မွန်ပြည်နယ်၊ မော်လမြိုင်မြို့တွင် စာရင်းအင်းဥပဒေ၊ နည်းဥပဒေများ အသိပညာမြှင့်တင်ရေး ဆွေးနွေးပွဲကျင်းပ

မွန်ပြည်နယ်၊ ဗဟိုစာရင်းအင်းအဖွဲ့၏ စာရင်းအင်းဥပဒေ၊ နည်းဥပဒေများ အသိပညာမြှင့်တင်ရေးဆွေးနွေးပွဲကို ၂၀၂၂ ခုနှစ် ဖေဖော်ဝါရီလ ၁၇-၂-၂၀၂၂ ရက်နေ့က မွန်ပြည်နယ်၊ မော်လမြိုင်မြို့၊ ပြည်နယ်ခန်းမ၌ ကျင်းပခဲ့ရာ ဆွေးနွေးပွဲသို့ မွန်ပြည်နယ်အစိုးရအဖွဲ့ စီးပွားရေးရာဝန်ကြီး ၊ ဗဟိုစာရင်းအင်းအဖွဲ့မှ ဒုတိယညွှန်ကြားရေးမှူးချုပ်နှင့် တာဝန်ရှိသူများ၊ သက်ဆိုင်ရာဌာနအသီးသီးမှ တာဝန်ရှိသူများ စုစုပေါင်း (၁၀၀) ဦးခန့် တက်ရောက်ခဲ့ကြပြီး မွန်ပြည်နယ်အစိုးရအဖွဲ့ စီးပွားရေးရာဝန်ကြီး နိုင်လယိတမက အဖွင့်အမှာစကားပြောကြားခဲ့ပါသည်။     
ဆွေးနွေးပွဲတွင် စီးပွားရေးရာဝန်ကြီး နိုင်လယိတမက  ယခုဆွေးနွေးပွဲကို စီမံကိန်းနှင့် ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့မှ ၂၀၁၈ ခုနှစ်၊ ဇန်နဝါရီလတွင် ထုတ်ပြန်ခဲ့သည့် စာရင်းအင်းဥပဒေနှင့် ၂၀၂၁ခုနှစ်၊ မေလ တွင် ထုတ်ပြန်လိုက်သည့် စာရင်းအင်းနည်းဥပဒေများ သက်ဝင်လာစေရေး၊ အမျိုးသားစာရင်းအင်းစနစ်တွင်ပါဝင်သည့် သက်ဆိုင်ရာဌာနများနှင့် ပုဂ္ဂလိကကဏ္ဍမှ လုပ်ငန်းရှင်များအကြား စာရင်းအင်းဥပဒေ၊ နည်းဥပဒေများနှင့်စပ်လျဉ်း၍ ကျယ်ကျယ်ပြန့်ပြန့် သိရှိနားလည်လာစေရေးနှင့် စာရင်းအင်းလုပ်ငန်းများကို လုပ်ကိုင်ဆောင်ရွက်သည့်နေရာတွင် ဥပဒေနှင့်အညီ ဆောင်ရွက်နိုင်စေရေးတို့ကို ရည်ရွယ်၍ ကျင်းပရခြင်း ဖြစ်ပါကြောင်း၊ နိုင်ငံတစ်နိုင်ငံဖွံ့ဖြိုးတိုးတက်ရေးအတွက် နိုင်ငံ၏အမျိုးသားစာရင်းအင်းစနစ် ခိုင်မာအားကောင်းရန် လိုအပ်ပါကြောင်း၊ အမျိုးသားစာရင်းအင်းစနစ် ခိုင်မာအားကောင်းပြီး ပြည့်စုံမှန်ကန်သည့် စာရင်းအင်းအချက်အလက်များရရှိမှသာ နိုင်ငံအတွက်မူဝါဒများနှင့် စီမံကိန်းများရေးဆွဲရာမှာလည်းကောင်း၊ သယံဇာတများ ခွဲဝေအသုံးပြုရာတွင်လည်းကောင်း၊ သုတေသနနှင့်ဖွံ့ဖြိုးရေးလုပ်ငန်းများ ဆောင်ရွက်ရာတွင်လည်းကောင်း၊ ထိရောက်စွာ အထောက်အကူပြုနိုင်မည်ဖြစ်ပါကြောင်း၊ တိကျမှန်ကန်၍ မြေပြင်အခြေအနေနှင့်ကိုက်ညီမှုရှိသည့် စာရင်းအင်းအချက်အလက်များကို မူဝါဒချမှတ်သည့်သူများသာမက စီးပွားရေးလုပ်ငန်းရှင်များ၊ ရင်းနှီးမြှုပ်နှံသူများ၊ ကျောင်းသားများအတွက်လည်း အထူးလိုအပ်ပြီး ပွင့်လင်းမြင်သာ၍ တာဝန်ယူမှု၊ တာဝန်ခံမှုရှိသည့် အစိုးရတစ်ရပ်ဖြစ်ရန် တိကျမှန်ကန်သည့် စာရင်းအင်းအချက်အလက်များကို အချိန်နှင့်တစ်ပြေးညီ ထုတ်ပြန်နိုင်ရန် လိုအပ်ပါကြောင်း၊ 
မွန်ပြည်နယ် ဗဟိုစာရင်းအင်းအဖွဲ့၏ အခြားလုပ်ငန်းတာဝန်များဖြစ်သည့်  မွေးဖွားမှုနှင့် သေဆုံးမှုစာရင်းများ စုစည်းတင်ပြခြင်း၊ ကျေးလက်ဒေသဖွံ့ဖြိုးရေးနှင့် ဆင်းရဲနွမ်းပါးမှုလျှော့ချရေးဆိုင်ရာ အညွှန်းကိန်းများစုစည်းတင်ပြခြင်း၊ လူမှုစီးပွားဆိုင်ရာစာရင်းအင်းများ စုစည်းတင်ပြခြင်း၊  ဈေးနှုန်းစာရင်းများကောက်ယူခြင်း၊ စစ်တမ်းကောက်ယူခြင်း လုပ်ငန်းများတွင်လည်း မွန်ပြည်နယ်အတွင်းရှိ အထွေထွေအုပ်ချုပ်ရေးဦးစီးဌာနအပါအဝင် ဌာနဆိုင်ရာများအားလုံးမှ ဝိုင်းဝန်းကူညီဆောင်ရွက်ပေးကြရန် တိုက်တွန်းပြောကြားလိုပါကြောင်း၊ စာရင်းအင်းဥပဒေ၊ နည်းဥပဒေများသည် ရေးဆွဲပြဋ္ဌာန်းလိုက်ရုံဖြင့် သက်ဝင်လာမည်မဟုတ်ပါကြောင်း၊ စာရင်းအင်းဥပဒေ၊ နည်းဥပဒေများ ခိုင်မာအားကောင်းစေရန်၊ သက်ဝင်ကျင့်သုံးလာစေရန်၊ စာရင်းအင်းနှင့်စပ်လျဉ်းသည့်  ပါဝင်ပတ်သက်သူများအကြား ကျယ်ကျယ်ပြန့်ပြန့်သိရှိစေရန်၊ စာရင်းအင်းလုပ်ငန်းများကိုဆောင်ရွက်ရာတွင် ဥပဒေနှင့်အညီ ဆောင်ရွက်နိုင်ရန်အတွက် စာရင်းအင်းဆိုင်ရာ အသိပညာမြှင့်တင်ခြင်းလုပ်ငန်းများသည် အရေးကြီးပါကြောင်း၊ ယခုကဲ့သို့ အသိပညာပေးဆွေးနွေးပွဲများ ဆောင်ရွက်ပေးခြင်းဖြင့် မိမိတို့နိုင်ငံ၏ အမျိုးသားစာရင်းအင်းစနစ်တွင် ပါဝင်သည့် ဌာနဆိုင်ရာများအားလုံး စာရင်းအင်းလုပ်ငန်းများ လုပ်ကိုင်ဆောင်ရွက်ကြရာတွင် အခက်အခဲမရှိ ဆောင်ရွက်နိုင်မည်ဖြစ်ပါကြောင်း ပြောကြားခဲ့ပါသည်။
ထို့နောက် ဗဟိုစာရင်းအင်းအဖွဲ့၊ ဒုတိယညွှန်ကြားရေးမှူးချုပ် ဦးသန်းဇော်က စာရင်းအင်းဥပဒေနှင့်နည်းဥပဒေများတွင် ပြဋ္ဌာန်းထားသည့် အကြောင်းအရာများနှင့်စပ်လျဉ်း၍ ရှင်းလင်းပြောကြားပြီး တက်ရောက်လာသည့် ဌာနဆိုင်ရာများမှ တာဝန်ရှိသူများက မေးမြန်းဆွေးနွေးခဲ့ကြပါသည်။