_0.png)
ODK (Open Data Kit) Software ကို စီမံကိန်းလုပ်ငန်းအကောင်အထည်ဖော်ပြီးစီးမှုအခြေအနေစောင့်ကြည့်ကြီးကြပ်ရာတွင် ထည့်သွင်းအသုံးပြုနိုင်ရန်အတွက် ရှင်းလင်းဆွေးနွေးပွဲ
ODK (Open Data Kit) Software ကို လုပ်ငန်းစီမံကိန်းအကောင်အထည်ဖော်ပြီးစီးမှု အခြေအနေစောင့်ကြပ်ကြီးကြပ်ရာတွင် ထည့်သွင်းအသုံးပြုနိုင်ရန်အတွက် လုပ်ငန်းစီမံကိန်းများ အကောင်အထည်ဖော်လျက်ရှိသည့် ဝန်ကြီးဌာနများအောက်ရှိ သက်ဆိုင်ရာဦးစီးဌာန အဖွဲ့အစည်း များမှ တာဝန်ရှိသူများအား ရှင်းလင်းဆွေးနွေးပွဲကို ၂၀၁၇ ခုနှစ်၊ သြဂုတ်လ ၃၁ ရက်တွင် စီမံကိန်းစိစစ်ရေးနှင့်တိုးတက်မှုအစီရင်ခံရေးဦးစီးဌာန၊ ရုံးအမှတ် (၃၂) ၌ နံနက် ၉ နာရီမှ ၁၂ နာရီ အထိ ကျင်းပရာ ဦးစီးဌာန (၂၀) ခုတို့မှ အရာထမ်း (၂၆) ဦး တက်ရောက်ကြသည်။
ရှေးဦးစွာ ညွှန်ကြားရေးမှူးချုပ် ဒေါ်သွေးသွေးချစ်က စီမံကိန်းစိစစ်ရေးနှင့်တိုးတက်မှု အစီ ရင်ခံရေးဦးစီးဌာနအနေဖြင့် နိုင်ငံတစ်ဝှမ်းရှိ စီမံကိန်းလုပ်ငန်းများအားလုံးသို့ ကွင်းဆင်း စစ်ဆေး သွားရောက်ရန် အခက်အခဲများရှိကြောင်း၊ အကောင်အထည်ဖော်ဆောင်ရွက်လျက်ရှိသည့် ဌာန များအနေဖြင့် ODK Application ကို အသုံးပြုခြင်းဖြင့် မိမိတို့၏လုပ်ငန်းအကောင်အထည် ဖော်မှုအခြေအနေများကို စီမံကိန်းစိစစ်ရေးနှင့်တိုးတက်မှုအစီရင်ခံရေးဦးစီးဌာနသို့ ပေးပို့နိုင်မည် ဖြစ်ကြောင်း၊ ODK Application အသုံးပြု၍ အချက်အလက်များ ကောက်ယူခြင်းအား ကမ္ဘာ့ဘဏ်၏ နည်းပညာအကူအညီဖြင့် ဆောင်ရွက်ခြင်းဖြစ်ကြောင်း၊ ၎င်း Application ကို မကြာမီကွင်းဆင်း စစ်ဆေးမည့် ကျောက်ဆည်ခရိုင်၊ မြင်းခြံခရိုင် နှင့်မိတ္တီလာခရိုင်တို့တွင် pilot test အနေဖြင့် စမ်းသပ်အသုံးပြုသွားရန် ရည်ရွယ်ထားကြောင်း၊ ဌာနများအနေဖြင့်လည်း ODK Application အသုံးပြုမှုနှင့်ပတ်သက်၍ အကြံပြုချက်များပေးနိုင်ပြီး၊ ပူးပေါင်းဆောင်ရွက်ပေးရန် မေတ္တာရပ်ခံ လိုကြောင်း ပြောကြားပါသည်။
ထို့နောက် ကမ္ဘာ့ဘဏ်၏ နည်းပညာဆိုင်ရာ အကြံပေး ဦးမျိုးမင်းဦးမှ ODK Application အား Android Phone တွင်ထည့်သွင်းခြင်း၊ အသုံးပြုပုံများနှင့်ပတ်သက်၍ ရှင်းလင်းပြောကြားပြီး၊ တက်ရောက်လာသူများမှ ODK Application အား အသုံးပြု၍ စီမံကိန်း စိစစ်ရေးနှင့်တိုးတက်မှုအစီရင်ခံရေးဦးစီးဌာနမှ ပြုလုပ်ထားသည့် အချက်အလက်ကောက်ယူ သည့်ပုံစံများတွင် ထည့်သွင်း၍ အချက်အလက်များပေးပို့ခြင်းတို့ကို လက်တွေ့ဆောင်ရွက်ကြပြီး အကြံပြုချက်များ၊ သိလိုသည်များ မေးမြန်းဆွေးနွေးခဲ့ကြသည ်။