![](http://www.mopf.gov.mm/sites/default/files/sites/default/files/Final 1.jpg)
နေပြည်တော်၊ ဩဂုတ် ၇
ငွေတိုက်ဦးစီးဌာန၊ အမှုထမ်းများ လုပ်ငန်းပိုင်းဆိုင်ရာ မွမ်းမံသင်တန်း အမှတ်စဉ်(၁) သင်တန်း ဆင်းပွဲအခမ်းအနားကို ၂၀၂၄ ခုနှစ်၊ ဩဂုတ်လ ၇ ရက်နေ့၊ ညနေ (၄:၃၀) အချိန်တွင် ရုံးအမှတ် (၃၄)၊ စုပေါင်းခန်းမကြီး၌ ကျင်းပခဲ့ပါသည်။
သင်တန်းဆင်းပွဲအခမ်းအနားသို့ ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်၊ ညွှန်ကြားရေးမှူးများ၊ ဒုတိယညွှန်ကြားရေးမှူးများ၊ သင်တန်းနည်းပြများနှင့် သင်တန်းသား၊ သင်တန်းသူများ တက်ရောက်ခဲ့ကြပါသည်။
သင်တန်းဆင်းပွဲတွင် ငွေတိုက်ဦးစီးဌာန၊ ညွှန်ကြားရေးမှူးချုပ်က အမှာစကားပြောကြားရာ၌ ယနေ့အခမ်းအနားသည် ၁၇−၇−၂၀၂၄ ရက်နေ့မှ ၆−၈−၂၀၂၄ ရက်နေ့အထိ ဖွင့်လှစ်ခဲ့သည့် ဌာတွင်း အမှုထမ်းများ လုပ်ငန်းပိုင်းဆိုင်ရာ မွမ်းမံသင်တန်း အမှတ်စဉ်(၁) သင်တန်းဆင်းပွဲ အခမ်းအနား ဖြစ်ပါကြောင်း၊ သင်တန်းဖွင့်ပွဲ အခမ်းအနားကိုလည်း ဇူလိုင်လ (၁၇)ရက်နေ့က ဒုတိယဝန်ကြီးချုပ်နှင့် စီမံကိန်းနှင့်ဘဏ္ဍာရေးဝန်ကြီးဌာန၊ပြည်ထောင်စုဝန်ကြီး တက်ရောက်အမှာစကား ပြောကြား၍ ဖွင့်လှစ်ပေးခဲ့ပါကြောင်း၊ သင်တန်းကို ၁၇−၇−၂၀၂၄ ရက်နေ့မှ ၅−၈−၂၀၂၄ ရက်နေ့အထိ ပို့ချခဲ့ပြီး ၆-၈-၂၀၂၄ ရက်နေ့တွင် သင်တန်းဆန်းစစ်ချက်များအား စစ်ဆေးပြီးဖြစ်ပါ၍ သင်တန်း၌ ပထမ၊ ဒုတိယ၊ တတိယ ရရှိကြသည့် ဝန်ထမ်းများအား ဆုချီးမြှင့်သွားမည်ဖြစ်ပါကြောင်း၊ ဌာနခွဲအသီးသီးတွင် တာဝန်ထမ်းဆောင်လျက်ရှိကြသော ဝန်ထမ်းများ၏ အရည်အသွေးနှင့် စွမ်းဆောင်ရည်ပြည့်ဝစေရန်နှင့် ရုံးလုပ်ငန်းဆိုင်ရာစီမံခန့်ခွဲမှု အရည်အချင်းများ တိုးတက်မြင့်မားလာစေရန် ရည်ရွယ်၍ လူ့စွမ်းအား အရင်း အမြစ်ဖွံ့ဖြိုးတိုးတက်ရေး အစီအစဉ်များကို စဉ်ဆက်မပြတ် ကျင်းပပြုလုပ်ပေးလျက်ရှိကြောင်း၊ ယခုသင်တန်းတွင် ဌာနတွင်းလုပ်ငန်းကျွမ်းကျင်မှု ဘာသာရပ်များအပြင် မဖြစ်မနေ သိသင့်သိထိုက်သည့် ပြင်ပဘာသာရပ်များအဖြစ် ဘတ်ဂျက်ရေးဆွဲခြင်းနှင့်ဘဏ္ဍာရေးစည်းမျဉ်း၊ စီမံကိန်းရေးဆွဲခြင်း၊ စာရင်းစစ်ဆေးခြင်းလုပ်ငန်းများ စသည့်ဘာသာရပ်များ သင်ကြားပို့ချပေးခဲ့ပါကြောင်း၊ သင်တန်းသား၊ သင်တန်းသူများအနေဖြင့် တစ်ဦးတစ်ယောက်ချင်းစီ၏ အရည်အသွေး တိုးတက်ရန် မိမိကိုယ်တိုင် ကြိုးစားအားထုတ်ကြရန်လိုအပ်ပါကြောင်း၊ လုပ်ငန်းပိုင်းဆိုင်ရာ ဘာသာရပ်များအပြင် အင်္ဂလိပ်စာဘာသာရပ်ကိုပါ လေ့လာရန်လိုအပ်ပါကြောင်း၊ နိုင်ငံခြားပညာသင်ဆုများ လျှောက်ထားနိုင်ရန်အတွက် အင်္ဂလိပ်စာအရည်အချင်းများတိုးတက်ရန် အမြဲမပြတ်လေ့လာကြရန် တိုက်တွန်းပါကြောင်း၊ မိမိအတွက် အကျိုးရှိထိရောက်ပြီး စိတ်ပါဝင်စားသည့် ဘာသာရပ်များကို စဉ်ဆက်မပြတ် လေ့လာကြရန်နှင့် ရည်ရွယ်ချက်၊ ရည်မှန်းချက် ကြီးကြီးမားမား ထားရှိကြရန် မှာကြားလိုကြောင်း၊ မိမိကိုယ်တိုင် ကြိုးစားအားထုတ်မူသည် မိမိအတွက် ဦးစွာကောင်းကျိုးရရှိ၍ ပင်ကိုယ်အရည်အသွေးများမြင့်မားလာပြီး မိမိဌာန၊ဝန်ကြီးဌာနနှင့်နိုင်ငံတော်အတွက်လည်း အားကိုး အားထားပြုရသည့် ဝန်ထမ်းကောင်းများဖြစ်လာကြမည်ဖြစ်ကြောင်း တိုက်တွန်းပြောကြားခဲ့ပါသည်။
ထို့နောက် ညွှန်ကြားရေးမှူးချုပ်က ဌာနတွင်း အမှုထမ်းများ လုပ်ငန်းပိုင်းဆိုင်ရာ မွမ်းမံသင်တန်း အမှတ်စဉ် (၁) သင်တန်းတွင် ပထမဆု၊ ဒုတိယဆု၊ တတိယဆု ရရှိသူများအား ဆုချီးမြှင့်ခဲ့ပြီး သင်တန်းဆင်းအောင်လက်မှတ်များအား ပေးအပ်ခဲ့ပါသည်။
ဌာနတွင်း အမှုထမ်းများ လုပ်ငန်းပိုင်းဆိုင်ရာ မွမ်းမံသင်တန်းအမှတ်စဉ်(၁) တွင် စိစစ်ရေးမှူး-၂ (၂၆) ဦး၊ စာရင်းကိုင်-၃ (၁)ဦး၊ စာရင်းကိုင်-၄ (၈)ဦး တက်ရောက်ခဲ့ပါသည်။