ရန်ကုန်  အောက်တိုဘာ ၆
မြန်မာနိုင်ငံငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင်သည် သတ်မှတ် စာရင်းဝင်စံနှုန်း ပြည့်မီရန်လိုအပ်နေသေးသည့် အများပိုင်ကုမ္ပဏီများအနေဖြင့် ရန်ကုန်စတော့ အိပ်ချိန်းတွင် မှတ်ပုံတင်၍  အစုရှယ်ယာများထုတ်ဝေရောင်းချပြီး လိုအပ်သည့် အရင်းအနှီးများ စုစည်းရယူနိုင်စေရန် ရည်ရွယ်၍ ရန်ကုန်စတော့အိပ်ချိန်း၏ ဒုတိယဈေးကွက်အဖြစ် စာရင်းဝင် အကြိုဈေးကွက်ကို Pre – Listing Board (PLB) အမည်ဖြင့် တည်ထောင်ခွင့်ပြုခဲ့ပြီးဖြစ်ပါသည်။
ရန်ကုန်စတော့အိပ်ချိန်း၏ စာရင်းဝင်အကြိုဈေးကွက်တွင် အစုရှယ်ယာရှင် (၁၀၀) ဦးနှင့် အထက် အများပိုင်ကုမ္ပဏီများက လွယ်ကူစွာဝင်ရောက်မှတ်ပုံတင်နိုင်ရေးအတွက် စာရင်းဝင် အကြို ဈေးကွက်ဆိုင်ရာစကားဝိုင်းဆွေးနွေးပွဲ (Roundtable Discussion on Pre – Listing Board PLB) ကို ယနေ့မွန်းလွဲပိုင်းတွင် ရန်ကုန်စတော့အိပ်ချိန်းပင်မခန်းမ၌ ကျင်းပရာ မြန်မာ နိုင်ငံ ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင်ဥက္ကဋ္ဌ၊ စီမံကိန်းနှင့်ဘဏ္ဍာရေး ဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း တက်ရောက်အမှာ စကားပြောကြားသည်။
ဒုတိယဝန်ကြီးက ပြောကြားရာတွင် နိုင်ငံတကာတွင် အများပိုင်ကုမ္ပဏီများသည် လုပ်ငန်းတိုးချဲ့ရန် လိုအပ်သည့်အရင်းအနှီးများကို စုစည်းရယူရာတွင် ဘဏ်က ငွေချေးယူသည့် နည်းလမ်းအပြင် အရင်းအနှီး ဈေးကွက်မှတစ်ဆင့် စုစည်းရယူကြကြောင်း။ 
အများပိုင်ကုမ္ပဏီများအနေဖြင့် ငွေချေးသက်သေခံလက်မှတ်များ တစ်နည်းအားဖြင့် အစုရှယ် ယာများ ထုတ်ဝေရောင်းချခြင်းဖြင့် မိမိတို့လိုအပ်သည့်ရင်းနှီးငွေများကို စတော့အိပ်ချိန်းမှ တစ်ဆင့် စုစည်းရယူနိုင်ပါကြောင်း၊ မိမိတို့နိုင်ငံတွင် အခြားနိုင်ငံများနည်းတူ အများပြည်သူကို အစုရှယ်ယာကမ်းလှမ်းရောင်းချပြီး လိုအပ်သည့်အရင်းအနှီးများရယူစုစည်းနိုင်စေရန် အရင်း အနှီးဈေးကွက်တည်ထောင်ရန် ဥပဒေ၊ နည်းဥပဒေ၊ လုပ်ထုံးလုပ်နည်းများ ထုတ်ပြန်ပြဋ္ဌာန်း၍ ရန်ကုန်စတော့အိပ်ချိန်းကို (YSX) တည်ထောင်ထားပြီးဖြစ်ပါကြောင်း၊  ငွေချေးသက်သေခံလက် မှတ်ကုမ္ပဏီ (၆) ခုကိုလည်း လုပ်ငန်းလုပ်ကိုင်ခွင့်ပြုထားပါကြောင်း၊ အနည်းဆုံးသတ်မှတ်စံနှုန်း များနှင့်ကိုက်ညီသော အများပိုင်ကုမ္ပဏီများကို ရန်ကုန်စတော့အိပ်ချိန်းတွင် စာရင်းဝင် ခွင့်ပြု ပေးခဲ့ရာ  ယခုအခါ ရန်ကုန်စတော့အိပ်ချိန်းတွင် စာရင်းဝင်ကုမ္ပဏီ (Listed Company) (၈) ခု ရှိပါ ကြောင်း၊ နိုင်ငံတကာစတော့အိပ်ချိန်းများတွင် စာရင်းဝင်စံသတ်မှတ်ချက်များ သတ်မှတ်ပြီး ယင်းစံ သတ်မှတ်ချက်များအလိုက်  စတော့အိပ်ချိန်း၏ စာရင်းဝင်ကုမ္ပဏီများကို အမျိုးအစားအလိုက် ခွဲပြီး Main Board အပြင် သီးခြား Board များ ထားရှိသကဲ့သို့ မိမိတို့ရန်ကုန်စတော့အိပ်ချိန်းတွင် လည်း သီးခြားရင်းနှီးမြှုပ်နှံမှုဈေးကွက် (Alternative Investment Market-AIM) အဖြစ် 
ဒုတိယဈေးကွက် Second Board ကို စာရင်းဝင်အကြိုဈေးကွက် (Pre listing Board-PLB) အမည်ဖြင့် တည်ထောင်ထားပြီးဖြစ်ပါကြောင်း။     
ယနေ့စကားဝိုင်းဆွေးနွေးပွဲတွင် စာရင်းဝင်အကြိုဈေးကွက် (Pre listing Board-PLB) ဝင်ရောက်ရာတွင် ဆောင်ရွက်ရမည့်ကိစ္စများကို အသေးစိတ် ရှင်းလင်းဆွေးနွေးမည်ဖြစ်၍ တက် ရောက်လာသူများအနေဖြင့် ပွင်းပွင်းလင်းလင်းဆွေးနွေးမေးမြန်းကြစေလိုကြောင်း ပြောကြားသည်။
ဆက်လက်၍ ရန်ကုန်စတော့အိပ်ချိန်း အမှုဆောင်အကြီးတန်းမန်နေဂျာ ဦးသက်ထွန်း ဦးက စာရင်းဝင်အကြိုဈေးကွက်နှင့်စပ်လျဉ်း၍ ရှင်းလင်းတင်ပြပြီး တက်ရောက်လာသူများက သိရှိလိုသည်များကို မေးမြန်းဆွေးနွေးမှုအပေါ် တာဝန်ရှိသူများက ပြန်လည်ရှင်းလင်းဆွေးနွေး ခဲ့ကြပြီး ဒုတိယဝန်ကြီးက နိဂုံးချုပ် သုံးသပ်ဆွေးနွေးသည်။
စကားဝိုင်းဆွေးနွေးပွဲသို့ ငွေချေးသက်သေခံလက်မှတ်ကော်မရှင်ရုံး၊ ရန်ကုန်စတော့ အိပ်ချိန်း၊ ငွေချေးသက်သေခံလက်မှတ်ကုမ္ပဏီများ၊ ရင်းနှီးမြှုပ်နှံမှုအကြံပေးကုမ္ပဏီများ၊ မှတ်ပုံတင် အကြံပေးများနှင့် အများပိုင်ကုမ္ပဏီများမှ ဥက္ကဋ္ဌများ၊ အမှုဆောင်အရာရှိချုပ်များ ပါဝင်တက် ရောက်ခဲ့ကြကြောင်းနှင့် ရန်ကုန်စတော့အိပ်ချိန်းတွင် စာရင်းဝင်ကုမ္ပဏီ (၈) ခု၏ ရှယ်ယာများ နေ့စဉ်ရောင်းဝယ်လျက်ရှိရာ ၂၀၂၃-၂၀၂၄ ဘဏ္ဍာရေးနှစ်အထိ ရင်းနှီးမြှုပ်နှံသူဦးရေ (၄၅၉၃၄) ဦးရှိကာ ၂၀၂၃-၂၀၂၄ ဘဏ္ဍာနှစ် (၆) လတာကာလအတွင်း စာရင်းဝင်ကုမ္ပဏီ (၈) ခု၏ ရှယ်ယာ စုစုပေါင်း (၁.၉၄၅) သန်း၊ တန်ဖိုး ကျပ် (၄.၇၄) ဘီလီယံ အရောင်းအဝယ်ဖြစ်ခဲ့ပြီး ဈေးကွက် ရင်းနှီးမြှုပ်နှံမှုတန်ဖိုး ကျပ် ၇၄၉.၇၇၂ ဘီလီယံရှိကြောင်း သိရှိရသည်။
သတင်းစဉ်