နေပြည်တော်၊ မေ ၈

နိုင်ငံပိုင်ကဏ္ဍအတွက် နိုင်ငံတကာစာရင်းစံများ၊ ငွေသားအခြေခံအပိုင်း(၁) (International Public Sector Accounting Standards – IPSAS, Part 1 of Cash-Basis ) ဆင့်ပွားသင်တန်း အမှတ်စဉ်(၂) သင်တန်းဖွင့်ပွဲအခမ်းအနားကို ယနေ့နေ့လယ် (၁:၀၀) နာရီတွင် နေပြည်တော်ရှိ စီမံကိန်းနှင့် ဘဏ္ဍာရေးဝန်ကြီးဌာန၊ စုပေါင်းခန်းမ၌ ကျင်းပသည်။

အခမ်းအနားတွင် ငွေတိုက်ဦးစီးဌာန၊ ညွှန်ကြားရေးမှူးချုပ်က မြန်မာနိုင်ငံမှာ ခိုင်မာအား ကောင်းသည့် ပြည်သူ့ဘဏ္ဍာရေးစီမံခန့်ခွဲမှုစနစ် ဖြစ်ပေါ်လာရေးအတွက် ရည်ရွယ်၍ နိုင်ငံပိုင် ကဏ္ဍအတွက် နိုင်ငံတကာစာရင်းစံများ ငွေသားအခြေခံ အပိုင်း(၁) (International Public Sector Accounting Standards – IPSAS, Part 1 of Cash Basis ) ဆင့်ပွားသင်တန်း အမှတ်စဉ်(၁)ကို သင်တန်းသား/သူ (၄၀)ဉီးဖြင့် ၂၀၂၂ ခုနှစ် နိုဝင်ဘာလမှ ၂၀၂၃ခုနှစ် ဇန်နဝါရီလအထိ (၇)ပတ်ကြာ သင်တန်းဖွင့်လှစ်ခဲ့ပြီး ဖြစ်ပါကြောင်း၊ မူလသင်တန်းအနေဖြင့် ပြည်ထောင်စုစာရင်းစစ်ချုပ်ရုံး၏ အကူအညီဖြင့် ရသုံးမှန်းခြေငွေစာရင်းဦးစီးဌာနမှ သင်တန်းသား/သူ (၅၀)ဦး ၊ ငွေတိုက်ဦးစီးဌာနမှ သင်တန်းသား/သူ (၅၀) ဦးဖြင့် ပြည်ထောင်စုစာရင်းစစ်ချုပ်ရုံးမှ ပထမအကြိမ် သင်တန်းပို့ချခဲ့ပြီး ဖြစ်ပါကြောင်း၊ ရသုံးမှန်းခြေငွေစာရင်းဦးစီးဌာနနှင့် ငွေတိုက်ဦးစီးဌာနတို့မှ ဆင့်ပွားသင်တန်းများကို ဆက်လက်ပို့ချလျက်ရှိပါကြောင်း၊ လက်ရှိကျင့်သုံးနေသည့် စာရင်းထားသိုနည်းစနစ်မှ နိုင်ငံတကာသုံး စာရင်းစံများစနစ်သို့ အသွင်ကူးပြောင်းရေးအတွက် လုပ်ငန်းစဉ်များချမှတ်ထားပါကြောင်း၊ လုပ်ငန်းစဉ်ကို အကောင်အထည်ဖော်ဆောင်ရွက်ရာတွင် ပထမဦးဆုံးကမ္ဘာ့ဘဏ် အကူအညီဖြင့် ဆောင်ရွက်ခဲ့ပါကြောင်း၊ ကမ္ဘာ့ဘဏ်မှ IPSAS Transition Plan and Roadmap ကိုရေးဆွဲနိုင်ရေး အတွက် လက်ရှိကျင့်သုံးနေသည့် စာရင်းထားသိုနည်းစနစ်နှင့် နိုင်ငံတကာတွင် ကျင့်သုံးနေသည့် စာရင်းထားသိုနည်းစနစ်အကြား ကွာဟချက်များကို ရှာဖွေဖော်ထုတ်ပြီး IPSAS Gap Analysis Report ကို ၂၀၁၉ ခုနှစ်တွင်ထုတ်ပြန်ခဲ့ပါကြောင်း၊ ငွေတိုက်ဦးစီးဌာနအနေဖြင့် Roadmap ပါ Timeline ကို ပြန်လည်ပြင်ဆင်ရေးဆွဲထားပြီး ဖြစ်ပါကြောင်း၊  ပြင်ဆင်ထားသည့် Timeline တွင် အဆင့်(၃)ဆင့် ပါဝင်ပြီး Phase 1- Institution Framework ကို ၂၀၂၂ မှ ၂၀၂၅ အထိ ၊ Phase 2- Implement  Part 1 of the cash basis IPSAS ကို ၂၀၂၂ မှ ၂၀၂၆ အထိ ၊ Phase 3- Implement  Part 2 of the cash basis IPSAS ကို ၂၀၂၅ မှ ၂၀၂၇ အထိ ရေးဆွဲထားပါကြောင်း၊  Phase 1 နှင့် Phase 2 သည် ၂၀၂၂ ခုနှစ်တွင် စတင်ဆောင်ရွက်မှာဖြစ်ပြီး Phase 3 ကို ၂၀၂၅ ခုနှစ်မှာ စတင်မှာဖြစ်ပါကြောင်း၊ ငွေတိုက်ဦးစီးဌာနအနေဖြင့် Roadmap ပါ Timeline ကို ပြန်လည်ပြင်ဆင် ရေးဆွဲထားသည်နှင့်အညီ ဆက်လက်ဆောင်ရွက်သွားမည် ဖြစ်ပါကြောင်း၊ IPSAS တွင် Cash Basis နှင့် Accrual Basis ဟူ၍ နှစ်မျိုးပါရှိပြီး Cash Basis မှ Accrual Basis သို့အဆင့်ဆင့်ပြောင်းလဲ ကြရမှာဖြစ်သဖြင့် အချိန်ယူဆောင်ရွက်ရမှာဖြစ်ပါကြောင်း၊ မြန်မာနိုင်ငံ၏ စာရင်းထားနည်းစနစ် သည် Cash Basis ဖြစ်သည့်အတွက်  ဌာန/အဖွဲ့အစည်းများ၏ စာရင်းရေးသွင်းမှုများကို IPSAS Cash Basis နှင့် အညီဆောင်ရွက်ရမှာဖြစ်ပြီး ငွေရေးကြေးရေးအဖွဲ့အစည်းများဖြစ်တဲ့ ဘဏ်များ၊ ဘဏ်မဟုတ်သော ငွေရေးကြေးရေးအဖွဲ့အစည်းများ (Non-financial Institutions)၊ အာမခံအဖွဲ့ အစည်းများက နိုင်ငံတကာဘဏ္ဍာရေးအစီရင်ခံခြင်း (International Financial Reporting Standards – IFRS)နှင့်အညီ ဆောင်ရွက်ရမှာဖြစ်ပါကြောင်း၊ IPSAS ကိုလိုက်နာကျင့် သုံးခြင်းဖြင့် ဌာန/အဖွဲ့အစည်းများအနေဖြင့် ပိုမိုကောင်းမွန်သောတာဝန်ယူမှု၊ တာဝန်ခံမှုနှင့် ပွင့်လင်းမြင်သာမှု ရှိလာခြင်း၊ လုပ်ငန်းစွမ်းဆောင်ရည် ပိုမိုတိုးတက်လာခြင်း၊ ကောင်းမွန်သည့်ဘဏ္ဍာရေးစီမံခန့်ခွဲမှု ဖြစ်ပေါ်စေခြင်း၊ စာရင်းပညာပိုင်းတွင်နိုင်ငံတကာနှင့် နှိုင်းယှဉ်လာနိုင်ခြင်း စသည့်အကျိုးကျေးဇူး များကိုရရှိ​စေမှာဖြစ်ပါကြောင်း၊ သင်တန်းတွင်တက်ရောက်မည့် သင်တန်းသား/သူများ အနေဖြင့် သင်တန်းမှချမှတ်ထားသော စည်းကမ်းများကိုလိုက်နာပြီး လက်တွေ့အကောင်အထည်ဖော် ဆောင်ရွက်ရာတွင် လေ့လာထားသည်များကို ပြန်လည်အသုံးချရန် ကြိုးစားလေ့လာစေလိုကြောင်း တိုက်တွန်းပြောကြားခဲ့ပါသည်။

သင်တန်းဖွင့်ပွဲအခမ်းအနားသို့ ငွေတိုက်ဉီးစီးဌာနမှ ညွှန်ကြားရေးမှူးချုပ်၊ ဒုတိယညွှန် ကြားရေးမှူးချုပ်များ၊ ညွန်ကြားရေးမှူးများ၊ ဒုတိယညွှန်ကြားရေးမှူးများ၊ သင်တန်းဆရာမများနှင့် သင်တန်း သား/သင်တန်းသူ (၄၁)ဦး တက်ရောက်ကြသည်။ ဆင့်ပွားသင်တန်း အမှတ်စဉ်(၂)ကို ၂၀၂၃ ခုနှစ်၊ မေလ ၈  ရက်နေ့မှ ဇွန်လ ၂၆ ရက်နေ့အထိ သင်တန်းကာလ ရက်သတ္တ (၇) ပတ် ကြာမြင့်မည် ဖြစ်ပါသည်။