စက်တင်ဘာလ ၈ ရက်နေ့မှ ၁၁ ရက်နေ့အထိ ဆက်လက် ကျင်းပမည့် အာဆီယံနှင့် ၎င်း၏ လွတ်လပ် သော ကုန်သွယ်မှုဒေသ အကောင်အထည်ဖော်လျက်ရှိသည့် နိုင်ငံများနှင့် ဆွေးနွေးဘက်နိုင်ငံများ ဖြစ်သည့် ဂျပန်၊ ကိုရီးယား၊ သြစတြေးလျ၊ နယူးဇီလန်၊ ကနေဒါ၊ ဟောင်ကောင်၊ တရုတ်၊ အိန္ဒိယ၊ ရုရှားနှင့် အမေရိကန်တို့အကြား ညှိနှိုင်းအစည်းအဝေးများတွင် ဆွေးနွေးမည့် အကြောင်းအရာများနှင့် စပ်လျဉ်းပြီး ကြိုတင်ညှိနှိုင်းပါသည်။
(၄၉) ကြိမ်မြောက် အာဆီယံ စီးပွားရေးဝန်ကြီးများ အစည်းအဝေးနှင့် ဆက်စပ် အစည်းအဝေး များအတွက် ကြိုတင်ညှိနှိုင်းသည့် အာဆီယံအဆင့်မြင့် စီးပွားရေးအရာရှိများ အစည်းအဝေးကို စက်တင်ဘာလ ၅ ရက်နေ့ နှင့် ၆ ရက်နေ့တို့တွင် ကျင်းပခဲ့ကြောင်း သတင်းရရှိသည်။

နေပြည်တော် စက်တင်ဘာ ၇
(သတင်းစဉ်)