နေပြည်တော် ၊ မေ ၇

ကုန်သွယ်ရေးဇုန်/စခန်းများ တည်ဆောက်ရာတွင် နိုင်ငံတကာလုပ်ငန်းစဉ်နှင့်အညီ တစ်ဖက်နိုင်ငံများကဲ့သို့ နယ်စပ်မျဉ်းအနီးတည်ဆောက်နိုင်ရေးနှင့်စပ်လျဉ်း၍ လေ့လာသုံးသပ် အစီရင်ခံရေးကော်မတီ၏ တတိယအကြိမ်အစည်းအဝေးကို ယနေ့မွန်းလွဲပိုင်းတွင် စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီးရုံး၊ အစည်းအဝေးခန်းမ၌ ကျင်းပရာ လေ့လာသုံးသပ် အစီရင်ခံရေးကော်မတီ ဥက္ကဌ၊ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း တက်ရောက်ဆွေးနွေးမှာကြားသည်။

ဦးစွာ ကော်မတီဥက္ကဋ္ဌ ဒုတိယဝန်ကြီးက လေ့လာသုံးသပ်အစီရင်ခံရေးကော်မတီနှင့် တိုင်းဒေသကြီးနှင့် ပြည်နယ်အလိုက် လေ့လာသုံးသပ်အစီရင်ခံရေး လုပ်ငန်းကော်မတီတို့အား နိုင်ငံတော်စီမံအုပ်ချုပ်ရေးကောင်စီရုံးမှ ၁၄-၇-၂၀၂၃ ရက်တွင် စတင်ဖွဲ့စည်းတာဝန်ပေးအပ်ခဲ့ကြောင်း၊ လေ့လာသုံးသပ်အစီရင်ခံရေးကော်မတီအနေဖြင့် လုပ်ငန်းတာဝန် (၄) ရပ်နှင့် တိုင်းဒေသကြီး သို့မဟုတ် ပြည်နယ်အလိုက် လေ့လာသုံးသပ်အစီရင်ခံရေးလုပ်ငန်းကော်မတီအနေဖြင့် လုပ်ငန်းတာဝန် (၆) ရပ် ရှိကြောင်း၊ လေ့လာသုံးသပ်အစီရင်ခံရေးကော်မတီနှင့် တိုင်းဒေသကြီးနှင့် ပြည်နယ်အလိုက် လေ့လာသုံးသပ်အစီရင်ခံရေးလုပ်ငန်းကော်မတီများ၏ ပထမအကြိမ်အစည်းအဝေးကို ၁၄-၉-၂၀၂၃ ရက်နေ့နှင့် ဒုတိယအကြိမ်အစည်းအဝေးကို ၁၈-၁-၂၀၂၄ ရက်နေ့တို့တွင် ကျင်းပပြုလုပ်ခဲ့ပြီးဖြစ်ကြောင်း၊ အဆိုပါအစည်းအဝေးများမှ ဆုံးဖြတ်ချက်များအရ ဆက်လက်ဆောင်ရွက်ခဲ့ရာ ယခုအခါ ပြည်ထောင်စုဝန်ကြီးဌာနများ၏ သဘောထားမှတ်ချက်၊ သက်ဆိုင်ရာတိုင်းဒေသကြီးနှင့် ပြည်နယ်အလိုက် လေ့လာသုံးသပ်အစီရင်ခံရေး လုပ်ငန်းကော်မတီ၏ သဘောထားမှတ်ချက်၊ ကုန်သွယ်ရေးဇုန်/စခန်းများ၏ မြေပြင်အနေအထား၊ နယ်မြေလုံခြုံရေးအခြေအနေ၊ ကုန်သွယ်မှုပမာဏ၊ တိုးချဲ့မြေနေရာရရှိနိုင်မှု    စသည့် အခြေအနေအရပ်ရပ်အပေါ် ထည့်သွင်းစဉ်းစား၍ ပထမအဆင့်ဦးစားပေး၊ ဒုတိယအဆင့် ဦးစားပေး၊ တတိယအဆင့် ဦးစားပေးဟူ၍ ဦးစားပေးအဆင့်အလိုက် တည်ဆောက်ရမည့်  ဇုန်/စခန်းများအား အပိုင်း (၃) ပိုင်း စိစစ်ဖော်ထုတ်ခဲ့ပါကြောင်း။ 

ယနေ့အစည်းအဝေးတွင် သက်ဆိုင်ရာဌာနအဖွဲ့အစည်းများ၊ တိုင်းဒေသကြီးနှင့်ပြည်နယ် အလိုက် လေ့လာသုံးသပ်အစီရင်ခံရေးလုပ်ငန်းကော်မတီများမှ ဆွေးနွေးတင်ပြချက်များအပေါ် စိစစ်သုံးသပ်ပြီး နိုင်ငံတကာလုပ်ငန်းစဉ်နှင့်အညီ ကုန်သွယ်ရေးဇုန်/စခန်း တည်ဆောက်နိုင်မည့် အခြေအနေများအား တရားမဝင်ကုန်သွယ်မှုတိုက်ဖျက်ရေးဦးဆောင်ကော်မတီသို့ သုံးသပ်ပြုစု တင်ပြသွားမည်ဖြစ်ကြောင်း၊ လေ့လာသုံးသပ်အစီရင်ခံရေးကော်မတီဝင် ဌာနဆိုင်ရာအကြီးအကဲများနှင့် တိုင်းဒေသကြီးနှင့် ပြည်နယ်အလိုက် လေ့လာသုံးသပ်အစီရင်ခံရေးလုပ်ငန်း ကော်မတီများအနေဖြင့် ကုန်သွယ်ရေးဇုန်/စခန်းများအား နယ်စပ်မျဉ်းအနီး အကောင်အထည်ဖော် တည်ဆောက် နိုင်ရေးအတွက် ဘက်ပေါင်းစုံ၊ ရှုထောင့်ပေါင်းစုံမှ ရင်းနှီးပွင့်လင်းစွာဖြင့် ဝိုင်းဝန်းဆွေးနွေးပေးကြစေလိုကြောင်း စသည်ဖြင့် ပြောကြားခဲ့သည်။

ထို့နောက် အစည်းအဝေးသို့ တက်ရောက်လာကြသော ကော်မတီဒုတိယဥက္ကဋ္ဌနှင့် ကော်မတီဝင်များက သက်ဆိုင်ရာကဏ္ဍအလိုက် ဆွေးနွေးတင်ပြကြရာ ကော်မတီဥက္ကဋ္ဌက ခြုံငုံသုံးသပ်ဆွေးနွေး၍ နိဂုံးချုပ်အမှာစကား ပြောကြားကာ အစည်းအဝေးကို ရုပ်သိမ်းခဲ့ကြောင်း သတင်းရရှိသည်။
သတင်းစဉ်