လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ လူမှုဝန်ထမ်းဦးစီး ဌာနနှင့် UNICEF တို့ပူးပေါင်း၍ ကလေးသူငယ်ဆိုင်ရာ စဉ်ဆက်မပြတ် ဖွံ့ဖြိုးမှုပန်းတိုင်များနှင့် ရည်မှန်းချက်များအပေါ် လုပ်ငန်းစီမံချက်ချမှတ်ရေးဆိုင်ရာ ဆွေးနွေးပွဲအား Park Royal Hotel၊ နေပြည်တော်၌ (၁၈.၅.၂၀၁၈)ရက်နေ့ နံနက်(၉:၀၀)နာရီတွင် ကျင်းပခဲ့ရာ ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်၊ လူမှုဝန်ထမ်းဦးစီးဌာန၊ ညွှန်ကြားရေးမှူးချုပ် ဒေါက်တာစန်းစန်းအေးနှင့် UNICEF မှ Social Policy and Child Right Monitoring, Chief, Samman J Thapa  တို့မှ အဖွင့်အမှာစကား ပြောကြား ခဲ့ပါသည်။

ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ အဖွင့်စကား ပြောကြားရာတွင် စဉ်ဆက်မပြတ်ဖွံ့ဖြိုးမှုပန်းတိုင်များတွင် ပါဝင်သည့် ပန်းတိုင်၊ ရည်မှန်းချက်နှင့် ညွှန်ကိန်းများအကြောင်းအကျဉ်းချုပ်နှင့် ဗဟိုစာရင်းအင်းအဖွဲ့မှ ဆောင်ရွက်ခဲ့သည့် စဉ်ဆက် မပြတ်ဖွံ့ဖြိုးမှုပန်းတိုင်များနှင့်စပ်လျဉ်းသည့် အသိပညာပေးဆွေးနွေးပွဲများ၊ သင်တန်းများနှင့် Baseline Indicator Report ထွက်ရှိခဲ့မှုများ၊ မြန်မာနိုင်ငံ၏ရေရှည်တည်တံ့ခိုင်မြဲပြီး ဟန်ချက် ညီသော ဖွံ့ဖြိုးတိုးတက်မှုစီမံကိန်းနှင့် အကောင်အထည်ဖော်ရေး အစီအစဉ် (Myanmar Sustainable Development Plan – MSDP) တွင်ပါရှိသည့် ရည်မှန်းချက် (၅) ခုဖြစ်သော အမျိုးသား ပြန်လည်ရင်ကြားစေ့ရေးနှင့် ကောင်းမွန်သောအုပ်ချုပ်ရေး၊ စီးပွားရေးတည်ငြိမ်ရေးနှင့် ကောင်းမွန်သော မက်ခရိုစီမံမှု၊ အလုပ်အကိုင်ဖန်တီးရေးနှင့် ပုဂ္ဂလိက ဦးဆောင်သော စီးပွားရေး တိုးတက်မှု၊ လူ့စွမ်းအားအရင်းအမြစ်နှင့် လူမှုရေးဆိုင်ရာဖွံ့ဖြိုးမှု၊ သဘာဝသယံဇာတနှင့် ပတ်ဝန်းကျင် သာယာဝပြောရေးစသည့်ရည်မှန်းချက်များနှင့် စဉ်ဆက်မပြတ်ဖွံ့ဖြိုးမှု ပန်းတိုင်များ မှ ရည်မှန်းချက်များ ချိတ်ဆက်နေမှုများအကြောင်းနှင့် အနာဂတ်တွင်အားထားရမည့် Human Capital အား မွေးမြူရာတွင် ကလေးသူငယ်များမှစတင်၍ မွေးမြူရမည်ဖြစ်ရာ လုပ်ငန်း စီမံချက်များရေးဆွဲရာတွင် အားလုံးခြုံငုံ စဉ်းစားဆွေးနွေးကြစေလိုကြောင်းပြောကြားခဲ့ပါသည်။

ဆက်လက်၍ တက်ရောက်လာသူများမှ အသီးသီး ဝိုင်းဝန်းဆွေးနွေးကြပြီး ဆွေးနွေးပွဲကို ညနေ(၄:၃၀)နာရီတွင် ရုပ်သိမ်းခဲ့ပါသည်။ အဆိုပါဆွေးနွေးပွဲသို့ သက်ဆိုင်ရာဌာနအသီးသီးမှ ကိုယ်စားလှယ်(၁၀၀)ဦးခန့် တက်ရောက်ခဲ့ပါသည်။

နေပြည်တော်

၂၀၁၈ခုနှစ်၊ မေလ ၁၈ရက်နေ့

(သတင်းစဉ်)