စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းသည် မြန်မာနိုင်ငံ ဆိုင်ရာ ဂျပန်နိုင်ငံသံအမတ်ကြီး H.E Mr. Ichiro Maruyama ဦးဆောင်သော ကိုယ်စားလှယ် အဖွဲ့အား ယနေ့နံနက် ၁၀ နာရီတွင် စီမံကိန်းနှင့်ဘဏ္ဍာရေးဝန်ကြီးဌာန ရုံးအမှတ် (၂၆) ၌ လက်ခံတွေ့ဆုံသည်။

          ထိုသို့တွေ့ဆုံရာတွင် ပြည်ထောင်စုသမ္မတ မြန်မာနိုင်ငံတော်အစိုးရနှင့် ဂျပန်နိုင်ငံအစိုးရ တို့အကြား ချေးငွေဆိုင်ရာကိစ္စရပ်များ၊ ဘဏ်လုပ်ငန်းဆိုင်ရာကိစ္စရပ်များ၊ ရန်ကုန်မြို့ပတ်ရထား လမ်းများအား ပို၍အဆင်ပြေစေရေး အရှေ့-အနောက် နှင့် တောင်-မြောက် မီးရထားလမ်းသစ် ဖောက်လုပ်နိုင်ရန်အတွက် JICA မှ Feasibility Study ဆောင်ရွက်နေသည့်ကိစ္စရပ်များ၊ ရန်ကုန်မြို့ရှိ ကျိုက္ကဆံစီမံကိန်းအား G to G စီမံကိန်းအဖြစ် ဆောင်ရွက်ရန်ကိစ္စရပ်များ ဆွေးနွေးခဲ့ကြသည်။

          တွေ့ဆုံပွဲသို့ စီမံကိန်းနှင့်ဘဏ္ဍာရေးဝန်ကြီးဌာန နှင့် မြန်မာနိုင်ငံဆိုင်ရာ ဂျပန်နိုင်ငံသံရုံးမှ တာဝန်ရှိသူများ တက်ရောက်ကြကြောင်း သတင်းရရှိသည်။

(သတင်းစဉ်)

နေပြည်တော် မေ ၁၆