ဒုတိယသမ္မတ ဦးဟင်နရီဗန်ထီးယူ ဒီဂျစ်တယ်စီးပွားရေးဖွံ့ဖြိုးတိုးတက်မှု ကော်မတီ၏ တတိယအကြိမ်အစည်းအဝေးသို့ တက်ရောက်အမှာ စကားပြောကြား

     ဒီဂျစ်တယ်စီးပွားရေး ဖွံ့ဖြိုးတိုးတက်မှုကော်မတီ၏ တတိယအကြိမ် အစည်းအဝေးကို ၆-၁၂-၂၀၁၉ ရက်နေ့ နံနက် ၉ နာရီတွင် စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန အစည်းအဝေးခန်းမ၌ ကျင်းပရာ ဒီဂျစ်တယ်စီးပွားရေး ဖွံ့ဖြိုးတိုးတက်မှုကော်မတီ နာယက ဒုတိယသမ္မတ ဦးဟင်နရီဗန်ထီးယူ တက်ရောက်အမှာစကား ပြောကြားသည်။

      အစည်းအဝေးသို့ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန ပြည်ထောင်စုဝန်ကြီး ဦးစိုးဝင်း၊ ဒုတိယဝန်ကြီး ဦးသာဦး၊ ဒုတိယမြို့တော်ဝန် ဦးရဲမင်းဦး၊ အမြဲတမ်းအတွင်းဝန်များ၊ ညွှန်ကြား ရေးမှူးချုပ်များ၊ မြန်မာနိုင်ငံ ကွန်ပျူတာအသင်းချုပ်၊ မြန်မာနိုင်ငံကုန်သည်များနှင့် စက်မှုလက်မှု လုပ်ငန်းရှင်များအသင်းချုပ်တို့မှ တာဝန်ရှိသူများ တက်ရောက်ကြသည်။

 

ဒီဂျစ်တယ်စီးပွားရေး လမ်းပြမြေပုံ

        ရှေးဦးစွာ ဒီဂျစ်တယ်စီးပွားရေး ဖွံ့ဖြိုးတိုးတက်မှုကော်မတီနာယက ဒုတိယသမ္မတ ဦးဟင်နရီ ဗန်ထီးယူက ယနေ့ကျင်းပသည့် အစည်းအဝေးသည် ဒီဂျစ်တယ် စီးပွားရေးဖွံ့ဖြိုးတိုးတက်မှုကော်မတီ စတင်ဖွဲ့စည်းပြီး တတိယအကြိမ်ကျင်းပသည့် အစည်းအဝေးဖြစ်ပါကြောင်း၊ ဒီဂျစ်တယ်စီးပွားရေး လမ်းပြမြေပုံပါ ရေတို၊ ရေရှည်ရည်မှန်းချက်များပြည့်မီအောင် အကောင်အထည်ဖော်မည့် လုပ်ငန်းစဉ် များအပေါ် ပီပီပြင်ပြင် ဆောင်ရွက်နိုင်ရန်အတွက် ရည်ရွယ်ပြီး ကျင်းပသည့် အစည်းအဝေး တစ်ရပ် ဖြစ်ပါကြောင်း။

          ၂၁ ရာစုတွင် ဒီဂျစ်တယ်စီးပွားရေးလှိုင်းနှင့်အတူ (Industry 4.0) ပေါ်ထွန်း လာခဲ့ပါကြောင်း၊ စီးပွားရေးလှိုင်းတစ်ခု ပေါ်ထွန်းလာတိုင်း အဆိုပါစီးပွားရေးလှိုင်း ကို ကောင်းစွာအသုံးချနိုင်သည့် နိုင်ငံများ၏ စီးပွားရေး၊ လူမှုရေးအခြေအနေများ အလျင်အမြန် တိုးတက်သွားခဲ့ကြောင်း ကမ္ဘာ့သမိုင်း တွင် အထင်အရှားမြင်တွေ့ရမည်ဖြစ်ပါကြောင်း။ ထို့ကြောင့် နိုင်ငံတကာတွင် ဒီဂျစ်တယ်စီးပွားရေးလှိုင်း (Industry 4.0)ကို ကောင်းစွာအသုံးချပြီး စီးပွားရေး ဖွံ့ဖြိုးတိုးတက်အောင်လုပ်ဆောင်ရန်နှင့် ဒီဂျစ်တယ် စီးပွားရေးကို တည်ဆောက်ပြီး စီးပွားရေးနှင့် လူမှုရေးအရှိန်မြှင့်ရန် အလေးအနက်ထား ဆောင်ရွက် နေကြပြီဖြစ်ပါကြောင်း၊ အထူးသဖြင့် အဆိုပါတိုးတက် ပြောင်းလဲမှုလှိုင်းများတွင် မိမိတို့နိုင်ငံအနေဖြင့် နောက်ကျမကျန်ရစ်စေရန်နှင့် စဉ်ဆက်မပြတ်လိုက်ပါနိုင်ရန် ကြိုးပမ်းအားထုတ်သွားရမည် ဖြစ်ပါ ကြောင်း။

         ဒီဂျစ်တယ်စီးပွားရေးစနစ် ဖွံ့ဖြိုးတိုးတက်အောင်လုပ်ဆောင်ရန် နည်းပညာ လုပ်ငန်းသစ်များ တည်ထောင်ရန်၊ Software များ၊ Hardware များ ထုတ်လုပ်ပြီး ရောင်းချရန်ကိုသာ ရည်ရွယ်ခြင်းမဟုတ်ဘဲ လက်ရှိစီးပွားရေးကဏ္ဍများဖြစ် သည့် စိုက်ပျိုးရေး၊ မွေးမြူရေး၊ ကုန်ထုတ်လုပ်ရေးနှင့် SME လုပ်ငန်းများတွင် ဒီဂျစ် တယ်နည်းပညာအသုံးပြုပြီး စွမ်းဆောင်ရည်မြှင့်တင်ရန်နှင့် ပြည်သူအားလုံးက Digital Literacy ကောင်းစွာနားလည်ပြီး နည်းပညာနှင့်သတင်းအချက်အလက်များကို ပိုမိုထိရောက်စွာ အသုံးချကာ လူနေမှုအဆင့်အတန်းများ မြင့်တက်လာစေရန် ရည်ရွယ်ပါကြောင်း။

 

ပြင်ဆင်မွမ်းမံ

        ပြီးခဲ့သည့် ဒီဂျစ်တယ်စီးပွားရေး ဖွံ့ဖြိုးတိုးတက်ရေးကော်မတီ ဒုတိယအကြိမ် အစည်းအဝေးမှ တစ်ဆင့် ဒီဂျစ်တယ်စီးပွားရေးဖွံ့ဖြိုးတိုးတက်မှု လမ်းပြမြေပုံကို အမြဲတမ်း ဆက်လက်ပြင်ဆင် မွမ်းမံ သွားနိုင်မည့် (Living Document) အဖြစ်အတည်ပြုပြီးဖြစ်ပါကြောင်း။

        ဒီဂျစ်တယ်စီးပွားရေး လမ်းပြမြေပုံတွင် ဒီဂျစ်တယ်စီးပွားရေး ဖွံ့ဖြိုးတိုးတက်စေရန် အဓိက ကိုင်တွယ်ရမည့် မဟာဗျူဟာ(၆)ရပ်၊ ဦးစားပေးနယ်ပယ် (၉)ရပ်၊ ဒီဂျစ်တယ်စီးပွားရေး ဖွံ့ဖြိုးတိုးတက် လာစေရန်အတွက် ၂၀၂ဝ ပြည့်နှစ် နှင့် ၂၀၂၅ ခုနှစ်တို့တွင် ဖြစ်မြောက်အောင်ဆောင်ရွက်ရမည့် တိုင်းတာ၍ရသည့် ရည်မှန်းချက်ပန်းတိုင်များ သတ်မှတ်ခြင်း၊ သတ်မှတ်ထားသည့်ရည်မှန်းချက် ပန်းတိုင်များ ရောက်ရှိအောင် လက်တွေ့အောင်မြင်အောင် ကာလတို၊ ကာလ လတ်ဆောင်ရွက်ရမည့် လုပ်ငန်းအစီအစဉ်များပါရှိပါကြောင်း။

        ဒီဂျစ်တယ်စီးပွားရေးစနစ်ကို တိုးတက်ပြောင်းလဲဆန်းသစ်နေသည့် ကမ္ဘာကြီးနှင့် လိုက်လျော ညီထွေ ရပ်တည်နိုင်စွမ်းရှိရန်အတွက် ပညာရေးစနစ်မှ စတင်နိုင်ရန် လိုအပ်ပါကြောင်း၊ ပြည်သူများ၏ ဒီဂျစ်တယ်အသုံးပြုပညာ Digital Literacy ကြွယ်ဝလာစေရန် လူငယ်များ၊ နည်းပညာတက္ကသိုလ် ကျောင်းသား ကျောင်းသူများ၏ နည်းပညာကျွမ်းကျင်မှု Digital Technology Skill များကို မြှင့်တင်ရန်၊ မူလတန်းအဆင့်၊ အလယ် တန်းအဆင့် ကျောင်းသားကျောင်းသူများကို Digital Literacy နှင့် Digital Skill သင်ခန်းစာများသင်ကြားပေးပြီး လူ့စွမ်းအား အရင်းအမြစ် အဆင်သင့်ဖြစ်အောင် မြှင့်တင်ပေးရန် လိုအပ်ပါကြောင်း။

     ပြည်သူများ ဒီဂျစ်တယ်နည်းပညာများအပေါ်တွင် ယုံကြည်မှုရှိလာစေရန်၊ ကောင်းမွန်စွာ အသုံးပြုလာနိုင်စေရန်၊ နိုင်ငံတကာနည်းပညာကုမ္ပဏီများ ငွေကြေးအရင်းအမြစ်များ လာရောက်ရင်းနှီး မြှုပ်နှံလာစေရန်၊ ပြည်တွင်း ပြည်ပ နည်းပညာလုပ်ငန်းသစ်များ လွယ်ကူစွာထူထောင်အောင်မြင်စေရန် အားပေးသည့် စီးပွားရေးဝန်းကျင်အခြေအနေကောင်းများ ဖြစ်ပေါ်လာအောင် ဆောင်ရွက်ပေးရန်လည်း လိုအပ်ပါကြောင်း။

      လက်ရှိမိရိုးဖလာ စီးပွားရေးလုပ်ငန်းများကို နည်းပညာအသုံးပြုပြီး ဆန်းသစ်တီထွင်ထားသည့် Startups လုပ်ငန်းများအဖြစ် အသွင်ပြောင်းလာစေရန်၊ နိုင်ငံ၏ အဓိကကျသည့် စီးပွားရေးကဏ္ဍများ ဖြစ်သည့် လမ်းပြမြေပုံပါ ဦးစားပေးကဏ္ဍ ၉ ခုကို နည်းပညာသုံးပြီး မြှင့်တင်ပြောင်းလဲနိုင်အောင် ဆောင်ရွက်ရန် လိုအပ်ပါကြောင်း။

 

စမ်းသပ်အသုံးပြုနိုင်ရန် စီစဉ်ပေးရန်လိုအပ်

          ကဏ္ဍတစ်ခုချင်းစီတွင် နည်းပညာလုပ်ငန်းသစ်(Startups)များ ပေါ်ထွက်လာစေရန် နည်းပညာ ပြိုင်ပွဲများ ကျင်းပခြင်းနှင့် နိုင်ငံတကာတွင် အောင်မြင်စွာ အသုံးပြုနေသည့် Proven Technology Solution များကို လေ့လာပြီး ပြည်တွင်း လုပ်ငန်းကဏ္ဍများတွင် စမ်းသပ်အသုံးပြုနိုင်ရန် စီစဉ် ပေးရန်လည်း လိုအပ်ပါကြောင်း၊ နောက်ဆုံးပေါ် နည်းပညာများ အသုံးပြုပြီး အသွင်ပြောင်းနိုင်ရန် သက်ဆိုင်ရာအစိုးရဌာနများနှင့် ပုဂ္ဂလိကကဏ္ဍတို့ ပူးပေါင်းဆောင်ရွက်ရန် လိုအပ်ပါကြောင်း။

         လမ်းပြမြေပုံတွင် သတ်မှတ်ထားသည့် ရည်မှန်းချက်များ အောင်မြင်အောင် ဆောင်ရွက်ရမည့် အပိုင်းက ပိုမိုခက်ခဲပြီး စိန်ခေါ်မှုများသည့် အပိုင်းလည်းဖြစ်ပါကြောင်း၊ ကဏ္ဍအလိုက် ရေတိုရေရှည် အစီအစဉ်များကို Focal အဖြစ်ဆောင် ရွက်ရမည့် သက်ဆိုင်ရာဝန်ကြီးဌာန၊ အဖွဲ့အစည်းများနှင့် ပုဂ္ဂလိကကဏ္ဍတို့က မိမိတို့နှင့်သက်ဆိုင်သည့်ကဏ္ဍများကို တိုးတက်လာစေရန် တာဝန်ယူဆောင်ရွက် ပေးရန် တိုက်တွန်းလိုပါကြောင်း။

လမ်းပြမြေပုံတွင် ရည်မှန်းချက်များကို အချိန်ကာလ၊ ကိန်းဂဏန်းများနှင့် တိတိကျကျ သတ်မှတ် ထားသည်ကို တွေ့ရှိရပြီး အကောင်အထည်ဖော်ရာတွင် သတ်မှတ်ထားသည့် ရည်မှန်းချက်များကို အောင်မြင်အောင် အထူးကြိုးစားဆောင် ရွက်ကြရန် လိုပါကြောင်း။

          သတ်မှတ်ထားသည့် ရည်မှန်းချက်ပန်းတိုင်များ အောင်မြင်မှု ရှိ၊ မရှိ ပုံမှန် အကဲဖြတ်ရန်လိုအပ်ပြီး နှစ်စဉ်အဆိုပါရည်မှန်းချက် အညွှန်းကိန်းများ၏ တိုးတက်မှု၊ နိမ့်ကျမှုများကို ဒီဂျစ်တယ်စီးပွားရေး ဖွံ့ဖြိုးတိုးတက်မှုကော်မတီ အတွင်းရေးမှူးရုံးအဖွဲ့က ပုံမှန်စောင့်ကြည့်တင်ပြရန် လိုအပ်ပါကြောင်း။

          မိမိတို့နိုင်ငံ၏ ဒီဂျစ်တယ်စီးပွားရေးကို ပံ့ပိုးပေးနိုင်သည့်ကဏ္ဍများ၌ လက်ရှိနယ်ပယ်အသီးသီး တွင် ကမ္ဘာ့အဆင့်သတ်မှတ်ချက်အဆင့် (၁၀၀)ကျော်တွင် ရောက်နေပြီး အားနည်းသည့်အခြေအနေတွင် ရောက်ရှိနေသော်လည်း ယခင်သာဓကများအရ မိုဘိုင်းဖုန်းသုံးစွဲမှုတွင် နောက်ကျပြီးမှ သုံးစွဲနိုင်ခဲ့သော် လည်း နောက်ဆုံးပေါ် 3G, 4G နည်းပညာကွန်ရက်များကို အချိန်တိုအတွင်း အသုံးပြုနိုင်ခဲ့မှုများ၊ မိုဘိုင်း ဖုန်း ဆင်းကတ်သုံးစွဲမှုနှုန်းထားသည် ၁၂၆ ရာခိုင်နှုန်းအထိ ရောက်ရှိနေမှုများ၊ မိုဘိုင်းဖုန်းသုံးစွဲသူ အများစုက Smart Phone များကို အသုံးပြုနိုင်မှုများ၊ နည်းပညာများကို အလွယ်တကူ ကျွမ်းဝင် နားလည်နိုင်စွမ်းရှိသည့် လူငယ်ဦးရေ ရာခိုင်နှုန်းများနေမှုစသည့် အားသာချက်ကို ထိထိရောက်ရောက် အသုံးချကာ ကိုယ့်ရှေ့ကနိုင်ငံများကိုလေ့လာပြီး နောက်ကျသူ၏ အားသာချက် တစ်ခုအနေဖြင့် ဒီဂျစ်တယ်နည်းပညာအသစ်များကို ခုန်ပျံကျော်လွှား Leapfrog အသုံးချနိုင်ရန် ကြိုးပမ်းဆောင်ရွက် သွားရမည် ဖြစ်ပါကြောင်း။

 

ဦးတည်ကြိုးပမ်း

          ဒီဂျစ်တယ်စီးပွားရေးတွင် နည်းပညာနှင့် လူ့စွမ်းအားအရင်းအမြစ် ပြည့်စုံသည့် တိုင်းပြည်များက အားသာချက်များရှိသကဲ့သို့ ဒီဂျစ်တယ်နည်းပညာကြောင့် နိုင်ငံနယ်နိမိတ်များကို ကျော်လွှားပြီး ဈေးကွက်ကို သိမ်းပိုက်နိုင်စွမ်းအားမြင့်တက် လာပါကြောင်း၊ တစ်ချိန်တည်းတွင် နည်းပညာနှင့် လူ့စွမ်းအားအရင်းအမြစ် အဆင်သင့်မဖြစ်သည့် တိုင်းပြည်များအတွက် လက်ရှိကွာဟနေသည့် အခြေ အနေကို ပိုမိုကြီးမားသွားနိုင်သည့် စိန်ခေါ်မှုအခြေအနေများရှိပါကြောင်း၊ ထို့ကြောင့် ဆန်းသစ်တီထွင် ဖန်တီးနိုင်စွမ်းရှိသည့် လူသားအရင်းအမြစ်ရပ်ဝန်းကြီးတစ်ခု ဖြစ်လာအောင် ဦးတည်ကြိုးပမ်း ဆောင်ရွက်သွားရမည်ဖြစ်ပါကြောင်း။

          နိဂုံးချုပ်အနေဖြင့် ဒီဂျစ်တယ်စီးပွားရေးနှင့် နိုင်ငံ၏ စီးပွားရေး၊ လူမှုရေး တိုးတက်မှုကို အကျိုးပြု ရန်အတွက် ဒီဂျစ်တယ်စီးပွားရေးလှိုင်းကြောင့် လက်ရှိ ကွာဟနေသည့်အခြေအနေကို ကျော်လွှား နိုင်ရန်နှင့်နိုင်ငံတကာကို အမီလိုက်နိုင်ရန်၊ လမ်းပြမြေပုံတွင် ရည်မှန်းထားသည့်အဆင့်များ အောင်မြင်စွာ ရရှိနိုင်ရန်၊ ဒီဂျစ်တယ်စီးပွားရေး ဖွံ့ဖြိုးတိုးတက်မှုကော်မတီက ဖွဲ့စည်းထားသည့် ဆပ်ကော်မတီများနှင့် အတူ တက်ကြွသည့် ဦးဆောင်မှုဖြင့် သက်ဆိုင်သည့်အဖွဲ့ အစည်းများနှင့် အပြည့်အဝ ပူးပေါင်းဆ ောင်ရွက်ကြရန်၊ အကောင်အထည်ဖော် ရေးလုပ်ငန်းစဉ်များကို မိမိတိုင်းပြည်၊ မိမိလူမျိုးအတွက် တိုးတက်စေချင်သည့် ဆန္ဒ၊ ဝီရိယ၊ ကြိုးစားမှုများနှင့်ပေါင်းစပ်ပြီး ဆောင်ရွက်ပါက မိမိတို့နိုင်ငံကြီး ဖွံ့ဖြိုးတိုးတက်လာမည်ဖြစ်ကြောင်း တိုက်တွန်းပြောကြားသည်။

          ထို့နောက် ဒီဂျစ်တယ်စီးပွားရေး ဖွံ့ဖြိုးတိုးတက်မှုကော်မတီဥက္ကဋ္ဌ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန ပြည်ထောင်စုဝန်ကြီး ဦးစိုးဝင်းက စွန့်ဦးတီထွင် ဆန်းသစ်ဖန်တီးသူလူငယ်များ စဉ်ဆက်မပြတ်မွေးထုတ်ပေးနိုင်ရန် ရန်ကုန်ဆန်းသစ်တီထွင်မှု ဗဟိုဌာနကိုလည်း ဖွင့်လှစ်ပေးခဲ့ပြီး ဖြစ်ပါကြောင်း၊ ယင်းမှ တစ်ဆင့် နည်းပညာအခြေပြုသည့် စီးပွားရေးလုပ်ငန်းများကို ကိုယ်ထူကိုယ်ထ ထူထောင်လာနိုင်မည်ဖြစ်သည့်အတွက် နိုင်ငံ၏ ဒီဂျစ်တယ်စီးပွားရေးကဏ္ဍ ဦးမော့လာစေမည် ဖြစ်ပါကြောင်း။

ဒီဂျစ်တယ်စီးပွားရေး လမ်းပြမြေပုံပါလုပ်ငန်းစဉ်များကို အောင်မြင်စွာ အကောင်အထည်ဖော် ဆောင်ရွက်နိုင်ရန်အတွက် တာဝန်ရှိသူများနှင့် ပညာရှင်များသည် အတူတကွ ဟန်ချက်ညီညီလက်တွဲပြီး ပူးပေါင်းဆောင်ရွက်သွား ကြရမည်ဖြစ်ကြောင်း ပြောကြားသည်။

          ယင်းနောက် ဒီဂျစ်တယ်စီးပွားရေး ဖွံ့ဖြိုးတိုးတက်မှုကော်မတီ အတွင်းရေးမှူး(၁) စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန အမြဲတမ်းအတွင်းဝန်က ဒီဂျစ်တယ်စီးပွားရေး ဖွံ့ဖြိုးတိုးတက်မှု ကော်မတီ၏ ဒုတိယအကြိမ် အစည်းအဝေးဆုံးဖြတ်ချက်များအပေါ် ဆောင်ရွက်ပြီးစီးမှု အခြေအနေများ ကို ရှင်းလင်း တင်ပြသည်။

     ဆက်လက်၍ ဒီဂျစ်တယ်စီးပွားရေး အခြေခံအဆောက်အဦနှင့် ဆိုက်ဘာလုံခြုံရေး၊ ဖွံ့ဖြိုးတိုးတက်ရေးဆပ်ကော်မတီ၊ ဆန်းသစ်တီထွင်မှုနှင့် ဒီဂျစ်တယ်အတတ်ပညာမြှင့်တင်ရေး ဆပ်ကော်မတီနှင့် SME လုပ်ငန်းများနှင့် ဦးစားပေးကဏ္ဍများ ဒီဂျစ်တယ်အသွင်ကူးပြောင်းရေး ဆပ်ကော်မတီတို့မှ တာဝန်ရှိသူများက ဒီဂျစ်တယ်စီးပွားရေး ဖွံ့ဖြိုးတိုးတက်မှုလမ်းပြ မြေပုံပါ ၂၀၂၀ ပြည့်နှစ်တွင် ပြည့်မီရ မည့် ရည်မှန်းချက်ပန်းတိုင်များ ပြည့်မီစေရေးအတွက် ဆပ်ကော်မတီများအလိုက် Action Plan များ အကောင်အထည်ဖော်မှုနှင့် စပ်လျဉ်း၍ တိုးတက်မှုအခြေအနေများ၊ အခက်အခဲများ၊ ရှေ့ဆက် ဆောင်ရွက်သွားမည့် အစီအစဉ်များ၊ ဆုံးဖြတ်ပေးစေလိုသည့် အချက်များနှင့်စပ်လျဉ်း၍ ဆွေးနွေး တင်ပြကြသည်။

       ယင်းနောက် အစည်းအဝေးသို့ တက်ရောက်လာသူများက ဒီဂျစ်တယ်စီးပွားရေး ဖွံ့ဖြိုးတိုးတက်ရေးနှင့် စပ်လျဉ်း၍ (Myanmar Industry 4.0)အပေါ်အခြေခံသည့် Master Plan ရေးဆွဲရေးကိစ္စ၊ MM QR Code အသုံးပြုနိုင်ရေး၊ ရန်ပုံငွေကိစ္စ၊ စီးပွားရေး၊ ပညာရေး၊ စိုက်ပျိုးရေး၊ မွေးမြူရေး ကဏ္ဍများတွင် ဒီဂျစ်တယ်နည်းပညာသုံးစွဲနိုင်ရေး ကြိုးပမ်းဆောင်ရွက်နေမှု၊ တွေ့ကြုံနေရသည့်အခက်အခဲများ၊ လိုအပ် ချက်များနှင့် အထွေထွေကိစ္စရပ်များကို ဆွေးနွေးတင်ပြကြသည်။

 

အခွင့်ကောင်းတစ်ရပ်အဖြစ် မှတ်ယူ

          ထို့နောက် ဒုတိယသမ္မတ ဦးဟင်နရီဗန်ထီးယူက ဒုတိယအကြိမ် အစည်းအဝေး ဆုံးဖြတ်ချက် များမှ ဆောင်ရွက်ဆဲ၊ ဆောင်ရွက်ရန်ကျန်ရှိနေသည့် ကိစ္စရပ်များကို အမြန်ဆုံးပြီးစီးအောင် ဆောင်ရွက်ရန် လိုအပ်ပါကြောင်း၊ လုပ်ငန်းများကိုအောင်မြင်အောင် ဆောင်ရွက်ရန်အတွက် လိုအပ်သည့် ငွေကြေးရန်ပုံငွေပမာဏနှင့် ရရှိနိုင်မည့် နည်းလမ်းများ ရှာကြံသွားသင့်ပါကြောင်း၊ မိမိတို့နိုင်ငံသည် ဒီဂျစ်တယ်စီးပွားရေးကဏ္ဍတွင် နောက်ကျလျက်ရှိရာ ထိုနောက်ကျနေမှုကို အခွင့်ကောင်းတစ်ရပ်အဖြစ် မှတ်ယူပြီး ကျော်လွှားနိုင်ရေး ကြိုးစားဆောင်ရွက်သင့်ပါကြောင်း၊ လွတ်လပ်ပွင့်လင်းသည့် ဆွေးနွေးမှု၊ ညှိနှိုင်းမှုများဖြင့် အဖြေရှာပြီး မိမိတို့လုပ်ငန်းများအောင်မြင်အောင် ဆောင်ရွက်သင့်ပါကြောင်း မှာကြားပြီး အစည်းအဝေးကို ရုပ်သိမ်းလိုက်ကြောင်း သတင်းရရှိသည်။