Housing Insurance Package (အိမ်ရာချေးငွေတဆင့်အာမခံ) မိတ်ဆက်ခြင်းအခမ်းအနားကျင်းပ

မြန်မာ့အာမခံလုပ်ငန်းမှ ယခုရောင်းချမည့် Housing Insurance Package အာမခံအမျိုးအစားသည် အာမခံထားရှိသူ၏ သေဆုံးမှု၊ ထာဝစဉ်မသန်စွမ်းဖြစ်မှုနှင့် ချေးငွေရယူထားသည့် အဆောက်အဦ ပျက်စီးမှုတို့ကြောင့် အာမခံထားရှိသူ သို့မဟုတ် ကျန်ရစ်သူမိသားစုအပြင် ချေးငွေထုတ်ချေးသည့် အဖွဲ့အစည်းများအတွက်ပါ အကျိုးရှိစေမည့် အာမခံအမျိုးအစားတစ်ခု ဖြစ်ပါသည်။

          အာမခံထားရှိသူသည် ဘဏ်ချေးငွေဖြင့် အဆောက်အဦ ဝယ်ယူပြီး အာမခံသက်တမ်း အတွင်း သေဆုံးခဲ့လျှင် သို့မဟုတ် ထာဝစဉ်မသန်စွမ်း ဖြစ်ခဲ့လျှင် ပေးရန်ကျန်ရှိသော အဆောက်အဦတန်ဖိုးကို  မြန်မာ့အာမခံလုပ်ငန်းမှ ပေးချေပေးမှာ ဖြစ်တဲ့အတွက် ကျန်ရစ်သူ မိသားစုအနေနှင့် ပေးရန်ကျန်ရှိသော ချေးငွေအတွက် စိတ်ပူစရာမလိုဘဲ ချေးငွေဖြင့် ဝယ်ယူထားသော အဆောက်အဦကို ပိုင်ဆိုင်နိုင်မှာဖြစ်ပါတယ်။ အဆောက်အဦတန်ဖိုးပေး ချေပြီးသည့် အချိန်တွင် သက်တမ်းကုန်ဆုံးမည်ဖြစ်သည်။

          ချေးငွေဖြင့်ဝယ်ယူထားသည့် အဆောက်အဦသည် (မီးလောင်ခြင်း၊ မိုးကြိုးပစ်ခြင်း၊ ပေါက်ကွဲမှုဖြစ်ခြင်း၊ လေယာဉ်ပျက်ကျခြင်း၊ ငလျင်လှုပ်ခြင်း၊ မုန်တိုင်းဒဏ်၊ ရေးကြီးခြင်း၊ ထိခိုက်မှုကြောင့်ပျက်စီးဆုံးရှုံးမှု၊ ရေလှောင်ကန်၊ ရေပိုက်များ ရေလျှံပျက်စီးခြင်း၊ မီးကူးစက် လောင်ကျွမ်းခြင်း၊ သစ်ပင်လဲကျပျက်စီးခြင်း၊ မီးခိုးကြောင့်ပျက်စီးခြင်း၊ ဖောက်ထွင်းခိုးယူခံရခြင်း၊ ကာရံထားသည့်မှန်များပြုတ်ကျပျက်စီးခြင်းစသည့် အကာအကွယ် (၁၄) မျိုးအား Housing Insurance Package အာမခံဝယ်ယူထားရုံဖြင့် ပရီမီယံကြေး ထပ်မံပေးသွင်းရန် မလိုဘဲ အကာအကွယ်ရရှိမည်ဖြစ်ပါသည်။

ပရီမီယံပေးသွင်းရာတွင်လည်း အာမခံထားသူ စိတ်ကြိုက် Budget Premium   (ပရီမီယံကို လစဉ်အရစ်ကျ ပေးသွင်းသည့်ပုံစံ) နှင့် Non-Budget Premium (ပရီမီယံကို တစ်နှစ်လျှင်တစ်ကြိမ်တည်း ပေးသွင်းခြင်းပုံစံ) တို့ကို ရွေးချယ်၍ ဝယ်ယူနိုင်သည့် အာမခံအမျိုးအစား ဖြစ်ပါသည်။