_0.png)
, 
(၄၉) ကြိမ်မြောက် အာဆီယံစီးပွားရေးဝန်ကြီးများ အစည်းအဝေးနှင့် ဆက်စပ်အစည်းအဝေးများ၏ ဆက်လက်ဆောင်ရွက်ရန် ကိစ္စရပ်များ၊ အာဆီယံ-ဟောင်ကောင် (တရုတ်) လွတ်လပ်သော ကုန်သွယ်မှု ဒေသ သဘောတူစာချုပ် ချုပ်ဆိုရေးနှင့် ဒေသတွင်းဘက်စုံစီးပွားရေး ပူးပေါင်းဆောင်ရွက်မှုဆိုင်ရာ ကိစ္စရပ်များ ဖြစ်ပေါ်တိုးတက်မှု အခြေအနေများနှင့် စပ်လျဉ်းသည့် ညှိနှိုင်းအစည်းအဝေးကို ၂၀၁၇ ခုနှစ် စက်တင်ဘာလ ၂၈ ရက်နေ့၊ မွန်းလွဲ (၁းဝ၀) နာရီတွင် စီမံကိန်းနှင့် ဘဏ္ဍာရေးဝန်ကြီးဌာန၊ အစည်းအဝေးခန်းမ (၃) ၌ ကျင်းပပြုလုပ်ခဲ့ပါသည်။ အစည်းအဝေးတွင် စီမံကိန်းနှင့်ဘဏ္ဍာရေးဝန်ကြီးဌာန၊ နိုင်ငံခြားစီးပွားဆက်သွယ်ရေးဦးစီးဌာန၊ ဒုတိယညွှန်ကြားရေးမှူးချုပ် ဒေါ်ငြိမ်းဇင်စိုးမှ ဦးဆောင်ဆွေးနွေးပြီး ဘာသာရပ်ဆိုင်ရာ ဌာနအသီးသီးမှ ကိုယ်စားလှယ် (၂၆)ဦးတက်ရောက်ပါသည်။
အစည်းအဝေးတွင် ၂၀၁၇ ခုနှစ် စက်တင်ဘာလ ၄ ရက်နေ့မှ ၁၁ ရက်နေ့အထိ ဖိလစ်ပိုင်နိုင်ငံ ပါဆေးမြို့တွင် ကျင်းပခဲ့သော (၄၉) ကြိမ်မြောက် အာဆီယံစီးပွားရေးဝန်ကြီးများ အစည်းအဝေးနှင့် ဆက်စပ်အစည်းအဝေးများမှ ဆွေးနွေးဆုံးဖြတ်ချက်များအရ မြန်မာနိုင်ငံမှ ဆက်လက်ဆောင်ရွက်ရန် ရှိသည့် ကိစ္စရပ်များကို သက်ဆိုင်ရာဌာနများသို့ ချပြရှင်းလင်းဆွေးနွေးခဲ့ပြီး ဘာသာရပ်ဆိုင်ရာဌာနများမှ ဆောင်ရွက်ထားရှိမှု အခြေအနေများကို ပြန်လည်တင်ပြ ဆွေးနွေးခဲ့ပါသည်။
ထို့အပြင် အာဆီယံ-ဟောင်ကောင်(တရုတ်) လွတ်လပ်သော ကုန်သွယ်မှုဒေသ သဘောတူ စာချုပ်နှင့် ရင်းနှီးမြှုပ်နှံမှု သဘောတူစာချုပ်များအား ၂၀၁၇ နိုဝင်ဘာလဆန်းတွင် ကျင်းပမည့် (၃၁) ကြိမ် မြောက် အာဆီယံထိပ်သီးအစည်းအဝေးကာလအတွင်း လက်မှတ်ရေးထိုးကြရန် အဖွဲ့ဝင်နိုင်ငံအားလုံးမှ သဘောတူညီကြပြီးဖြစ်သဖြင့် မြန်မာနိုင်ငံမှ ပါဝင်လက်မှတ်ရေးထိုးနိုင်ရေး ကိစ္စနှင့် အာဆီယံအဖွဲ့ဝင် ၁၀ နိုင်ငံနှင့် ယင်း၏ FTA နိုင်ငံ ၆ နိုင်ငံတို့ပါဝင်သည့် ဒေသတွင်းဘက်စုံ စီးပွားရေး ပူးပေါင်းဆောင်ရွက်မှု သဘောတူစာချုပ်ချုပ်ဆိုရေးအတွက် ညှိနှိုင်းမှုများအား ၂၀၁၇ ခုနှစ် နှစ်ကုန်တွင် အပြီးသတ်နိုင်ရေးနှင့် စပ်လျဉ်းသည့် ကိစ္စရပ်များအပေါ်တွင် ဆွေးနွေးခဲ့ကြပါသည်။
ဆက်လက်၍ ဘာသာရပ်ဆိုင်ရာဌာနများမှ အကြံပြုခြင်း၊ သိရှိလိုသည်များ မေးမြန်းခြင်းနှင့် ဆွေးနွေးခြင်းတို့ကို ပြုလုပ်၍ အစည်းအဝေးသည် မွန်းလွဲ (၂း၄၅) နာရီတွင် ပြီးမြောက်ခဲ့ကြောင်း သတင်းရရှိသည်။