အဖွဲ့အစည်းများ၏ လုပ်ငန်းဆောင်ရွက်မှု အခြေအနေများသုံးသပ်ရေးလုပ်ငန်းအဖွဲ့၏ (၃/၂၀၂၄) ကြိမ်မြောက် လုပ်ငန်းညှိနှိုင်းအစည်းအဝေး ကျင်းပခြင်း

အဖွဲ့အစည်းများ၏ လုပ်ငန်းဆောင်ရွက်မှု အခြေအနေများ သုံးသပ်ရေးလုပ်ငန်းအဖွဲ့၏

(၃/၂၀၂၄) ကြိမ်မြောက် လုပ်ငန်းညှိနှိုင်းအစည်းအဝေး ကျင်းပခြင်း

နေပြည်တော်

၂၀၂၄ ခုနှစ် ဇွန်လ ၁၇ ရက်

        အသေးစား၊ အငယ်စားနှင့် အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေးလုပ်ငန်း သုံးသပ်မှုအစီရင်ခံရေးအဖွဲ့အောက်ရှိ အထောက်အကူပြုလုပ်ငန်းအဖွဲ့(၁)ဖွဲ့ဖြစ်သော အဖွဲ့အစည်းများ၏ လုပ်ငန်းဆောင်ရွက်မှုအခြေအနေများ သုံးသပ်ရေးလုပ်ငန်းအဖွဲ့၏ (၃/၂၀၂၄) ကြိမ်မြောက် လုပ်ငန်း ညှိနှိုင်းအစည်းအဝေးကို စီမံကိန်းနှင့်ဘဏ္ဍာရေးဝန်ကြီးဌာန၊စီမံကိန်းစိစစ်ရေးနှင့်တိုးတက်မှုအစီရင်ခံရေး ဦးစီးဌာန၊ ရုံးအမှတ်(၃၂) ၌ ၁၇-၆-၂၀၂၄ ရက်နေ့၊ နံနက် ၁၀:၀၀ နာရီတွင် ကျင်းပပြုလုပ်ခဲ့ပါသည်။

        အစည်းအဝေးတွင် လုပ်ငန်းအဖွဲ့ဥက္ကဋ္ဌ၊ စီမံကိန်းစိစစ်ရေးနှင့် တိုးတက်မှုအစီရင်ခံရေးဦးစီးဌာန၊ ညွှန်ကြားရေးမှူးချုပ်က အဖွင့်အမှာစကားပြောကြားရာတွင် မိမိတို့အဖွဲ့အနေဖြင့် ၂၀၂၃-၂၀၂၄ ဘဏ္ဍာ နှစ်တွင် MSME လုပ်ငန်းများ ဖွံ့ဖြိုးတိုးတက်ရေး အေဂျင်စီနှင့် MSME လုပ်ငန်းများ ဖွံ့ဖြိုးတိုးတက်ရေး ရန်ပုံငွေစီမံခန့်ခွဲမှုအဖွဲ့တို့၏ လုပ်ငန်းဆောင်ရွက်မှုအခြေအနေနှင့် စပ်လျဉ်းသည့် အစီရင်ခံစာ (၂) စောင် အပါအဝင် MSME လုပ်ငန်းများ ဖွံ့ဖြိုးတိုးတက်ရေးနှင့်စပ်လျဉ်းသည် အစီရင်ခံစာ (၆)စောင်ကို MSME လုပ်ငန်းများ ဖွံ့ဖြိုးတိုးတက်ရေး လုပ်ငန်းသုံးသပ်မှု အစီရင်ခံရေးအဖွဲ့သို့ တင်ပြခဲ့ပါကြောင်း၊ ၂၀၂၄-၂၀၂၅ ဘဏ္ဍာနှစ်အတွင်း MSME လုပ်ငန်းများဖွံ့ဖြိုးတိုးတက်ရေးကို အထောက်အကူပြုစေမည့် အစီရင်ခံစာ များတင်ပြရန် Timeline and Schedule ရေးဆွဲထားပြီး ဖြစ်ပါကြောင်း၊  MSME လုပ်ငန်းများဖွံ့ဖြိုး တိုးတက်ရေးလုပ်ငန်းသုံးသပ်မှု အစီရင်ခံရေးအဖွဲ့၏ (၁/၂၀၂၄) ကြိမ်မြောက် အစည်းအဝေးဆုံးဖြတ် ချက်အရ ကနဦးလေ့လာသုံးသပ်ရေးလုပ်ငန်းအဖွဲ့က ဦးဆောင်ပြီး နေပြည်တော်ကောင်စီနယ်မြေ အတွင်းရှိ MSME လုပ်ငန်း(၂)ခုကို မြေပြင်ကွင်းဆင်းရာတွင် ကျန်လုပ်ငန်းအဖွဲ့(၃)ဖွဲ့က  အဖွဲ့ဝင် (၁) ဦးစီ ပါဝင်ရမည်ဖြစ်သဖြင့် မိမိတို့အဖွဲ့အနေမှ အဖွဲ့ဝင် (၁) ဦး အမည်စာရင်းပေးရန်အတွက် ဝိုင်းဝန်းဆွေးနွေးရန်ဖြစ်ပါကြောင်း ပြောကြားပါသည်။

        ဆက်လက်၍ လုပ်ငန်းအဖွဲ့အတွင်းရေးမှူး၊ စီမံကိန်းစိစစ်ရေးနှင့် တိုးတက်မှုအစီရင်ခံရေး ဦးစီးဌာန၊ ဒုတိယညွှန်ကြားရေးမှူးချုပ်က လုပ်ငန်းအဖွဲ့၏ (၂/၂၀၂၄) ကြိမ်မြောက် အစည်းအဝေးဆုံးဖြတ်ချက်များအပေါ်ဆောင်ရွက်ပြီးစီးမှု အခြေအနေများ၊ လုပ်ငန်းအဖွဲ့က ပြုစုလျက်ရှိသည့်အစီရင်ခံစာများနှင့် ရှေ့ဆက်ဆောင်ရွက်မည့် လုပ်ငန်းများကို ရှင်းလင်းဆွေးနွေးတင်ပြပါသည်။ အဖွဲ့ဝင်များက ပြုစုမည့်အစီရင်ခံစာများနှင့်စပ်လျဉ်း၍ အကြံပြုချက်များ၊ ဖြည့်စွက်ရန်အချက်များနှင့် ရှေ့ဆက်လက် ဆောင်ရွက်မည့် လုပ်ငန်းများအပေါ် ဝိုင်းဝန်းဆွေးနွေးခဲ့ကြပါသည်။

        ထို့နောက် လုပ်ငန်းအဖွဲ့ဥက္ကဋ္ဌက MSME လုပ်ငန်းများ ဖွံ့ဖြိုးတိုးတက်ရေးကို အထောက်အကူပြုစေမည့် အစီရင်ခံစာများကို လျာထားသည့် Timeline and Schedule အတိုင်း အချိန်မီတင်ပြရေး၊ အချက်အလက်များ ပြည့်စုံစေရေးတို့အတွက် အဖွဲ့ဝင်များအနေဖြင့် ဝိုင်းဝန်းပံ့ပိုး ကူညီပေးရန်နှင့် အဖွဲ့ဝင်များ၏ ဆွေးနွေးအကြံပြုချက်များအရ နေပြည်တော်ကောင်စီနယ်မြေအတွင်းရှိ MSME လုပ်ငန်း (၂)ခုကို မြေပြင်ကွင်းဆင်းရေးအဖွဲ့တွင် အဖွဲ့၏ အထောက်အကူပြုအဖွဲ့မှ အရာထမ်း (၁) ဦး၏ အမည် စာရင်းအားပေးပို့ရန် ပြောကြားပါသည်။

        အစည်းအဝေးသို့ လုပ်ငန်းအဖွဲ့၏ အဖွဲ့ဝင်များဖြစ်သည့် ဌာန/အဖွဲ့စည်းများမှ အဖွဲ့ဝင် (၇) ဦး တက်ရောက်ပါသည်။