အာဆီယံအဖွဲ့ဝင် နိုင်ငံများအကြား နယ်စပ်ဖြတ်ကျော် မော်တော်ယာဉ်များအတွက် မထားမနေရ သူတစ်ပါးထိခိုက်မှုအာမခံ ထားရှိရေးနှင့်ပတ်သက်ပြီး အာမခံလက်ခံခြင်းနှင့် လျော်ကြေးပေးချေခြင်း တို့တွင် ပူးပေါင်းဆောင်ရွက်ရန် နားလည်မှုစာချွန်လွှာ ရေးထိုးခြင်း (ASEAN Compulsory Motor Insurance MoU Signing Ceremony and Press Conference) အခမ်းအနား ကျင်းပခြင်း

အာဆီယံနိုင်ငံအချင်းချင်း နယ်စပ်ဖြတ်ကျော်မော်တော်ယာဉ်များအတွက် မထားမနေရ သူတစ်ပါးထိခိုက်မှုအာမခံ လက်ခံခြင်းနှင့် လျော်ကြေးပေးချေခြင်းများအား ပူးပေါင်းဆောင်ရွက် ရာတွင် ပိုမိုလွယ်ကူမြန်ဆန်စေရန်အတွက် ASEAN Compulsory Motor Insurance (ACMI) စနစ်အား အာဆီယံအဖွဲ့ဝင်နိုင်ငံအားလုံး အသုံးပြုသွားနိုင်ရေးအတွက် စီမံကိန်းနှင့်ဘဏ္ဍာရေး ဝန်ကြီးဌာန၊  မြန်မာ့အာမခံလုပ်ငန်းနှင့် ကျန်အာဆီယံအဖွဲ့ဝင်နိုင်ငံများရှိ အာမခံအဖွဲ့အစည်း များအကြား နားလည်မှုစာချွန်လွှာ (MoU) ရေးထိုးပွဲကို ယနေ့၊ နေ့လယ် (၁:၃၀) နာရီတွင် video conference စနစ်ဖြင့် ကျင်းပပြုလုပ်ခဲ့ရာ မြန်မာနိုင်ငံ စီမံကိန်းနှင့် ဘဏ္ဍာရေးဝန်ကြီးဌာန၊ အာမခံလုပ်ငန်းကြီးကြပ်ရေးအဖွဲ့၊ ဥက္ကဌ ဒုတိယဝန်ကြီး ဦးမောင်မောင်ဝင်းနှင့် အဖွဲ့ဝင် များ၊ မြန်မာ့အာမခံလုပ်ငန်းမှ ဦးဆောင်ညွှန်ကြားရေးမှူး ဒေါက်တာစန္ဒာဦးတို့ ပါဝင်တက်ရောက် ပါသည်။

အခမ်းအနားတွင် ASEAN Secretariat ၊ Finance Integration Division မှ Mr. Herminio Jr. Cortez Runas မှ အဖွင့်အမှာစကားပြောကြားခဲ့ပြီး၊ ASEAN Insurance Council (AIC) မှ Secretary-General ဖြစ်သူ Mr. Christian W. Wanandi ၊ ASEAN Council of Bureaux (COB) ၏ Chairman ဖြစ်သူ Mr. Michael F. Rellosa နှင့် Office of Insurance Commission of Thailand မှ Secretary General ဖြစ်သူ Dr. Suthiphon Thaveechaiyagarn တို့မှလည်း  အသီးသီး အမှာစကား ပြောကြားခဲ့ကြပါသည်။

အဆိုပါနားလည်မှုစာချွန်လွှာကို လက်မှတ်ရေးထိုးထားခြင်းအားဖြင့် မြန်မာနိုင်ငံ အတွင်းသို့ဝင်ရောက်လာမည့် နယ်စပ်ဖြတ်ကျော်မော်တော်ယာဉ်များမှ အာမခံပရီမီယံကြေး များ ရရှိသကဲ့သို့ ထိုမော်တော်ယာဉ်များ မတော်တဆထိခိုက်မှုများကြောင့် သေဆုံးသူ၊ ဒဏ်ရာ ရရှိ သူများအတွက် သူတစ်ပါးထိခိုက်မှုအာမခံနစ်နာကြေးအား ပေးချေနိုင်ခြင်း၊ အာဆီယံနိုင်ငံများအကြား စီးပွားရေးပေါင်းစပ်မှုများနှင့်အညီ ကုန်စည်စီးဆင်းမှုများ တိုးတက်လာစေခြင်း၊ ကုန်သွယ်ရေးနှင့် ဝန်ဆောင်မှုလုပ်ငန်းများ တိုးတက်လာစေရေးအတွက် အထောက်အကူပြုပေးနိုင်ခြင်းစသည့် အကျိုး ကျေးဇူးများရရှိနိုင်ပြီး၊ အာဆီယံနိုင်ငံများ၏ ဘဏ္ဍာရေးပူးပေါင်းဆောင်ရွက်မှုလုပ်ငန်းစဉ်များ အောင်မြင် စေရေးအတွက်ကိုလည်း များစွာ အထောက်အကူပြုမည်ဖြစ်ပါသည်။

နားလည်မှုစာချွန်လွှာ (MoU) ရေးထိုးပွဲကို နေ့လယ် (၃:၂၀) နာရီအချိန်တွင် အောင်မြင်စွာ ကျင်းပပြီးစီးခဲ့ပါသည်။

မြန်မာ့အာမခံလုပ်ငန်း