ရန်ကုန်မြို့၊ နိုဝင်ဘာ ၁၅
စီမံကိန်းနှင့်ဘဏ္ဍာရေးဝန်ကြီးဌာန၊ အကောက်ခွန်ဦးစီးဌာန၊ အကောက်ခွန်ဦးစီးဌာန(ရုံးချုပ်) အား ရှေးဟောင်းသမိုင်းဝင်အဆောက်အအုံအဖြစ် ကမ္ပည်းမော်ကွန်း ကြေးပြားတပ်ဆင်ခြင်း အခမ်းအနားကို ၁၅-၁၁-၂၀၂၂ ရက်နေ့၊ နေ့လည်(၁၄:၄၀)နာရီအချိန်တွင် အမှတ် (၁၃၂)၊ ကမ်းနားလမ်း၊ ကျောက်တံတားမြို့နယ်၊ ရန်ကုန်မြို့၌ ကျင်းပပြုလုပ်ခဲ့ပါသည်။ အခမ်းအနားတွင် သာသနာရေးနှင့် ယဉ်ကျေးမှုဝန်ကြီးဌာန၊ ပြည်ထောင်စုဝန်ကြီး ဦးကိုကိုနှင့် ရန်ကုန်တိုင်းဒေသကြီးအစိုးရအဖွဲ့၊ လူမှုရေးဝန်ကြီး ဦးအောင်ဝင်းသိန်းတို့မှ အမှာစကားပြောကြားခဲ့ပါသည်။ ရှေးဟောင်းသုတေသနနှင့် အမျိုးသားပြတိုက်ဦးစီးဌာန၊ ညွှန်ကြားရေးမှူးချုပ် ဒေါက်တာကျော်ဦးလွင်မှ ရှေးဟောင်းအဆောက်အအုံတွင် ကမ္ပည်းမော်ကွန်းတပ်ဆင်ရခြင်းအကြောင်းအား ရှင်းလင်းတင်ပြခဲ့ပါသည်။ အကောက်ခွန်ဦးစီးဌာန၊ ညွှန်ကြားရေးမှူးချုပ်ဦးသိန်းဆွေမှ ကျေးဇူးတင်စကား ပြန်လည်ပြောကြားပြီး အခမ်းအနားသို့ တက်ရောက်လာသော ဧည့်သည်တော်များမှ အကောက်ခွန်သမိုင်းပြတိုက်အတွင်း လှည့်လည်ကြည့်ရှု့ခဲ့ပါသည်။ သာသနာရေးနှင့်ယဉ်ကျေးမှုဝန်ကြီးဌာန၊ ပြည်ထောင်စုဝန်ကြီးမှ အကောက်ခွန်ဦးစီးဌာန (ရုံးချုပ်) အား ရှေးဟောင်းသမိုင်းဝင် အဆောက်အအုံအဖြစ် သတ်မှတ်သည့် ကမ္ပည်းမော်ကွန်းကြေးပြားတပ်ဆင်ခြင်းကို စက်ခလုပ်နှိပ်ဖွင့်လှစ်၍ အောင်သပြေခက်နှင့် အမွှေးနံ့သာများပက်ဖျန်းခြင်း၊ ရန်ကုန်တိုင်းဒေသကြီးအစိုးရအဖွဲ့၊ သယံဇာတရေးရာဝန်ကြီးဌာနနှင့် လူမှုရေးဝန်ကြီးဌာနတို့မှ တိုင်းဒေသကြီးဝန်ကြီးများက အောင်သပြေခက်နှင့် အမွှေးနံ့သာများပက်ဖျန်းခြင်း၊ အကောက်ခွန်ဦးစီးဌာန၊ ညွှန်ကြားရေးမှူးချုပ်မှ အောင်သပြေခက်နှင့် အမွှေးနံ့သာများ ပက်ဖျန်းခြင်းတို့အား ဆောင်ရွက်ခဲ့ပါသည်။ အဆိုပါအခမ်းအနားအား ၁၅-၁၁-၂၀၂၂ ရက်နေ့၊ နေ့လည် (၁၆:၀၀) နာရီအချိန်တွင် ရုပ်သိမ်းခဲ့ပါသည်။