(၃၄) ကြိမ်မြောက် အာဆီယံအရင်းအနှီးဈေးကွက်ဉက္ကဋ္ဌများအစည်းအဝေး (34th Chairs’ Meeting of the ASEAN Capital Markets Forum) ကို ယနေ့၊ နံနက် (၇:၃၀) နာရီတွင် Video အစည်းအဝေးစနစ်ဖြင့် ကျင်းပရာ မြန်မာနိုင်ငံမှ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ ဒုတိယဝန်ကြီးနှင့် ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင်၊ ဉက္ကဋ္ဌ ဉီးမောင်မောင်ဝင်း နှင့် ကော်မရှင်အဖွဲ့ဝင်များ ပါဝင်တက်ရောက်ခဲ့ပါသည်။
အစည်းအဝေးတွင် အာဆီယံအရင်းအနှီးဈေးကွက်ဖိုရမ်၏ အလှည့်ကျဉက္ကဋ္ဌဖြစ်သော ဘရူနိုင်းနိုင်ငံ၊ ငွေကြေးအာဏာပိုင်အဖွဲ့ ဉက္ကဋ္ဌ Ms. Rashidah SABTU က သဘာပတိအဖြစ် ဆောင်ရွက်၍ အာဆီယံဒေသတွင်းနိုင်ငံများ၏ အရင်းအနှီးဈေးကွက်ကြီးကြပ်ရေးကော်မရှင်မှအကြီးအကဲများ၊ အာဆီယံအတွင်းရေးမှူးချုပ်ရုံးမှ ကိုယ်စားလှယ်များနှင့် အာရှဖွံ့ဖြိုးရေးဘဏ် ကိုယ်စားလှယ်များ စုစုပေါင်း (၅၀) ဉီးခန့် တက်ရောက်ပါသည်။
အစည်းအဝေးတွင် အာဆီယံဒေသတွင်း အရင်းအနှီးဈေးကွက်များ ဖွံ့ဖြိုးတိုးတက်ရေးအတွက် ပူးတွဲဖွဲ့စည်းထူထောင်ခဲ့သည့် အာဆီယံအရင်းအနှီးဈေးကွက်ဖွံ့ဖြိုးတိုးတက်ရေး လုပ်ငန်းအဖွဲ့နှင့် အာဆီယံ အရင်းအနှီးဈေးကွက်များဖိုရမ်တို့ ပူးပေါင်းဆောင်ရွက်လျက်ရှိသည့် အာဆီယံ ရေရှည်တည်တံ့ခိုင်မြဲသော ဘဏ္ဍာရေးဆိုင်ရာ ဆောင်ရွက်ချက်များကို ဆက်လက်အကောင်အထည်ဖော်ဆောင်ရွက်ရေး၊ အရင်းအနှီးဈေးကွက် အသွင်ကူးပြောင်းခြင်းဆိုင်ရာ စံသတ်မှတ်ချက်များ၊ ကာလရှည်ငွေချေးစာချုပ် (Sustainability-Linked Bond) များထုတ်ဝေခြင်းဆိုင်ရာ စံသတ်မှတ်ချက်များ၊ အာဆီယံကော်ပိုရေးရှင်းများ၏ စဉ်ဆက်မပြတ်ဖွင့်ဟထုတ်ဖော်မှုဆိုင်ရာ စံသတ်မှတ်ချက်လုပ်ငန်းစဉ်များ၊အာရှဖွံ့ဖြိုးရေးဘဏ်မှ အာဆီယံအရင်းအနှီးဈေးကွက်များ ဖွံ့ဖြိုးတိုးတက်ရေးအတွက် နည်းပညာဆိုင်ရာအကူအညီပေးမှုများအပေါ် အစည်းအဝေး အစီအစဉ်အလိုက် ဆွေးနွေးကြရာ မြန်မာနိုင်ငံမှလည်း သက်ဆိုင်ရာခေါင်းစဉ်များအလိုက် ပါဝင်ဆွေးနွေးခဲ့ပါသည်။
အစည်းအဝေးမှ ACMF Vision 2025 အဖြစ် ၂၀၂၁ ခုနှစ်မှ ၂၀၂၅ ခုနှစ်အတွင်း ACMF Action Plan (2021-2025) တွင်ဖော်ပြထားသည့် ဉီးစားပေးဆောင်ရွက်မည့် လုပ်ငန်းနယ်ပယ်များဖြစ်သော အရင်းအနှီးဈေးကွက်ဖွံ့ဖြိုးမှုဆိုင်ရာ သတင်းအချက်အလက်များကို ပွင့်လင်းမြင်သာမှုဖော်ဆောင်ရေး၊ အာဆီယံဒေသတွင်း နယ်စပ်ဖြတ်ကျော် ရင်းနှီးမြှုပ်နှံမှုဆိုင်ရာလုပ်ထုံးလုပ်နည်းများ ဆက်လက်အကောင်အထည်ဖော်ဆောင်ရွက်ရေး၊ အရင်းအနှီးဈေးကွက်တွင် ပါဝင်ဆောင်ရွက်နေသူများ၏ လုပ်ငန်းစွမ်းဆောင်ရည်တိုးမြှင့်ရေး၊ ဒေသတွင်းအရင်းအနှီးဈေးကွက်များ တစ်ခုနှင့်တစ်ခု အပြန်အလှန်ချိတ်ဆက်ဆောင်ရွက်ရေး၊ ဒေသတွင်းအရင်းအနှီးဈေးကွက်များ ဖွံ့ဖြိုးတိုးတက်လာရေးအတွက် ပိုမိုပူးပေါင်းဆောင်ရွက်ရေး လုပ်ငန်းနယ်ပယ်များကို သဘောတူခဲ့ကြပါသည်။
အစည်းအဝေးတွင် ညှိနှိုင်းသဘောတူညီပြီးဖြစ်သည့် လုပ်ငန်းစဉ်များကို ယခုလကုန်တွင် ကျင်းပပြုလုပ်မည့် အာဆီယံဘဏ္ဍာရေးဝန်ကြီးများအစည်းအဝေးသို့ ဆက်လက်တင်ပြမည် ဖြစ်ပါသည်။ အာဆီယံအရင်းအနှီးဈေးကွက်များဖိုရမ်သည် အာဆီယံဒေသတွင်းအရင်းအနှီး ဈေးကွက်များ ဖွံ့ဖြိုးတိုးတက်လာရေးအတွက် အာဆီယံနိုင်ငံများမှ အရင်းအနှီးဈေးကွက် စည်းမျဉ်းစည်းကမ်းထိန်းကျောင်းသူအဖွဲ့အစည်းအကြီးအကဲများ၏ အဆင့်မြင့်ဆွေးနွေးပွဲတစ်ခုဖြစ်ပြီး နှစ်စဉ်ပုံမှန် ကျင်းပလေ့ရှိသော အစည်းအဝေးဖြစ်ကြောင်းသိရသည်။
သတင်းစဉ်
နေပြည်တော်၊ မတ် ၁၅