မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုစီမံကိန်း(Myanmar Sustainable Development Plan-MSDP) ကို အကောင်အထည်ဖော်ဆောင်ရာ၌ စောင့်ကြည့်အကဲဖြတ်မည့် အမျိုးသားအဆင့်ညွှန်ကိန်းမူဘောင် (National Indicator Framework-NIF )တွင် ပါရှိသည့် ညွှန်ကိန်းများ၏ Metadata များကို ဖော်ထုတ်နိုင်ရေး ညှိနှိုင်းဆွေးနွေးပွဲ ကျင်းပ

မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုစီမံကိန်းကို အကောင်အထည်ဖော်ဆောင်ရာ၌ စောင့်ကြည့်အကဲဖြတ်မည့် အမျိုးသားအဆင့်ညွှန်ကိန်း မူဘောင်တွင် ပါရှိသည့် ညွှန်ကိန်းများ၏ Metadata များ ဖော်ထုတ်နိုင်ရေး ညှိနှိုင်းဆွေးနွေးပွဲကို ၂၀၁၉ခုနှစ်၊ စက်တင်ဘာလ(၁၇)ရက်နေ့၊နံနက်(၁၀:၀၀)နာရီတွင် Hotel Max ၊ နေပြည်တော်တွင် ကျင်းပခဲ့ရာ စီမံကိန်းနှင့် ဘဏ္ဍာရေးဝန်ကြီးဌာန၊ အမြဲတမ်းအတွင်းဝန် ဦးထွန်းထွန်းနိုင် က အဖွင့် အမှာစကား ပြောကြားပါသည်။

စီမံကိန်းနှင့် ဘဏ္ဍာရေးဝန်ကြီးဌာန၊ အမြဲတမ်းအတွင်းဝန် ဦးထွန်းထွန်းနိုင် က အဖွင့် အမှာစကားပြောကြားရာတွင် မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုး တိုးတက်မှုစီမံကိန်း (Myanmar Sustainable Development Plan - MSDP) ကို Living Document တစ်ခုအနေဖြင့် ၂၀၁၈ ခုနှစ်၊ ဩဂုတ်လတွင် ထုတ်ပြန်ခဲ့ပြီး ဖြစ်ပါကြောင်း၊ MSDP ကို ၂၀၁၉-၂၀၂၀ ဘဏ္ဍာနှစ်မှစ၍ စတင်အကောင်အထည်ဖော် ဆောင်ရွက်မည်ဖြစ်ပြီး ၂၀၃၀ ခုနှစ်အထိ ရည်မှန်းချက်ထား ဆောင်ရွက်သွားမည် ဖြစ်ပါကြောင်း၊ MSDP တွင် မဏ္ဍိုင် (၃) ရပ်၊ ဦးတည်ချက် (၅)ရပ်၊ မဟာဗျူဟာ(၂၈)ခုနှင့် လုပ်ငန်းစီမံကိန်း (၂၅၁)ခုပါဝင်ပြီး MSDP ကို အကောင်အထည် ဖော်ဆောင်ရွက်ရာတွင် စောင့်ကြည့်အကဲဖြတ်နိုင်စေရန်အတွက် Monitoring and Evaluation Framework တစ်ခုလိုအပ်ပါကြောင်း၊  စောင့်ကြည့်အကဲဖြတ်မည့် Monitoring and Evaluation လုပ်ငန်းစဉ်များကို စီမံကိန်းစိစစ်ရေးနှင့် တိုးတက်မှုအစီရင်ခံရေးဦးစီးဌာန၊ ဗဟိုစာရင်းအင်းအဖွဲ့နှင့် မြန်မာဖွံ့ဖြိုးမှုအဖွဲ့အစည်း(Myanmar Development Institute – MDI) တို့က ပူးပေါင်းတာဝန်ယူ ဆောင်ရွက်သွားကြမည်ဖြစ်ပါကြောင်း၊

M & E Framework ကို ရေးဆွဲရာတွင် စီမံကိန်းများ၏ Output Level ၊ Outcome Level များသာမက Impact Level အထိ တိုင်းတာနိုင်သည့် ညွှန်ကိန်း ၂၈၆ ခုပါဝင်သည့် National Indicator Framework ကို UNDP ၏ အကူအညီနှင့် ဗဟိုစာရင်းအင်းအဖွဲ့က သက်ဆိုင်ရာဌာန၊ အဖွဲ့အစည်းများနှင့် ပူးပေါင်း၍ ၂၀၁၈ ခုနှစ်၊ ဩဂုတ်လမှ စတင် ဆောင်ရွက်ခဲ့ပြီး NIF Final Draft ကို အတည်ပြုနိုင်ရန် ဆောင်ရွက်လျက်ရှိပါကြောင်း၊ ညွှန်ကိန်း ၂၈၆ ခုတွင် ၄၁% သည် SDGs Indicators များဖြစ်ပါကြောင်း၊ အဆင်သင့်တိုင်းတာနိုင်သည့် ညွှန်ကိန်း ၇၄% ပါဝင်ပြီး Impact Level ကို တိုင်းတာနိုင်သည့် ညွှန်ကိန်း ၇၂% ပါဝင်ပါကြောင်း၊ သို့ဖြစ်ပါ၍ National Indicator Framework သည် MSDP တွင် ပါဝင်သည့် စီမံကိန်းများကို ကောင်းစွာအကဲဖြတ် သုံးသပ် နိုင်မည့် Evaluation Tool တစ်ခု ဖြစ်ပါကြောင်း ပြောကြားခဲ့ပါသည်။

ဆက်လက်၍ UNDP မှ ဌာနေကိုယ်စားလှယ် Mr. Peter Batchelor က ကြိုဆို နှုတ်ခွန်းဆက် အမှာစကား ပြောကြားပါသည်။

ထို့နောက် ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဦးဆန်းမြင့်က အမျိုးသားအဆင့် ညွှန်ကိန်းမူဘောင် အစီရင်ခံစာအား ရှင်းလင်းခြင်း၊ UNDP မှ Senior Statistician Mr. Matthew Powell  မှ Metadata Development Process အကြောင်း ရှင်းလင်းခြင်း နှင့် UNDP မှ SERIP Project Manager Mr. Philipp Annawitt  မှ Requirements of the MSDP M&E System အကြောင်း ရှင်းလင်းပြောကြားပြီး တက်ရောက်လာသူများမှ ဝိုင်းဝန်းဆွေးနွေး ကြပါသည်။

ဆွေးနွေးပွဲသို့ စီမံကိန်းနှင့် ဘဏ္ဍာရေးဝန်ကြီးဌာနမှ အမြဲတမ်းအတွင်းဝန်၊ ဝန်ကြီး ဌာနများနှင့် ဦးစီးဌာနများမှ တာဝန်ရှိသူများ၊ အစိုးရမဟုတ်သော အဖွဲ့အစည်းများ၊ ဖွံ့ဖြိုးမှု မိတ်ဖက် အဖွဲ့အစည်းများနှင့် လူမှုအဖွဲ့အစည်းများမှ ကိုယ်စားလှယ်များ အပါအဝင် စုစုပေါင်း (၂၅၀)ဦးခန့် တက်ရောက်ကြပါသည်။

အဆိုပါဆွေးနွေးပွဲသည် မြန်မာနိုင်ငံ၏ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုး တိုးတက်မှုစီမံကိန်းကို အကောင်အထည်ဖော်ဆောင်သည့် ကာလတစ်လျှောက်လုံးနှင့် အကောင် အထည်ဖော်ပြီး နောက်ပိုင်းကာလအထိ စီမံကိန်း၏ ထိရောက်မှု၊ စွမ်းရည်ပြည့်ဝမှု၊ ရေရှည် တည်တံ့မှုနှင့် သက်ရောက်မှုတို့ကို မျက်ခြေမပြတ် သိရှိတိုင်းတာနိုင်ရန်အတွက် ဖော်ထုတ် ထားသည့်  အမျိုးသားအဆင့်ညွှန်ကိန်းမူဘောင်တွင်ပါရှိသည့် ညွှန်ကိန်းများ၏ Metadata များ ဖော်ထုတ်နိုင်စေရန်အတွက် ရည်ရွယ်၍ ကျင်းပပြုလုပ်ခြင်း ဖြစ်ပါသည်။ ကဏ္ဍအလိုက် ဆွေးနွေးပွဲများကို လုပ်ငန်းအဖွဲ့(၁၂)ဖွဲ့ဖြင့် (၁၇-၉-၂၀၁၉)ရက်နေ့မှ (၁-၁၀-၂၀၁၉)ရက်နေ့အထိ ကျင်းပ ပြုလုပ်သွားမည် ဖြစ်ပါသည်။(သတင်းစဉ်)