နေပြည်တော်၊ ဧပြီ ၃

ဌာနဆိုင်ရာ လုပ်ငန်းကျွမ်းကျင်မှု အခြေခံသင်တန်းအမှတ်စဉ် (၁/၂၀၂၂-၂၀၂၃) သင်တန်းဆင်းပွဲအခမ်းအနားကို ၂၀၂၃ ခုနှစ် ဧပြီလ ၃ ရက်နေ့၊ နံနက် (၉:၃၀) နာရီတွင် စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ် (၃၄) စုပေါင်းခန်းမ၌ ကျင်းပပြုလုပ်ခဲ့ပါသည်။

အခမ်းအနားတွင် ညွှန်ကြားရေးမှူးချုပ်က သင်တန်းသား အရာထမ်း၊ အမှုထမ်းများအနေဖြင့် ရုံးလုပ်ငန်းများ၊ ဝန်ထမ်းများလိုက်နာရမည့် စည်းမျဉ်း၊ စည်းကမ်း၊ ဘဏ္ဍာရေးစည်းမျဉ်းများကို သိရှိနားလည်သဘောပေါက်ပြီး လုပ်ငန်းများအဆင်ပြေချောမွေ့စွာ ဆောင်ရွက်နိုင်ရန် ရည်ရွယ်၍ ယခုသင်တန်းတွင် ဌာန၏ ရုံးလုပ်ငန်းများကို အခြေခံကျကျ ပို့ချခဲ့ခြင်းဖြစ်ကြောင်း၊ သင်တန်းသား/သင်တန်းသူများအနေဖြင့် နိုင်ငံ့ဝန်ထမ်းများဖြစ်သည့်အတွက် နိုင်ငံတော်တာဝန်များကို ထမ်းဆောင်ရာတွင် ဝန်ထမ်းကျင့်ဝတ်၊ နိုင်ငံ့ဝန်ထမ်းဥပဒေ/နည်းဥပဒေအပြင် စီမံကိန်းနှင့်ဘဏ္ဍာရေးဝန်ကြီးဌာနအောက်ရှိ ဌာနတစ်ခုဖြစ်တဲ့အတွက် စီမံကိန်းဆိုင်ရာ ဘဏ္ဍာရေးဆိုင်ရာ ဥပဒေ၊ နည်းဥပဒေ၊ စည်းမျဉ်းစည်းကမ်းများကို သိရှိအောင် လေ့လာမှတ်သားရမည်ဖြစ်ပြီး လိုက်နာကျင့်သုံးရမှာဖြစ်ကြောင်း၊ သင်တန်းတွင် သက်ဆိုင်ရာ သင်တန်းနည်းပြဆရာများမှ စာတွေ့ လက်တွေ့ ပို့ချခြင်းများ၊ ပို့ချချက်များအပေါ် အပြန်အလှန်ဆွေးနွေးခြင်းများ ဆောင်ရွက်ခဲ့သည့်အတွက် သက်ဆိုင်ရာဌာနခွဲများ၏ လုပ်ငန်းများကို သိရှိနားလည်ကြပြီးဖြစ်၍ သင်တန်းသား/ သင်တန်းသူများအနေဖြင့် မိမိတို့တာဝန်ကျရာ ဌာနခွဲများတွင် အကျိုးရှိရှိ ပြန်လည်အသုံးချ၍ ဆောင်ရွက်ကြစေလိုကြောင်း၊ အထူးမှာကြားရာတွင် ဝန်ထမ်းများအနေဖြင့် ဦးစွာ ဌာန၏ ရုံးလုပ်ငန်းများကို သိရှိအောင်မှတ်သားလေ့လာရန်၊ မိမိသိရှိမှတ်သားထားသည်များကို ကျွမ်းကျင်လာစေရန် လက်တွေ့‌ဆောင်ရွက်ရန်၊ ပိုပြီးသိရှိနားလည်လာစေရန်အတွက် စဉ်ဆက်မပြတ်လေ့လာရန်နှင့် အချိန်ကို အကျိုးရှိစွာ အသုံးချရန်နှင့် မိမိသိရှိတတ်ကျွမ်းသည်များကို ထပ်ဆင့်မျှဝေပေးရန်ဖြစ်ကြောင်း ပြောကြားခဲ့ပါသည်။ ထို့နောက် ညွှန်ကြားရေးမှူးချုပ်က သင်တန်းတွင် ပထမဆု၊ ဒုတိယဆုနှင့် တတိယဆု ရရှိသူ သင်တန်းသား/သူများအား ဆုချီးမြှင့်ခဲ့ပြီး သင်တန်းဆင်းအောင်လက်မှတ်များကို အသီးသီးပေးအပ်ခဲ့ပါသည်။

သင်တန်းဆင်းပွဲအခမ်းအနားသို့ ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများ၊ ဒုတိယညွှန်ကြားရေးမှူးများနှင့် သင်တန်းသားများ တက်ရောက်ခဲ့ပြီး တစ်လကြာဖွင့်လှစ်ပို့ချခဲ့သည့် အဆိုပါသင်တန်းသို့ သင်တန်းသား/ သင်တန်းသူ (၃၀) ဦး တက်ရောက်ခဲ့ပါသည်။ အခမ်းအနားကို နံနက် (၁၀:၃၀)နာရီတွင် ရုပ်သိမ်းခဲ့ပါသည်။