စီမံကိန်းနှင့်ဘဏ္ဍာရေးဝန်ကြီးဌာန၊ တနင်္သာရီတိုင်းဒေသကြီး ဗဟိုစာရင်းအင်းအဖွဲ့၊    ကျန်းမာရေးနှင့်အားကစားဝန်ကြီးဌာနနှင့်Bloomlerg Data For Health Initiative အဖွဲ့တို့ ပူးပေါင်းဆောင်ရွက်မှုဖြင့် “မွေးဖွားမှုနှင့် သေဆုံးမှုမှတ်ပုံတင်ခြင်း ၁၀၀ ရာခိုင်နှုန်းရရှိရန် ပူးပေါင်းဆောင်ရွက်ရေးအလုပ်ရုံဆွေးနွေးပွဲ”ကို ၂၀၁၇ခုနှစ် ဒီဇင်ဘာလ(၃၀)ရက်နေ့၊ နေ့လည် ပိုင်းတွင် တနင်္သာရီတိုင်းဒေသကြီး မြိတ်မြို့ရှိ ပုလဲရတနာခန်းမတွင် ကျင်းပခဲ့ပါသည်။

အခမ်းအနားသို့ ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင် နှင့်အဖွဲ့၊ တနင်္သာရီတိုင်းဒေသကြီး ဗဟိုစာရင်းအင်းအဖွဲ့မှ တိုင်းဒေသကြီးတာဝန်ခံနှင့်အဖွဲ့၊ မြို့နယ် အထွေထွေအုပ်ချုပ်ရေးဦးစီးဌာနနှင့်  မြို့နယ်ပြည်သူ့ကျန်းမာရေးဦးစီးဌာနများမှ တာဝန်ရှိသူများ၊   ရပ်ကွက်/ကျေးရွာအုပ်ချုပ်ရေးမှူးများ၊ အခြေခံ ပြည်သူ့ကျန်းမားရေးဝန်ထမ်းများနှင့် ဆက်စပ် နေသည့် ဌာနဆိုင်ရာ အဖွဲ့အစည်းများမှ  တာဝန်ရှိသူများ စုစုပေါင်း (၁၄၇)ဦးတက်ရောက်ခဲ့ကြ ပါသည်။

အခမ်းအနားတွင် ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်မှ အမှာစကား ပြောကြားရာတွင် ပြည်သူလူထုအကြား ဖွား/သေ မှတ်ပုံတင်ခြင်း၏ အရေးကြီးပုံသိရှိ နားလည် စေရန်နှင့် မြန်မာနိုင်ငံ၏ ဖွားသေမှတ်ပုံတင်ခြင်းစနစ်အား နိုင်ငံတကာအဆင့်အတန်း မီသော စနစ်ဖြစ်လာစေရန်၊ ဖွား/သေ စာရင်းအင်းညွှန်ကိန်းများ အချိန်နှင့် တစ်ပြေးညီ မှန်ကန်စွာ တွက်ချက် ထုတ်ပြန်နိုင်ရန်နှင့် ဌာနများအကြား စာရင်းအင်းကွာဟမှုများ လျော့နည်းလာစေရန် အတွက် ရည်ရွယ်၍ကျင်းပရခြင်းဖြစ်ပါကြောင်း၊ ဗဟိုစာရင်းအင်းအဖွဲ့အနေဖြင့် ဖွားသေ စာရင်းအင်းအချက်အလက်များမှ လူဦးရေစာရင်းများ၊ ကျန်းမာရေးနှင့် သက်ဆိုင်သော အညွှန်း ကိန်းများကို နှစ်စဉ်တွက်ချက် ထုတ်ပြန် လျက်ရှိပါကြောင်း၊ လက်ရှိတွင် မွေးဖွားမှု မှတ်ပုံ တင်လွှမ်းခြုံမှု (၈၁)ရာခိုင်နှုန်းနှင့် သေစာရင်း မှတ်ပုံတင်လွှမ်းခြုံမှု (၅၇)ရာခိုင်နှုန်း ခန့်သာ ရှိသည့်အတွက် ပြည်သူလူထုအနေဖြင့် သေစာရင်း မှတ်ပုံတင်ခြင်း၏ အရေးကြီးပုံသိရှိနား လည်ရန်လိုအပ်ပါကြောင်း၊ Substainable Development Goals ညွှန်ကိန်းများ၏ (၄၅)ရာခိုင်နှုန်းသည်  ဖွားသေစာရင်းအင်းအချက်အလက်များအပေါ် အခြေခံတွက်ချက်ပြီး ၎င်းညွှန် ကိန်းများမှ လက်ရှိ ဆောင်ရွက်နေသည့်  လုပ်ငန်းများ၏ အောင်မြင်တိုးတက်မှုများကို စဉ်ဆက်မပြတ်စောင့်ကြည့် တိုင်းတာသွားနိုင်မည်ဖြစ်ပါကြောင်း၊ ဖွားသေစာရင်းအင်း တိုးတက် ရေးလုပ်ငန်းသည် စာရင်းအင်းဆိုင်ရာ ဖွံ့ဖြိုးတိုးတက်ရေး အမျိုးသားအဆင့် မဟာဗျူဟာ (National Strategy for Development of Statistics-NSDS) ၏ ရည်မှန်းချက်များထဲတွင် အဓိကကျသည့် ရည်မှန်းချက်ဖြစ်သည့်အတွက် မွေးဖွားမှုနှင့် သေဆုံးမှုဆိုင်ရာ စာရင်းအင်းများ လုပ်ငန်းအဖွဲ့ တစ်ခုအဖြစ် ဆောင်ရွက်လျက်ရှိပါကြောင်း၊၂၀၁၈ခုနှစ်မှစတင်၍ တစ်နိုင်ငံလုံး ကိုယ်စားပြု Mortality Statistics နှင့်  Cause of Deaths အချက်အလက်များ ပြည့်စုံမှန်ကန်စွာ ရရှိရန် နှင့် အချိန်နှင့် တစ်ပြေးညီ ရရှိရန် Verbal Autopsy Method ကို သုံးပြီး  သေစာရင်း အချက်အလက်များကို မြို့နယ်(၃၄)မြို့နယ်တွင် ဆောင်ရွက်သွားမည်ဖြစ်ရာ မြိတ် နှင့် ထားဝယ်မြို့ များတွင်လည်း စတင်ဆောင်ရွက်သွားမည် ဖြစ်ကြောင်း ပြောကြားခဲ့ပါသည်။

ဆက်လက်၍ မြို့နယ်အထွေထွေအုပ်ချုပ်ရေးဦးစီးဌာနမှ ဒုတိယမြို့နယ်အုပ်ချုပ်ရေးမှူးမှ မွေးဖွားမှုနှင့်သေဆုံးမှုမှတ်ပုံတင်ခြင်း ၁၀၀ ရာခိုင်နှုန်းရရှိရန် ပူးပေါင်း ဆောင်ရွက်ရေး အလုပ်ရုံ ဆွေးနွေးကျင်းပရခြင်းအကြောင်းနှင့် ဖွားသေမှတ်ပုံတင်ခြင်း၏ အရေးပါပုံကို ဆွေးနွေး တင်ပြကြပြီး  ဆွေးနွေးပွဲတက်ရောက်လာသူများမှ ပြန်လည်ဆွေနွေးတင်ပြကြကာ အလုပ်ရုံ ဆွေနွေးပွဲကို  ညနေ ၄နာရီတွင်ရုပ်သိမ်းခဲ့ပါသည်။

          (သတင်းစဉ်)