ဖိလစ်ပိုင်နိုင်ငံ၊ မနီလာမြို့တွင် ၂၀၁၈ခုနှစ် မေလ၃ရက်နေ့မှ ၆ ရက်နေ့ အထိ ကျင်းပပြုလုပ်ခဲ့သည့် အာရှဖွံ့ဖြိုးရေးဘဏ် Board of Governor ၏ ၅၁ကြိမ်မြောက် နှစ်ပတ်လည် အစည်းအဝေးနှင့် ဆက်စပ်အစည်းအဝေးများသို့ စီမံကိန်းနှင့်ဘဏ္ဍာရေး ဝန်ကြီးဌာန၊ ပြည်ထောင်စုဝန်ကြီး ဦးကျော်ဝင်း ခေါင်းဆောင်သော မြန်မာကိုယ်စားလှယ်အဖွဲ့ တက်ရောက်ခဲ့ပါသည်။

ပြည်ထောင်စုဝန်ကြီးသည် မေလ ၄ရက်နေ့တွင် အာဆီယံ+၃ ဘဏ္ဍာရေးဝန်ကြီးများ နှင့် ဗဟိုဘဏ်ဥက္ကဋ္ဌများအစည်းအဝေးသို့ တက်ရောက်ခဲ့ပြီး အစည်းအဝေးတွင် ကမ္ဘာလုံး ဆိုင်ရာနှင့်ဒေသဆိုင်ရာ စီးပွားရေးအခြေအနေများနှင့် နိုင်ငံများသို့ထင်ဟပ်စေမှုများ၊ ကမ္ဘာလုံး ဆိုင်ရာစီးပွားရေးအပေါ် ကျရောက်လာနိုင်မည့် ဆုံးရှုံးနိုင်ခြေရှိသည့် အကြောင်း အချက်များ၊ ၎င်းသက်ရောက်မှုကို လျော့ချစေနိုင်မည့် မူဝါဒဆိုင်ရာ ရွေးချယ်နိုင်မှုနှင့် သက်သာစေနိုင်မည့် အစီအစဉ်များ၊ ကာလလတ်မှကာလရှည်အထိ ဖွံ့ဖြိုးတိုးတက်မှု မြှင့်တင်နိုင်ရန်နှင့် တည်ငြိမ်မှုကို ဆက်လက်ထိန်းသိမ်းနိုင်မည့် နည်းလမ်းများ ဆွေးနွေးခဲ့ပါသည်။ ၎င်းအပြင် ချင်းမိုင်ကနဦး ပူးပေါင်းဆောင်ရွက်မှု (Chiang Mai Initiative Multilateralization- CMIM)၊ အာဆီယံ+၃ မေခရိုစီးပွားရေး သုတေသနရုံး (ASEAN +3 Macroeconomic Research Office-AMRO)၏ ဆောင်ရွက်မှု အစီရင်ခံစာနှင့် အာရှငွေချေးစာချုပ် စျေးကွက်ဖြစ်ပေါ်ရန် လုပ်ဆောင်မည့်အစီအစဉ်များ (Asia Bond Market Initiative-ABMI)စသည့် အာဆီယံ+၃ ဘဏ္ဍာရေး ဆိုင်ရာပူးပေါင်း ဆောင်ရွက်မှုအစီရင်ခံစာအပေါ် ဆွေးနွေးခဲ့ကြပြီး ဘဏ္ဍာရေး ဝန်ကြီးများ နှင့် ဗဟိုဘဏ်ဥက္ကဋ္ဌများမှ နိုင်ငံအလိုက် ဆောင်ရွက်မှုများ အပေါ်အမြင်ခြင်း ဖလှယ်ခဲ့ကြ ပါသည်။ (၂၁)ကြိမ်မြောက် အာဆီယံ+၃ ဘဏ္ဍာရေးဝန်ကြီးများနှင့် ဗဟိုဘဏ်ဥက္ကဋ္ဌများ၏ ပူးတွဲကြေငြာချက်အားအပြီးသတ်ဆွေးနွေးခဲ့ကြပါသည်။

ဂျပန်နိုင်ငံမှဦးဆောင်၍ ကမ္ဘာ့ဘဏ်၏နည်းပညာအကူအညီဖြင့် ကမ္ဘောဒီးယား၊ လာအိုနှင့်မြန်မာနိုင်ငံတို့ ပူးပေါင်းအကောင်အထည်ဖော်မည့် အရှေ့တောင်အာရှသဘာဝ ဘေးအန္တရာယ်စီမံခန့်ခွဲမှုဆိုင်ရာအာမခံအစီအမံများ (Southeast Asia Disaster Risk Insurance Facility-SEADRIF) နှင့်စပ်လျဉ်း၍ ဆွေးနွေးခဲ့ကြပြီး ပူးတွဲကြေငြာချက် ထုတ်ပြန်ခဲ့ကြသည်။

မေလ ၅ ရက်နေ့တွင် အာရှဖွံ့ဖြိုးရေးဘဏ်၏ ၂၀၃၀ခုနှစ်ထိ ချမှတ်ထားသည့် မဟာဗျူဟာကိုအဖွဲ့ဝင်နိုင်ငံများက ဆွေးနွေးခဲ့ကြပါသည်။ Business Session တွင် ၂၀၁၇ခုနှစ် နှစ်ပတ်လည်အစီရင်ခံစာ၊ အချိန်နှင့်တပြေးညီ ပြင်ဆင်ထားသည့် စည်းမျဉ်း စည်းကမ်းများ၊ ၂၀၁၈ခုနှစ်အတွက် ဘတ်ဂျက်၊ ဘဏ်၏ဘဏ္ဍာရေး အရင်းအမြစ်များ၏ အခြေအနေ၊ စာရင်းစစ်ဆေးပြီးအစီရင်ခံစာ၊ အသားတင်ဝင်ငွေခွဲဝေ ချထားမှု၊ ၂၀၁၈-၂၀၁၉ခု ဘဏ္ဍာနှစ်အတွက်ကော်မတီ၏လုပ်ငန်းစဉ်နှင့်၂၀၁၈-၂၀၁၉ခု ဘဏ္ဍာနှစ်အတွက် Board of Governor ၏ ဥက္ကဋ္ဌနှင့် ဒုတိယဥက္ကဋ္ဌ ရွေးချယ်ခြင်းတို့ကို ဆောင်ရွက်ခဲ့ပါသည်။

အာရှဖွံ့ဖြိုးရေးဘဏ်၏ (၅၁) ကြိမ်မြောက် နှစ်ပတ်လည် အစည်းအဝေးဖွင့်ပွဲ အခမ်းအနားသို့ အာရှဖွံ့ဖြိုးရေးဘဏ်ဥက္ကဋ္ဌဖြစ်သူ Mr.  TakehikoNakao တက်ရောက် အဖွင့်အမှာစကားပြောကြား၍အခမ်းအနားဖွင့်လှစ်ပေးခဲ့သည်။

မေလ ၄ ရက်နေ့တွင် ကမ္ဘာ့ဘဏ်၊ အရှေ့အာရှနှင့် ပစိဖိတ်ဒေသဆိုင်ရာ ဒုတိယ ဥက္ကဋ္ဌဖြစ်သူ Ms. Victoria Kwakwa နှင့်လည်းကောင်း၊ မေလ၆ရက်နေ့တွင် ဂျပန်ဘဏ် ၏နိုင်ငံတကာပူးပေါင်းဆောင်ရွက်ရေးအဖွဲ့ Senior Managing Director Mr. Nobumitsu HAYASHI နှင့်အာရှဖွံ့ဖြိုးရေးဘဏ်၏ဥက္ကဋ္ဌ Mr. TakehikoNakao တို့နှင့်လည်းကောင်း သီးခြားစီတွေ့ဆုံ၍ မြန်မာနိုင်ငံ၏ လယ်ယာစိုက်ပျိုးရေးကဏ္ဍဖွံ့ဖြိုး တိုးတက်ရေး၊ အခြေခံအဆောက်အအုံ ဖွံ့ဖြိုးတိုးတက်ရေးနှင့် အသေးစားနှင့် အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေးအတွက် ပံ့ပိုးကူညီရေး၊ ရှေ့ဆက်ပူးပေါင်း ဆောင်ရွက်မည့် ကိစ္စရပ်များ၊ မြန်မာနိုင်ငံ၏စီးပွားရေးမူဝါဒနှင့် အညီအကောင်အထည် ဖော်နေသည့် ဦးစားပေးလုပ်ငန်းများတွင် ဆက်လက်ပံ့ပိုးကူညီပေးရေးကိစ္စရပ်များနှင့် စပ်လျဉ်း၍ ဆွေးနွေးခဲ့ကြကြောင်း သတင်းရရှိသည်။

နေပြည်တော်မေ ၇                                                                                                                                                                                                                                                                     (သတင်းစဉ်)